هنسافر برا ؟

السفر لألمانيا : خطوات فيزا اللغة Sprachkurs Visum

السفر لألمانيا : خطوات فيزا اللغة Sprachkurs Visum

سوف نقدم لكم اليوم في موقعكم المفضل موقع يفيدك مقالة مميزة بعنوان السفر لألمانيا : خطوات فيزا اللغة Sprachkurs Visum مقدمه من الجروب المميز جروب المصريين في ألمانيا، هيا بنا لقراءة المقالة سويا . 

ياجماعه دي قصة لاحد الطلبة بس معرفوش شخصيا
في الأول أحب أشكر كل الناس المحترمة اللي ساعدتني لغاية ما أخدتها و ربنا يجعلها في ميزان حسناتكم و يا رب حد يستفيد من اللي حكتبه و يا رب يجعلها في ميزان حسناتنا
.
— أي حد ياخد الفيزا دي أما ييجي ألمانيا إن شاء الله يبعتلي و إن شاء الله أحاول أساعده–

معلومات عن فيزا اللغة:

– ممكن تمدها أكتر من 6 شهور على عكس كل الفيزات التانية بس طبعا لازم يكون في سبب انك تمدها إنك حتكمل دراسة
– ممكن ان شاء الله أما تلاقي شغل تحولها اقامة علطول من ألمانيا
– لازم تنزل على المدينة اللي مكتوبة في التأشيرة
– لازم تخلص ورقك في مكتب الأجانب اللي في المدينة دي

حاجات عامة الأول:
– حاول تطلع من كل ورقة نسختين, واحدة تاخدها و التانية تسيبها في مصر عشان لو لا قدرالله ضاعت حد يبعتهالك
– أول حاجة تعملها انك تكلم السفارة تاخد معاد عشان بيدوا معاد بعد شهرين …. تكلم فودافون على 2101 و تختار ألمانيا و تقولهم عاوزأقدم على فيزا دراسة أزيد من 3 شهور
– أنا معرفش غير الكلام اللي أنا حكتبه ده …. و يا ريت الناس تتعب نفسها حبة معلش …… أنا معرفش غير الفيزا دي , معرفش البحث عن عمل ولا السياحة
– مش لازم تترجم الورق قبل ميعاد السفارة , أنا اديتلهم الورق كله انجليزي
– مصاريف فيزا اللغة دي بتعدي ال 55,000 جنيه
– مفيش حد أدنى لمستوى اللغة اللي معاك عشان تقدم عليها بس برده بلاش أحسن تكون مخدتش حاجة خالص . يعني على الأقل امتحن A2 في جوتة قبل ما تقدم
– حاول يكون معاك واحد صاحبك يهون عليك المشاوير ….. حبيب قلبي يا نمير „grin“-Emoticon

الأوراق المطلوبة و بتتعمل ازاي (خصوصا بتوع جامعة الاسكندرية)
• شئون الخريجين اللي تحت أكاديمي:
تروح تقول للبنت هناك عاوز ورق ألمانيا و هي عارفاه كله بس زيادة في الأمان بتبقى عاوز:
شهادة تخرج مؤقتة (عربي و انجليزي)
شهادة دراسة بالانجليزي (انجليزي)
شهادة نيوروسيكايتري Neuropsychiatry (انجليزي)
حسن سير من العميد (انجليزي)
بيان درجات (عربي و انجليزي)
ساعات معتمدة ( عربي و انجليزي)
شهادة امتياز (عربي و انجليزي) و دي بتتعمل فوق الاستقبال عند الست اللي قاعدة قدام محمود (مش فاكر اسمها)

• القاهرة :
تاخد بطاقتك و صور و كارنيه النقابة و تروح على وزارة الصحة جنب محطة مترو سعد زغلول و تروح مبنى التكليف الدور الأرضي وتطلع من هناك:
– شهادة مزاولة مهنة موجهة لألمانيا(عربي و انجليزي) و توثقها في الدورالتالت في نفس المبنى و بعد كده توثقها خارجية
(جامعة اسكندرية) :بعد ما الورق ده كله بيطلع , بتاخده المبنى الأخضر اللي جنب الملاعب ده الدور الأرضي عند أستاذ حمدي موثق الجامعة , بياخده يوثقه في الجامعة ولو عاوز ممكن يوثقهولك خارجية يا اما خده انت وثقه خارجية في سان ستيفانو جنب أبو عوض أو في سموحة بعد زهران عند البنزينة كده ( حاجات النقابة بتتوثق خارجية علطول)
(غير جامعة اسكندرية) : وثق كل الورق في الكلية بتاعتك توثيق جامعة و بعد كده وثقه خارجية في موقف الترجمان

