الخيال عند الطفل هل ده سلوك فطري ام سلوك مكتسب

الخيال عند الطفل هل ده سلوك فطري ام سلوك مكتسب 

الخيال عند الطفل هل ده سلوك فطري ام سلوك مكتسب


✅الخيال عند الطفل ده سلوك فطري ماينفعش نحاول نخلي الطفل يبطله و نشتكي منه و ندور له على علاج
✅بالعكس سعة خيال الطفل دي موهبة و ظاهرة صحية بتخلي الطفل يقدر يتخيل مشاعر الآخرين و ينفعل و يتعاطف معاهم  يحس بالغير و يساعدهم
✅سعة الخيال بتعكس حجم المفردات و المعلومات اللي الطفل اكتسبها  و طلاقة لسانه و مستوى ذكائه
⭕️⭕️⭕️
✅سعة الخيال لازم ننميها في الاتجاه الصح
💡بأننا نقرأ مع الطفل كتب مصورة و نتفرج على وثائقيات عن الكون و المخلوقات و نقلل مشاهدة الكارتون و القصص الخيالية الغير واقعية
💡نشجعه على الرسم و نسأله عن رسمته إيه ده و إيه ده
💡نلعب معاه بعرايس الكف أو بألعابه و نعمل بينها قصص و حوارات و نطلب منه المشاركة في اختيار نوع و أسماء و طبيعة الشخصيات
💡نعلمه ازاي يصنع عالمه الخيالي عشان يلعب لوحده و احنا نشوف اللي ورانا
💡نعلمه يعمل كذا صوت لكذا شخصية
يستخدم أي لعب للأدوار التخيلية كوبايات واطباق و علب فاضية بتمثل شخصيات
و مرة  استخدمنا مربعات و دواير و مثلثات المنتوسوري في لعبة حرب ( لو ماري منتوسوري شافتنا كانت اعتزلت ) عملنا مثلا  الأصفر جنود و الأزرق لصوص و المربعات حدود السجن و البيوت و هكذا

الخيال عند الطفل هل ده سلوك فطري ام سلوك مكتسب



✅سعة الخيال لو استغليناها هتفيدنا في تجاوز مشكلات شخصية الطفل زي العند الخوف الغضب البكاء
✅و هتفيدنا كمان في تعليم الطفل و تعزيز أي صفة حلوة و غرز أي خلق فيهم
✅و هتفيدنا في تعليمه ازاي يتصرف في المواقف المختلفة و ازاي يحل مشكلاته 
💡عمر  بقى  قط جميل و  هيروح يعمل كذا
💡منى أم العرايس هتاكل و توري بناتها أمهم الجميلة اللي بتطيع مامتها
💡الدكتور مازن شجاع و هياخد الدوا من غير ما يتعب ماما و لا يتفه صح؟؟
💡فاطمة هو عرايسك ممكن يعملوا كذا و يزعلوكي ؟ لا يا ماما . 
💡القط تاه من أمه و كانوا متفقين لو تاهوا هيروح عند الشجرة دي وينادى على أمه بصوت عالي 
💡الحقي يا زينب بناتك بيقولوا مين اللي بتعيط دي    لا لا يا بنات مامتكم جميلة مش هتعيط
و هكذا
⭕️⭕️⭕️
✅الخيال الصحي للأطفال بيدور حوالين
🍁أحلامه و أمنياته و رغباته و كل ماهو محروم منه
مخاوفه و هواجسه
🍁انفاذ غضبه و انتقامه من اللي ماقدرش في الحقيقة عليه
🍁مواقف نجح او فشل فيها بيعيد صياغتها 
🍁قصص حقيقية سمعها أو كارتون شافه
🍁شخصيات حقيقية كالوالدين و كالمعلم و الطبيب و الضابط أو شخصيات كارتونية
⭕️⭕️⭕️
✅الخيال بحدود محمود
🍁كل ماهو هنالك لو الخيال زاد يبقى لازم نوجه الطفل  عشان نرجعه للمسار الطبيعي
🍁فالخيال المدمر للذات أو الممتلكات لازم يتقوم يعني لو متخيل نفسه قرد و تسلق الدولاب ولا سوبر مان و هيطير من فوق الدولاب للأرض أو للسرير فاما يتكسر أو يكسر

