ازاي اجيب افكار للمحتوي التسوقي بتاعي(2)

سوف نتناول اليوم فى موقعكم المفضل يفيدك عن ازاي اجيب افكار للمحتوي التسوقي تكون مميزة(2) نتمنى أن تلقى اعجابكم بأذن الله




شوية الأفكار اللي جاية ده هيا أكتر الأفكار اللي بعملها والمحببه لقلبي.😻



١٦) ادخل الحمام!

أنا عن نفسي فيه أفكار كتيرة بتجيلي وأنا باخد دش!

بسبب إني بكون ف حالة استرخاء ذهني وجسدي،ومش حاطط حاجة ف دماغي.

فالأفكار بتجيلي لا إراديا كده.

وبتبقا فعلا أفكار حلوة!

بس حاول انت تسرح بخيالك.

وتفكر ف البيزنس اللي انت ماسكه،وابقا ادعيلي!😃

و بعد كده لما المدير يسألك ع أفكار،قوله:

(اديني خمس دقايق أدخل الحمام وارجعلك).😹



١٧) اختار التوقيت الصح اللي تكتب فيه. التوقيت اللي يكون ذهنك فيه صافي،حالتك المزاجية عال العال،مستكنيص،منشكح،فرفوش،بتضحك،وآخر ألاجا.😍



١٨) اقرا الحاجات الجميلة الناجحة اللي كتبتها قبل كده،حتا لو كانت من سنة ٤ هجريا😃،واقرا تعليقات الناس عليها؛هتتشحن طاقة ⚡إيجابية،وهتبدأ تحط القلم ع الورقة من تاني.



١٩) شوف المجال/الموضوع اللي انت بتكتب فيه، واقعد اتفرج ع صور تخص المجال/الموضوع.هتلاقي أفكار كتيرة نطت ف راسك، وكشافات استاد القاهرة الدولي نورت فوق شعراياتك الجميلة.

-ادخل ع (pintrest) و ادعيلي. 😃



٢٠) حط كل الأفكار اللي بتجيلك ع التايم لاين/ف حياتك عموما ع برنامج (keep) بتاع جوجل أو برنامج (pocket) هتحتاجها بعدين صدقني.

والبرنامجين دول هيكونوا أساسيين ف شغلك.😃



٢١) اقفل اللاب/الموب خالص،و غمض عنيك،وخد نفس عميق،واسرح بخيالك.



٢٢) متبدأش أبدا بمقدمة البوست/المقال/أيا كان المحتوي.

سيب العنوان والمقدمة للآخر!

وابدأ اكتب ال (body) أو القلب/المتن الأساسي بتاع المحتوي.

وبعد كده ارجع اكتب المقدمة والعنوان اللي يشدوا اللي هيقرا.

لما تكتب المحتوي كله هيديك أفكار حلوة بعد كده لكتابة العنوان والمقدمة وهتخليك تكتب مقدمة أو عنوان ميكونش (spam) أو مزيف أو مضلل للي بيقرا.

وهيخليك تكتب بقلب جامد وكلك ثقة من العنوان والمحتوي اللي انت كاتبه.

(فيه ناس كتير هتختلف معايا ف الحتة ده أنا عارف).😃



٢٣) قبل ما تيجي تكتب عن حاجه تفحصها وتأملها أوي؛ عشان تديك أفكار تانية،وتحس بكل تفصيله فيها.

يعني لو بتكتب مثلا عن سقوط الشعر،

تأمل كويس ف الشعره وكأنها بتسقط من فوق جبل عالي (الشخص المصاب) وانت بتنظر ليها بحيره ومش قادر تنقذها.

او

وانت بتكتب بسرعة تتخيل القلم كأنه سونيك وهكذا…

(الحاجات ده بتقوي قدرتك التخيلية جدااااا،وهتخليك تكتب بوجهة نظر، وزوايا مختلفة).



٢٤) معظم الأفكار الحلوة بتبدأ من سؤال (هيحصل إيه لو؟!)

ف دايما اسأل السؤال ده لنفسك؛عشان تجيب فكرة للمحتوي.

و كمان وانت بتكتب المحتوي نفسه،اسأل نفسك السؤال ده؛عشان تجيب أفكار للمحتوي بتاع المحتوي ذاته.😃




٢٥) صلي ع الرسول و استغفر ربنا؛بتتحل بيهم كل العقد و جمود التفكير (طريقة مجربة).😃



٢٦) تابع التريندات من:

-جوجول تريندس.

-جروب (تريند).

-قناة اليوتيوب (تريندينج) BBC.

-موقع راءج: هتلاقي فيه اكتر مقالات والفيديوهات شهرة ع السوشيال ميديا.



٢٧) اعمل تمارين عقليه او جسدية قبل ما تبتدي تكتب.

حاول تقوم بشوية ضغط أو تمارين إطالة أو تجري ف مكانك.