معلومة لوجه الله :
أي ورقة تعملها اسأل الموظف توثقها فين قبل توثيق الخارجية. في أوراق تتوثق جامعة و في أوراق تتوثق محافظة و في أوراق تتوثق من نفس المبنى اللي انت عملت منه الورقة

• الحساب المغلق:
لازم تعمل في ألمانيا حاجة اسمها حساب مغلق بتحط فيه 670 يورو على كل شهر بتقعده هنا في دويتش بانك
ايه خطواته ؟
بتملى الورقة دي على الكمبيوتر : حعمل upload للينك
بتصور الباسبور بتاعك كله
تروح السفارة في الزمالك في القاهرة و خلي بالك ان التوثيق هناك من 8-9:30 بس , لو رحت 5 دقايق متأخر حتلاقيهم قفلوا
تدي الموظفة الورق اللي مليته ده و صورة الباسبور و 350 جنيه
الورق بيخلص تاني يوم فا ممكن الريسيت اللي حتدهولك تديه ل TNT اللي جنب السفارة يجبهولك البيت ب 60 جنيه
.
أما الورق يجيلك البيت بتاخده تبعته بال DHL على
Deutsche Bank Privat- und Geschäftskunden AG
Frankfurter Straße 1
04024 Leipzig
تقريبا بيتكلف 450 جنيه قول انك دكتور ممكن يعملولك خصم رأفة بحالك مش فاكر أد ايه
بعد كام يوم دويتش بنك بيبعتلك ايميل ان حسابك اتفتح فا طبعا مش محتاج أقول ان لازم الايميل اللي كتبته في الورقة يكون مظبوط
بتروح البنك بتاعك في مصر وتقولهم انك عاوز تبعت يورو بره مصر .
حيفتحولك حاجة اسمها حساب فرعي باليورو و تحط فيه 4,150 يورو(على ال6 شهور اللي حتقعدهم و زيادة حبة)
و تبعتهم على رقم الحساب اللي دويتش بانك حيبعتهولك على الايميل (حيكون مكتوب فيه كل التفاصيل)
.
طبعا لو عندك حساب باليورو حتبعت منه علطول مش حتعمل حساب فرعي. الكلام ده للناس اللي حسابها بالجنيه المصري
معلومة مهمة : عشان تعرف تبعت يورو برة مصر لازم حسابك الأساسي في البنك ده يكون عدى عليه 3 شهور (مش الحساب الفرعي)
.
لو معندكش حساب في أي بنك ,افتح في ال CIB أحسن حاجة و استنى 3 شهور أو اسألهم يمكن الكلام يكون اتغير
الفلوس اللي بتبعتها هنا دي مسموحلك تاخد منها كل شهر 670 يورو بس
بعد ما بتبعت الفلوس , دويتشه بنك بيبعتلك ايميل ان الفلوس وصلت , تطبع الورقة دي و تخليها معاك عشان معاد السفارة

• معهد اللغة :
مفيش حاجة اسمها معهد حلو و وحش , كله شغال و بصراحة انت و حظك . ممكن يبقى انت و صاحبك في نفس المعهد و هو المدرس بتاعه كويس و انت المدرس بتاعك سكة أو العكس . فا انت تشوف ايه المدينة اللي تعرف فيها حد و تدخل على جوجل تدور على العاهد اللي في المدينة دي.
.
تكتب مثلا Sprachschule Dortmund حيطلعلك كل المدارس اللي في المدينة دي بالسايتات بتاعتهم , تبعت لمدرسة مدرسة بالانجليزي عادي تعرفهم بنفسك و بمستواك في اللغة و تقولهم انك عاوز تجيلهم و تسألهم على المواعيد و السعر و امكانية انهم يعملولك خصم لو خدت كام مستوى و كده.
بالنسبة للفلوس حتلاقي اختلاف كبير جدا , جوتة في ألمانيا ب 3000 يورو المستوى و في حاجات من أول 300 يورو المستوى . المهم انك تدور على المدينة اللي تناسبك و تعرف فيها ناس دي أهم حاجة.
ايه الشروط اللي لازم تكون موجودة في المعهد اللي حتختاره عشان السفارة توافق ؟

