اسباب نقص المناعة عند الطفل وادوية رفع المناعة للطفل

اسباب نقص المناعة عند الطفل وادوية رفع المناعة للطفل

اسباب نقص المناعة عند الطفل وادوية رفع المناعة للطفل

 

🔹انا ابني البرد مبيروحش من عنده
🔹انا ابني بيجيله لوز بمعدل مرتين في الدقيقة
🔹انا ابني مبيخفش الا بمضاد حيوي.. و علي شرط.. حقن مش شرب
◀ مبدئيا كده احنا عندنا خلط رهيب في موضوع نقص المناعة ده .. خلط و نقص معلومات و عجن بلدي و كل اللي عاوز تقوله قوله

◀ نقص المناعة بعيد كل البعد عن كل ده .. بريء من كل هذه الاتهامات

◀ ابنك اللي مناخيره علي طول سايبه مش معناها ان مناعته ضعيفة .. و ابنك اللي بيجيله كحة و برد كل شهر مناعته مش ضعيفة

اسباب نقص المناعة عند الطفل وادوية رفع المناعة للطفل


امال مناعة ضعيفة يعني ايه ؟

مناعة ضعيفة يعني اشارة حمرا ⛔ .. يعني علامة خطر 🚫  يعني جرس إنذار 🔕 .. يعني ركز معايا  .. يعني تشك فيها لو لقيت حاجة من الحاجات دي

1- الطفل جاله مرة او اكتر عدوي بكتيرية شديدة وصلت لحد التسمم الدموي .. يعني بكتيريا في الدم .. اوالتهاب سحائي

2- مرتين او اكتر التهاب خلوي شديد في الجلد او مرتين  التهابات شديدة في الجهاز التنفسي خلال سنة .. التهاب رئوي مثلا او التهاب صديدي في الاذن الوسطي

3- عدوي شديدة في مكان غير مألوف .. زي خراج في الكبد او في المخ !!

اسباب نقص المناعة عند الطفل وادوية رفع المناعة للطفل


4- عدوي شديدة بميكروب مش معتاد .. في ميكروبات مشهورة .. بتيجي لاي حد .. لكن في ميكروبات تانية مشهورة قوي في نقص المناعة .. بتحب قوي الناس دي .. لازم اشك في نقص المناعة عند الطفل لو اكتشفت عنده الميكروب ده .. زي ميكروب اسمه Aspergillus

5- عدوي شديدة من ميكروب تافه او مشهور .. يعني الميكروب ده ميبهدلش الدنيا كده الا لو المناعة ضايعة .. لكن لو انسان عادي ممكن ميحسش بالميكروب ده اساسا او يجيله في صورة دور تعب عادي

6- الطفل وصل بيه الحال انه احتاج مضاد حيوي وريدي عشان يخف من دور تعب غيره بيخف منه بمضاد حيوي بيتاخد بالفم !!

7- الطفل مبيكبرش !! مبيزدش في الوزن !! خصوصا لو معاه اسهال مزمن .. صحيح في اكتر من سبب مشهور للحالة دي .. لكن حط معاهم و انت بتفكر نقص المناعة.. عشان لو مفكرتش فيها مش هتشخصها

اسباب نقص المناعة عند الطفل وادوية رفع المناعة للطفل


8- نيجي بقي لادوار التعب المتكررة .. اللي هنقوله ده هو المهم و الخطر .. يعني متقوليش ابني بيجيله برد كل يومين .. لا .. اللي تخاف منه مثلا التهابات الاذن المتكررة .. اكتر من 8 مرات في السنة !! او التهابات شديدة في الجيوب الانفية اكتر من مرتين في السنة !!

9- الطفل اتشخص صح على انه التهاب بكتيري .. و خد مضاد حيوي مناسب .. لكن العلاج طول .. الواد بياخد مضاد حيوي بقاله شهرين و مخفش !!

اي حاجة من دول لازم تشك في نقص المناعة .. اللي اسبابها كتير و تفصيلاتها اكتر .. و الكلام عنها مناسب اكتر للاطباء .. لكن اللي فوق ده ينفع للاهل جدا 🙌

بس ناخد بالنا من حاجة .. ان اللي يحكم على كل اللي فوق ده .. دكتور متخصص .. يعني عشان اقول التهاب في الاذن الوسطي او التهاب في الجيوب الانفية .. مينفعش يبقي الصيدلي اللي كاشف ع الواد .. و تحسبها علينا مرة .. لا يبقي دكتور اطفال كويس او دكتور انف و اذن شاطر