الخيال عند الطفل هل ده سلوك فطري ام سلوك مكتسب

✅أما بقى الخيال لو الطفل استغرق فيه و قلب معاه بأحلام اليقظة أو تعدى الكذب الطفولي الخيالي لكذب صريح فهنا لازم وقفة
⭕️⭕️⭕️
✅ الطفل لحد ٥-٦ سنوات بيخلط بين الخيال الغير منطقي ( قطة طائرة- كلت عشر اطباق )و الكذب الخيالي ( العروسة هي اللي قطعت كتاب اختي و هي اللي بهدلت الحجرة ) و الحقيقة
✅إذا اقترن ده مع عدم دقة الأوصاف و إدراك الأعداد و الأشكال و عدم تذكر تفاصيل الحدث لما يحب الطفل يحكي عنه فلازم نستوعب كآباء طبيعة المرحلة و نتعامل بحكمة
⭕️⭕️⭕️
✅من بداية ما يبتدي يتخيل
💡ما نقاطعوش و لا نسخر منه و بعد ما يخلص نقول له حلوة قصتك دي
بس أنت عارف أن القطة مش بتطير و لا الحصان بيتكلم  صح  بس أنا بحب قصصك جدا
💡ده هيخليه واعي و مع الوقت يفرق بين الحقيقة و الخيال
💡و فنفس الوقت هتوصله رسالة أنكم بتعرفوا تفرقوا بين الحقيقة و الخيال و يخليه يعمل ٢-٣ حسابات أنه يكذب
❌أنا ضد التربية الحديثة اللي بتقول ما نبينش للطفل أننا مش مصدقينه و ما نصرش عليه أن ده خيال و البلا بلا بلا ده
❌لأن فيه أطفال خيالهم مدمر بيبقوا ٣-٤ سنين و بيتخيلوا حكايات تخرب علاقات بين الأم و أهل الزوج و بين الأم و الأب كمان
❌فازاي يعني ما نعرفهمش أن ده ماحصلش و غلط يتكرر
❌حتى لو الأهل متفهمين أن ده خيال ما ينفعش نضحك و نكرر منه و نسايرهم عشان فعلا بيبقوا ظراف و لذاذ
💡 الوضع ده عاوز تكاتف الأسرة كلها في المواجهة و العلاج و توحيد المنهج
⭕️⭕️⭕️
✅ أني أعرف الطفل أن ده خيال و حكاية ظريفة أو مش ظريفة  لحد ٥ -٦ سنين بيبقى ماشي تمام و سهل على الطفل تقبله بدون معارضة
✅ بتظهر المشكلة من ٧ سنوات سن التمييز و ما فوق لما يبتدي يصر أنه حقيقة و يحلف كمان
💡 فمش لازم الصدام    ده الطفل في مرحلة التربية و كل مراحل التربية لازم تكون بالحكمة و الموعظة الحسنة و اللين قبل البلوغ أوجب منه في أي وقت
💡 نحاول نشجعه على قول الصدق
بأسلوب هادي خالي من الإرهاب و الوعيد نطلب توضيح على نقط محددة بشكل مفصل

الخيال عند الطفل هل ده سلوك فطري ام سلوك مكتسب



✅لو أمور تافهة هنتغاضى في الوقت الراهن
✅و لو أمور جوهرية لا يمكن التغاضي عنها
💡ممكن ننهي الحوار بلطف و حزم يمكن نسيت تفاصيل القصة يمكن ما كنتش واخد بالك 
💡 في الحالين هنظهر الضيق و عدم الموافقة بملامح وجهنا 
💡 و  نرجع لخلق الصدق و نعززه فيه و نلفت نظره لراحة الضمير و السعادة و الطمأنينة اللي بيجنيها الصادق مقابل التوتر و القلق و التعاسة اللي بيكون فيها الكاذب
⭕️⭕️⭕️
 ✅الوقاية عشان ما ندخلش في المرحلة دي و العلاج منها ب أننا بنغرز في الطفل
🍁🍁🍁الصدق و حب الصدق من أول ما يوعي للي حواليه
🍁و الأصل أننا قدوة صالحة لهم
أبسط مثال ماينفعش الطفل يشوف حد من أهله يرد على التليفون و يقول فلان نايم أو مشغول أو خرج  و هو مش كده 
أو يسمع شكاوي الأم من الأب أو العكس و يرجع يشوفهم بيتعاملوا بعكس الشكاوى

🍁🍁🍁 و  نغرز فيهم التحلي بالشجاعة الأدبية و المسئولية عن الأخطاء و شجاعة تحمل النتايج و الصبر على ألم تحمل النتيجة
🍁 نحكي امامهم مواقفنا كقدوة اللي تعزز ده فيهم يعني خدشنا عربية فتركنا رقم تليفوننا و اعتذار في ورقة و استعداد للتعويض
🍁ضيعنا شيء كنا مستلفينه مثلا فبنجيب بدل له مثله أو أحسن منه و نرجعه لصاحبه و نقول أمامهم لازم نتحمل بشجاعة نتيجة أفعالنا أو أقدارنا و مانتهربش
🍁لما كان حد من عيالي يكسر شيء خاص غصب عنن بينا كنت بسترجع و ماعنفوش عشان ما يكدبش
و لو كسر شيء مش ملكنا نفس الشيء مابعنفوش و بشجعه اننا هنسانده فهنروح نتأسف لعمو أو خالتو و هنجيب لها بدل اللي كسرناه ( و عمو وخالتو بقى و ضميرهم ياخدوه و لا لا 😃)
⭕️⭕️⭕️
✅لما نلاقي مصيبة مش لازم السؤال العبقري المباشر و الشرر يتطاير من العين و الزبد من الشدقين المثير للخيالات الكاذبة
أنت اللي عملت كده؟؟!!!
💡 نكظم الغيظ ياريت
و نقول ليه كده أنا زعلت اوعدني تبقى حريص أكتر من كده
ده لو واثقين من فعلته و مفيش غيره
💡 أما لو كذا ابن فمش بنتهم واحد فيهم حتى لو واثقين عشان ما نعلمهمش رمي الناس بالتهم جزافا
فهنقول أنا زعلان من اللي عمل كده
و نعرض عنهم غالبا هتلاقي اللي عمل جاي يعتذر
طالما واثق أنك مش هتبطش بيه