– طبعا بتقدم على كورس أزيد من 3 شهور عشان تاخد فيزا D
– لازم يكون عدد ساعات الدراسة أزيد من 20 ساعة في الاسبوع . يعني لو حجزت Abend Kurs مرتين في الاسبوع الفيزا حتترفض
– حاول تبعد عن برلين عشان أعرف ناس اترفضت
– غير كده متهيألي أي مكان تاني حينفع ان شاء الله
– لازم يبعتولك acceptance letter على الايميل يكتبو اسمك بالكامل و مولود امتى و انك جاي ألمانيا عشان تدرس مستويات كده و انك حتدرس أزيد من 20 ساعة في الأسبوع . تاخد الايميل ده تطبعه و تحطه مع ورق السفارة
– ممكن و انت بتدور على معهد تلاقي حاجة رخيصة اسمها Volkshochschule . دي بتترفض في السفارة
– شوف لو المعهد ممكن يوفر سكن حتى لو أغلى شوية حتوفر على نفسك تعب و أرف و مجهود كتير عشان التدوير على سكن ده أغلس حاجة هنا . لو بيوفروا سكن ب 300-400 يورو اتكل على الله و خده . و بعد كده خد ورقة السكن دي حطها مع ورق السفارة

• السكن :
يا ريت تاخد سكن من المعهد أو واحد صاحبك قديم هنا يحجزلك سكن . فكرة انك تيجي ألمانيا تحجز في فندق اسبوع لغاية متلاقي سكن دي حتصرف فلوس بالعبط و ممكن تنام في الشارع و حتبقى الشنط عملالك أزمة بنت كلب. و بعدين في السفارة بيهتموا بموضوع ورقة السكن ده . أنا والله معرفش معلومات أكتر من كده عن السكن عشان واحد صاحبي ساعدني بصراحة.

طيب ايه ترتيب الكلام ده ؟
شوف المدرسة الأول عشان المواعيد وظبط وقتك ان يكون قدامك 5 شهور على بدء الدراسة و بعد كده كلم السفارة خد معاد و بعد كده خلص كل ورقك و ادفع للمدرسة و الحساب المغلق و روح السفارة قبل معاد الدراسة بشهرين على الأقل عشان بياخدوا من شهر لشهرين عشان يردوا عليك