اسباب نقص المناعة عند الطفل وادوية رفع المناعة للطفل


زي اللوز كده .. الواد مبيبقاش كمل 3 سنين … و الام تيجي تقولي ده بيجيله لوز كل شهر او كل شهرين !! هو كل دور سخونية يبقي لوز ؟ و مين كشف عليه ؟ .. مع احترامنا لاخواتنا الصيادلة .. بس دي مش شغلتكم .. انت لما الام تجيلك و كل مرة تقولها لوز يبقي اللوز دي لازم تتشال .. لوز اكتر من 6 مرات في السنة يبقي اشيلها 🙅

بس مين قال انها لوز اصلا ؟ ده 90 في المية بيبقي دور برد عادي .. و 9 و نص في المية التهاب عادي في الحلق .. و نص في المية بيبقي لوز حلوة كده و عليها شوية صديد كويسين و اللوز بتبوس بعضها في زور الواد..مش كل سخونية تلبسها للوز .. ارحموا العيال 😓

نيجي لنقطة مهمة تانية

ادوية المناعة!!

اسباب نقص المناعة عند الطفل وادوية رفع المناعة للطفل

ما تكتبلنا حاجة يا دكتور تزود المناعة شوية..  الواد مبيخفش من البرد
مفيش حاجة اسمها كده
في حاجة اسمها علاج السبب..  ابنك ممكن يكون عنده انيميا..  عشان كده نفسه كارهة الاكل.. لما ياخذ علاج الانيميا و ليكن الحديد مثلا..  الانيميا هتتحسن و شهيته هتتحسن..  هنا الحديد قام بشغل فاتح الشهية!!
ابنك عنده ديدان..  وعاملاله الم في البطن و ساعات انيميا.. مبيرضاش ياكل..  لما ياخد الشربة و نعالج الديدان حالته تتحسن..  هنا الشربة قامت بدور فاتح الشهية..
يبقي مفيش حاجة اسمها ازازة دوا لفتح الشهية..  في حاجة اسمها الواد مبياكلش ليه و ندور ع السبب و نعالجه..  ما يمكن انتي اللي بتعمليله اكل مبيحبهوش..  مبتنوعيش في الاكل..  في مليون سبب لقلة الشهية

خرجنا عن الموضوع شوية..  بس هي نفس الفكرة..  ابنك ممكن يكون بيتعب كتير عشان بيتعرض لناس تعبانة كتير..  بتوديه حضانه عيالها كلها عيانة..  و لا في تهوية و لا شمس و لا في حاجة خالص..  و الواد مناعته حلوة..  بس هتلاحق علي ايه ولا ايه؟ هيخف من البرد ازاي و هو كل ما يرجع الحضانه يتعدي من الواد اللي جنبه؟

امال ايه حكاية ادوية المناعة دي؟
دي حاجات طبيعية في صورة ادوية لقوا بعض الادلة علي انها بتساعد في رفع كفاءة الجهاز المناعي بشكل عام


زي ايه؟

1-Bovine Colostrum
اللي هو السرسوب.. و ده مليان اجسام مضادة مفيدة للمناعة.. و استخدامه الاكبر لرفع كفاءة الجهاز الهضمي
في السوق في دوا اسمه اميوجارد Immugaurd
عبارة عن اكياس بتتدوب في مياة..  و ممكن تتاخد من 6 شهور.

2-Omega 3
الاوميجا 3.. نوع من الاحماض الدهنية الموجودة في بعض الأسماك و المكسرات.. مفيد جدا و فوايده لا حصر لها
في السوق في منتجات كتير زي اوميجا فيت OmegaFit
و دي اكياس بتتدوب في مية او عصير

3-Bacterial lysate
 و ده عبارة عن بكتيريا مجفدة.. تم اثبات فاعليتها في رفع مناعة الجهاز التنفسي.. ممتازة جدا جدا و انصح بيها
في السوق عبارة عن اكياس اسمها برونكوفاكسوم Broncho-Vaxom
الجرعه : كيس على نص كوباية مية مرة فاليوم اول ١٠ ايام من كل شهر لمدة ٣ شهور ..  و نكررها كل سنة في نفس الميعاد

4-Lactobacillus
بكتريا حمض اللبن… دي بكتيريا نافعه موجودة في الجهاز الهضمي و بتساعد في القضاء علي الميكروبات الضارة
في السوق اسمها لاكتيول فورت Lacteol Forte
منها اكياس و كبسولات..  بتدوب في مية

5- Echinacea
الاكنيشيا..  و ده عشب طبيعي يقال انه بيحفز الجهاز المناعي خصوصا التنفسي
 في السوق في منها نقط اسمها immunvita

6-Nigella Sativa
حبة البركة.. و دي اغلبنا يعرفها
في السوق في دوا اسمه Immulant فيه حبة البركة و اكنيشيا مع بعض
 المصدر: Dr.Ashraf kasem د.أشرف قاسم

أضف تعليق