بحيث إن الدم والأكسجين يوصلوا لدماغك بكمية كبيرة،وعقلك يبقا ف قمة نشاطه واستيعابه.

وبالنسبة للتمارين العقلية،

برنامج (math tricks) ممكن يقوم بالمهمة ده بكفاءة باتمان.😃



٢٨) شوف المواقع الاجنبية اللي بتهتم بنفس المجال اللي انت فيه.

Google it!

بالعربي وبالإنجليزي وعيييش!😃



٢٩) اقعد كرر الكلمة ده كذا مرة

انا مبدع

انا مبدع

انا مبدع.

البقاء ف مجالنا،بقا للأكثر إبداعا.

وانت قد التحدي!😃

وخلي عندك تفاءل بحجم جبل أحد!😃



٣٠) ابعد عن أي حاجه مزعجة ممكن تشتتك ف المكان اللي انت قاعد فيه:

-ناموس الأوضة.

-فرح (الكراش) اللي عاملينه تحت البلكونة.

-عياط ولاد أختك الصغيرين اللي مسمع لحد الدور ال ١٢،ومطلع عين (مدام سهير) جارتكوا الجديده.

-زعيق (عمرو أديب)،اللي بيخرم طبلة الودان.😏

-صوت غنا (عماد صاحبك) اللي عامل إزعاج لحيطان ال (offices) بتاعة الشركة كلها.

وغيرهم

وغيرهم

كتيييييير…….اسألني أنا.😁



٣١) اكتب ع جوجل الكلمة المتعلقة بالمجال او الموضوع،وهو هيكملك الباقي.

وشوف الافكار اللي هتطلعلك ف ال (suggestions).



٣٢) فيه مقولة كانت بتقول:

(إن الانسان مبيفكرش الا لما بيضطر يفكر!)

وده طبعا غلط!

طول ماانت محطوط تحت ضغط،عمرك ما هتعرف تفكر ف فكرة.

ولو فكرت مش هتكون فكرة حلوة أو أحسن حاجة.

عشان كده!

حاول دايما فكرة المحتوي الجاية تكون مفكر فيها وانت بتعمل الفكرة بتاعة دلوقتي.

يعني فكر ف الفكرة اللي بعد كده وانت بتعمل الفكرة الحالية.

متستناش لحد ما  معاد عمل الفكرة يرزع الباب ويدخل عليك وانت لسه نايم.😁



٣٣) متستهونش خالص بأي فكرة تجيلك.

المهم تكون (related) بالمجال اللي بتكتب فيه و (related) للجمهور المستهدف،ويكون حابب إنه يتفاعل معاها.

من الأخر مفيش (no men land) أو منطقة محرمة أو ممنوع الكلام فيها.🚫

طالما حاسس إن (الأودينس) ممكن يتفاعلوا معاها خلاص.

نزل المحتوي وجرب وشوف رد الفعل هيبقا عامل ازاي؟!😃

ودايما توقع الغير متوقع.😃

شغلانتنا ده هتفاجءك بحاجات كتيرة!



٣٤) ادخل المطبخ!

مش قصدي مطبخ البيت!

قصدي مطبخ المجال/الموضوع ع اللي انت بتكتب فيه.

يعني حط نفسك ف كل تفصيله خاصة بالمجال، وعيش جواها،وابدا فكر؛هتطلع أفكار بالهبل!

انا مفهمتش حاجة والله!

ايه ده زيي يعني!

طب تعالي نقول مثال كده!

انا مثلا من فترة كنت بكتب مقالات/بوستات عن الماركتينج عموما،بطبق فيها اللي اتعلمته ف مجال كتابة المحتوي والتسويق.

ف جاتلي فكرة بعد ما عملت المقالات ده.

إني انزل بوستات اشرح فيه كل كلمة،وكل سطر، وكل تريكاية عملتها ف المقال عملتها ليه بناءا ع اللي اتعلمته ف علم صناعة المحتوي/اللي قريته ف التسويق.

ف انا عشان جوه المطبخ،وعايش الحالة،فبشوف كل حاجة ف حياتي عبارة عن تسويق ومحتوي.

زي ما تقول كده بيحصل بينكوا عملية (identification).

ف بتجيلي الافكار من غير ما اتعب نفسي.

وصلك قصدي!؟ 😃



٣٥) اسال الناس اللي عندك ف الشركة عن محتوي، وشوف كل واحد بيعمل ايه،يمكن تجيلك فكرة.

مثااااال:

انا لو شغال ف شركة تسويق

ممكن اروح لصاحبي(هيثم/طارق)

ودول شغالين ف ال (seo) مثلا

ممكن ابدأ اعمل محتوي عن ال (seo)،وازاي بنتعامل مع العميل اول ما يجيلنا/البريف/…إلخ.



لو شغال مع مطعم

ممكن اروح لصديقي( اشرف)  اللي بيعمل احلي بيتزا عندنا.