• المقابلة:
باسبورك في جيبك و ورقك في ايدك و كله تمام متخافش . تبقى هناك الساعة 7 , انت بتقدم على فيزا D غير كل الناس اللي هناك يعني ليك شباك لوحدك
طبعا خلي معاك كل ورقك احتياطي بس في الغالب اللي حيتطلب منك بس هو اللي أنا كاتبه بعد كده
الورق اللي تاخده معاك أصول و صور نسختين حياخدو منك الصور (كله بالانجليزي متوثق خارجية):
1) الشهادة المؤقتة
.
2) مزاولة المهنة الموجه لألمانيا
.
3) شهادة الامتياز
.
4) الحساب المغلق.
.
5) جواب القبول في المدرسة.
.
6) شهادة قيد للمكان اللي انت شغال فيه لو وزارة صحة أو برايفيت (متقدمهاش غير لو اتطلبت)
.
7) مفردات مرتب من الحكومة و البرايفيت (متقدمهاش غير لو اتطلبت)
.
8) 3 صور شخصية (ليهم مواصفات خاصة كده قول للستوديو اللي حتتصور فيه عاوز صور ألمانيا حيقرب منك الكاميرا أوي كده تطلع شبه القرد في الصور أصلا)
.
9) 690 جنيه
.
10) Motivation letter و ده تكتبوا بالانجليزي يا ريت على الكمبيوتر و تمضي في آخره تعرف نفسك الأول انك دكتور و كده و تكتب فيه بقى انك عاوز تروح تدرس لغة في ألمانيا و تتعرف على ثقافة الألمان و عاداتهم و أي كلام كده و بعد كده حتتضر ترجعمصر تاني (مهم جدا) عشان لنت حتكون واخد أجازة من الشغل و مينفعش تطول فيها أو عشان تكمل الماستر أو عشان متسبش ماما لوحدها كتير. أهم حاجة انك متبينش انك حتموت و تروح و مفيش مانع انك تكتب كلمتين كويسين عن المدينة اللي انت رايحها , يعني أنا اخترت المدينة دي عشان كده و أهم من كل ده انك تقول انك راجع تاني أم الدنيا.
.
— معلومة مهمة— متظيطش أوي و إنت بتكتبه عشان حتتسأل عليه كلمة كلمة هنا !
.
11) حساب مصري : لو مفيش فلوس في حسابك يا ريت تاخد من حد فلوس حتى تحطهم في حسابك و تطلع شهادة من البنك ان معاك أد كده (مش شهادة معاملات كاملة) و تسحبهم و ترجعهم لصحابهم أهم حاجة عشان ربنا يكرمك بلاش نصب …. من 30,000 ل 50,000 مثلا.
.
12) شهادة اللغة بتاعة جوتة ( انك امتحنت أو حضرت في جوتة)
.
13) تملى ال application ده بخط ايدك : حعمل للورقة uploadو تمضيه (كل حاجة نسختين محدش ينسى) و تمضي اسمك تحت
.
14) في ورقة تانية كدة فيها أسئلة انك معملتش جرايم قبل كده و مش في جماعة مسلحة. دي الموظفة حتدهالك هناك في السفارة تملاها
.
15) حاول يكون معاك ورقة تثبت انك حترجع زي أجازة من الشغل أو انك مسجل ماجيستير أو انك ابن وحيد
.
.
استحمل غلاسة الموظفين هناك معلش و قول انك عاوز تدرس لغة هناك عشان كل يوم و ان هنا أقصاه 3 أيام في جوتة و هناك حتتعلم أسرع و انك لازم ترجع عشان الكلام اللي انت كاتبه.
خليك عارف بس ان الموظف في السفارة مش بيحدد حاجة , هو بس بياخد ورقك يبعته ألمانيا و مفيش مانع انه يغلس عليك حبة. بس بردو خليك مبتسم و استحمل غلاسته. أهم حاجة متدهمش ورق غير ده و متفتحش على نفسك فتوحة, جاوب على أد السؤال
.
.
.
ورق تاني تخلصه قبل متيجي ان شاء الله(مش عشان فيزا اللغة, ده عشان أما تيجي تدور على شغل) :
.
– شهادة خبرة من المكان اللي انت بتشتغل فيه لو وزارة صحة
– فيش بعد ما تاخد الفيزا ان شاء الله و توثقه و بعدين توثقه خارجية
– شهادة ميلاد تطلعها من ستانلي و تدخل تختمها من الضابط و توثقها خارجية
– تأمين من أليانز بعد ما يجيلك الموافقة ان شاء الله على الفترة اللي انت قاعدها هنا ( لازم تكون معاك و انت بتديهم الباسبور عشان تاخد التأشيرة)
– شهادة حسن سير و سلوك من النقابة عربي و انجليزي ( دي تعملها أحسن بعد ماتاخد الفيزا ان شاء الله) ودي بتبقى من مقر النقابة الرئيسي في القاهرة في دار الحكمة

#معلومة هامة من فريق عمل موقع يفيدك : قد تختلف بعض المعلومات في المقالة من وقت لأخر حسب تغيير أحوال البلاد مثل القيم المادية المذكورة قد تزيد أو تقل لذلك انتبه لهذه النقطة.

قد تحب قراءة : 
ـ الدراسة في ألمانيا : الأسئلة العامة لمقابلة السفارة

ـ الدراسة في ألمانيا : المطلوب مني بعد الحصول علي الفيزا ؟ حاجات مهمة تاخدها معاك من مصر

ـ السفر لألمانيا : ماذا بعد الوصول لألمانيا ؟

ـ السفر لألمانيا : العمل في ألمانيا كطالب

ـ السفر لألمانيا : ما هو المطلوب حتى ادرس في ألمانيا ؟

ـ السفر لألمانيا : لو جواز السفر ضاع تعمل ايه ؟

ـ السفر لألمانيا : الحصول على قبول معهد لغة في ألمانيا ؟

ـ السفر لألمانيا : معلومات عن السنة التحضيرية Studienkollegs

ـ السفر لألمانيا : ما هي السنة التحضيرية ؟ 

ـ السفر لألمانيا : التحضير للإختبار تجربة شخصية حول طريقة إجتيازه 

ـ السفر لألمانيا : دراسة الماجستير والدكتوراه في الجامعات الألمانية

ـ السفر لألمانيا : كيفية الحصول على قبول بنفسك

ـ السفر لألمانيا : أسباب الرفض في الجامعات الألمانية

ـ السفر لألمانيا : فتح حساب مغلق في دويتش بنك

ـ السفر لألمانيا : البطاقة الزرقاء ” اقامة للعمل”


ـ السفر لألمانيا : تجربة فيزا البحث عن العمل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *