أسطورة وحش الـ Creativity والحكايات Writer Block

أسطورة وحش الـ Creativity والحكايات  Writer Block

أسطورة وحش الـ Creativity والحكايات  Writer Block

موجة من التوهان وإنقطاع الالهام بالأيام ، صفحة بيضة في كل مكان!
الاسطورة بتقول إن “الوحش ممكن يهاجمك في أي وقت منين ماتروح ، وانت كـ Content Creator لو مكنش عندك أسلحتك اللي هتحارب بيها الوحش ده هتتهزم وهتقوم بصعوبة كبيرة” واحنا يهمنا إنك تكون مبدع في كل حالاتك.
أكيد عرفت بنتكلم عن إيه ، معقول الـ Writer Block يرجعلي من تاااني!
لما يكون وحش الـ Writer Block قدامنا وشبح الديدلاين بيجري ورانا يبقى كل المقاسي طلعت مقاسي..
أسطورة وحش الـ Creativity والحكايات  Writer Block

يمكن الأهم من حل المشكلة هو معرفة المشكلة نفسها ، فكر بزاوية مختلفة..
ممكن يكون السبب إنك بتسيب الكتابة لأخر وقت وتضغط على عقلك إنه يخلص في وقت ضيق جدا فالأفكار بتهرب منك
لو انت ملك التسويف يبقى انت أكيد وقعت في الفخ
بتخدع عقلك بإن مش هو ده الوقت المناسب للكتابة وإنك لازم تدخل في مود معين عشان تستلهم أفكارك
بتدور إن كل حاجة حواليك تكون Perfect
أو تكون مريت بمشكلة في حياتك فعلًا سيطرت على مودك
أسطورة وحش الـ Creativity والحكايات  Writer Block

قولتلي هنحطم الإسطورة إزاي؟

في مفاوضات عديدة بينا وبين الوحش قدرنا نعمل معاه معاهدة سلام ، خطوات بسيطة وسهلة لكنها بتفرق جدا في النتيجة اللي هتوصلها.

•الحصالة ديه فيها إيه!

أكتر حاجة الإنسان بيمارسها في يومه هو الكلام ، سواء كلام بيقوله ، بيسمعه حواليه ، أو بيقرأه في مكان..
طاب هو احنا هنسيب الكلام يمر مرور الكرام!

طول ما انت ماشي خلي في دماغك فلتر ، عود دماغك تعمل Stop للكلمات المختلفة عنها ، للجمل اللي وقعها على السمع زي المزيكا ، للـ Trends الموجودة
جمع كل ده في Sheet Word أو Notes وكل مرة قبل ماتبدأ تكتب أرجعلها وحاول تربط الكلام ببعضه وتعمل بينهم ميكس ، ماتسيبش الفكرة تموت عندك.
أسطورة وحش الـ Creativity والحكايات  Writer Block

•إفهم نفسك

لما تفهم نفسك كويس وتكون عارف إمتى بتكون حزين بجد ، إمتى يكون ملكش مزاجك بتهرب إزاي من شغلك بالتسويف هتعرف تلاقي حل لكل مشكلة.

•الإبداع بيبدأ من هنا!

القراءة هي سلاحك المتين ، من غير ماتكون بتقرأ في كل حاجة وأي حاجة تيجي قدامك ، مش هتعرف تكتب..
لما تقرأ في مجالات مختلفة تمامًا هيكون عندك قدرة على مزج أفكار مختلفة وتلاقي خزان أفكار إنفتح في وشك.

د.أحمد خالد توفيق قال ” لا أحد يكتب من فراغ ، ولا أحد يستلهم أفكاره وهو جالس يتأمل فووق جبال الهيمالايا ، إن وجداننا الجمعي وعقلنا الباطل محشو بما قرأناه أو عرفناه من قبل.. فقط نضيف لهذا موهبتنا ورؤيتنا الشخصية “.
•فرغ زحمة افكارك
ورقة وقلم وعيش يامعلم اكتب اي حاجة تيجي في بالك أي كلام مالوش علاقة ببعضه ، مواقف قديمة ، حاجة حصلتلك النهارده ، حديث دار قدامك ، تجربة بتمر بيها ، ماتعملش كنترول على اللي بتكتبه.

•أخرج بره الـ Mood

حاول تفصل شوية ، إعمل أي حاجة مجنونة تظبطلك مودك وتخرج معاها كل طاقتك السلبية.

•ضروري يكون ليك صلة بالعالم حواليك
تتعرف على ثقفات مختلفة ، شخصيات ملهمة ، قصص نجاح..
الافلام والروايات ممكن يعملولك الميكس ده وانت في مكانك.
أسطورة وحش الـ Creativity والحكايات  Writer Block

•روتين كل يوم

مش كل حد بيكتب حلو وصل لده عشان هو موهبة محصلتش! ، لكن ده بيجي لما الكتابة تكون جزء من يومك ، كل يوم بتكتب فيه بتفتح لنفسك باب جديد ، يبقى لازم نخلي الروتين ده ممتع ومريح..

في حاجات كتير بتكون قبل الكتابة أهم من الكتابة ذات نفسها ، زي المكان والوقت والوضع اللي بتكتب فيهم مهم إنهم يكونوا مريحين بالنسبة ليك عشان تفصل من أي حاجة وتندمج في الكتابة وبس.
بإختصار كده لو بصينا للـ Writer Block من زاوية تانية هتلاقيه إنه فترة إستراحة عشان ترجع أقوى من الأول ، فلما يجيلك ماتترددش أبدًا إنك تشد الفيشة وتفصل شوية من كل حاجة ، مش يمكن ديه الطريقة اللي تجيبلك الـ Creativity في شوال!
مستني إيه ، مش هتكتبلي حاجة بقى؟..
إحكيلنا عن ليالي الـ Writer Block الحزينة في حياتك وقولنا إتعاملت معاها إزاي في الوقت ده؟
المصدر: Adel Shoaib

أضف تعليق