واخده كده ف كلمتين ع جمب!

واخد منه سر الصنعة!

واعرف هو ازاي بيعمل البيتزا العسل ده -ابن اللذينة-!

واصورة وهو ماسكها مع خلفية جميله،وبرامج التعديل والتركيب اللذيذة.

خد عندك مثلا برنامج زي:

PicsArt

Color splash

Pixlr

Light x

mix

Snapseed

PhotoGrid

Lightroom

GoArt

Vimage

Pixaloop

Pixamotion

Vllo

Vmix



 واكتب محتوي عن:(الخلطة السرية للبيتزا الشقية)(هيدلاين مجازي).😂



٣٦) حمل برنامج (flipboard)



هتدخل!



هتكتب كل أسماء المواقع اللي خاصة بالشوشيال ميديا/الماركتينج/ المواقع المتخصصة ف المجال اللي بتكتب فيه/أي موقع…



أو تكتب أي مجال انت عايز تتابع الأخبار بتاعته زي (التكنولوجيا) مثلا.



وكل يوم تدخل ع البرنامج وتتابع كل الأخبار اللي جاية من المواقع والمجالات ده!



وبكده تديك إلهام لمواضيع وأفكار للمحتوي،

وتبقا (updated) بكل اللي بيحصل ف المجالات اللي كتبتها،وبكده تعرف تكتب بدل قطعة محتوي 1000.



البرنامج فوق الممتاز.

نزله ومش هتندم!😻



١) (آخر طريقة)وده من أفضل الطرق بالنسبالي ويمكن عشان كده خلتها للأخر وبدأت من رقم (٢) ع طول😃:

اتفرج ع كام حلقة للدحيح😻

-انا عن نفسي اتفرجت ع كذا حلقة وانا بعمل المقال الصغير ده جتلي بتاع ٤: ٥ أفكار استخدمتهم ف كتابة المحتوي ده.😁

-اتفرج عموما ع ناس بتعمل محتوي حلو هتديك افكار حلوه وطرق للكتابة وانت بتكتب.

-الفرجه ع الناس الحلوة،بتجيب أفكار فوق الحلوة.😃



وع سيرة الناس اللي بتعمل محتوي حلو هرشحلكوا شوية:

١) الدحيح(ع رأس القايمة)

٢) جو شو.    ٣) أحمد البحيري.      ٤) عبد الله الشريف.          ٤) السليط الإخباري. (متبصش ع ايدولوجية المحتوي لو انت مختلف معاهم سياسيا).



عايزك تبص وتشوف:

-طريقة عرض المحتوي والكلام.

 -المقدمات بتاعة الحلقات.

 -الجزء ال(funny/ال entertainment).

-ال CTAازاي بيصيغوها،ويقولوها بكل حرفنه.

-وغيرها حاجات كتير أوي هتتعلمها لما تتابع المحتوي بتاعهم.

٥) الاسبتالية.        ٦) تقارير القنوات الإخبارية عموما (لو بتكتب محتوي بالفصحي).

ركز ع الخطوات ده وإن شاء الله هتتبسط جدا بالنتايج.😉



بعد ما تعمل كده  هتلاقي ان شاء الله هتلاقي (جوجل أفكار).(١٠  أس ١٠٠).😃



 لكن لو بعد كل ده  ملقتش برده أفكار، يبقا انت فيه حد عاملك (عمل سفلي)،و نصيحة مني سيبك من الشغلانة اللي تقصر العمر ده،وروح خدلك كورس ديزاين ف المركز الثقافي الروسي.😂

بهزر معاك طبعا،

انت كويس يا ابني،

أزمة وهتاخدلها شوية وهتعدي ،وهتتستر(ع رأي واحد صاحبي ف الجيش).😄

وخليك عارف إن جوه كل (content creator) مننا (روكي صغير) بيطلع قبل ما مالطا ما تخرب.



فمتكبرش الموضوع،

هو مين فينا مش موجوع.😂



وخلي ف بالك برده!

إن اللي كتب كل الافكار ده،

 ف يوم من الايام مكنش عارف يجمع فكرة بوست واحد.😃



ف اعمل بقا شير للبوست عشان تفك ضيقة أخوك ال (content creator) اللي قاعد ف المكتب، ومحبط من قلة الأفكار،وخايف لمديره يطرده وتديله أمل وأفكار.😃



بس لو صاحبك (بودي جارد) ف نفسه،وصحته كويسة وجايباه؛فمش لازم أوي تشير المقال عشان يشوفه.

هو كده كده مديره مش هيجيله ع سكه😹😹😹.



شاركنا كده بأحسن طريقة ليك بتجيب بيها أفكار،وبتفك بيها عقدة ال (blocking)؛عشان كلنا نستفيد منك! 😃



ولو عندك أي سؤال انا مستنيك تحت ف التعليقات.👌😃



المصدر:ماركتينج ع السريع

أضف تعليق