✅من أهم وسائل العلاج اننا لازم نفكر ليه بيكذب؟؟
هل بيعاني من نقص ما و بيدور على مزيد من الحب و المدح و الاهتمام أو لفت الانتباه
هل بيغير من أخواته هل فيه تمييز في معاملتكم لهم و لو متخيل من الطفل
هل خايف من عقاب له أو لغيره
هل خايف من سخرية اللي حواليه
هل مش منسجم مع الوسط اللي هو فيه ( أولاد الأقارب – اصحاب الحضانة )
هل عنده غرض ما في نفسه عاوز يوصل له بالكذب ده بيتمارض عشان يغيب من الحضانة مثلا
هل فيه طبع الأنانية
✅ إذا فيه سبب من دول فلازم يتعالج
⭕️⭕️⭕️
✅هنعزز خلق الصدق عند الطفل 
🍁🍁🍁 بالآيات
(يَا أَيُّهَا الَّذِينَ آمَنُوا اتَّقُوا اللَّهَ وَكُونُوا مَعَ الصَّادِقِينَ)
(لِّيَجْزِيَ اللَّهُ الصَّادِقِينَ بِصِدْقِهِمْ )
( وَالصَّادِقِينَ وَالصَّادِقَاتِ ……. أَعَدَّ اللَّهُ لَهُم مَّغْفِرَةً وَأَجْرًا عَظِيمًا )
(قَالَ اللَّهُ هَذَا يَوْمُ يَنْفَعُ الصَّادِقِينَ صِدْقُهُمْ لَهُمْ جَنَّاتٌ تَجْرِي مِنْ تَحْتِهَا الْأَنْهَارُ خَالِدِينَ فِيهَا أَبَدًا رَضِيَ اللَّهُ عَنْهُمْ وَرَضُوا عَنْهُ ذَلِكَ الْفَوْزُ الْعَظِيمُ)
(وَقُلْ رَبِّ أَدْخِلْنِي مُدْخَلَ صِدْقٍ وَأَخْرِجْنِي مُخْرَجَ صِدْقٍ وَاجْعَلْ لِي مِنْ لَدُنْكَ سُلْطَانًا نَصِيرًا)

🍁🍁🍁و الأحاديث
(إِنَّ الصِّدْقَ يَهْدِي إِلَى البِرِّ، وَإِنَّ البِرَّ يَهْدِي إِلَى الجَنَّةِ، وَإِنَّ الرَّجُلَ لَيَصْدُقُ حَتَّى يَكُونَ صِدِّيقًا. وَإِنَّ الكَذِبَ يَهْدِي إِلَى الفُجُورِ، وَإِنَّ الفُجُورَ يَهْدِي إِلَى النَّارِ، وَإِنَّ الرَّجُلَ لَيَكْذِبُ حَتَّى يُكْتَبَ عِنْدَ اللَّهِ كَذَّابًا.)
(آيَةُ المُنَافِقِ ثَلاَثٌ: إِذَا حَدَّثَ كَذَبَ، وَإِذَا وَعَدَ أَخْلَفَ، وَإِذَا اؤْتُمِنَ خَانَ.)

الخيال عند الطفل هل ده سلوك فطري ام سلوك مكتسب


🍁🍁🍁 و القصص
قصص صدق النبي محمد ‎ﷺ و الأنبياء
نجاة الثلاثة الذين خلفوا عن غزوة تبوك بصدقهم
⭕️⭕️⭕️
✅ فيه دراسة  قالت أن بعض الأطفال في عمر السنتين يقدروا يميزوا بين الحقيقة و الكذب في كلامهم و يقدروا يمارسوا الكذب الخيالي  و بوصول الأطفال لعمر ال ٤ سنوات ٩٠٪؜ منهم يقدروا يمارسوه
و ببلوغ ال ١٢ سنة ١٠٠٪؜  يقدروا يمارسوا الكذب نفسه
⭕️⭕️⭕️
✅ عموما لو استمر الكذب الخيالي لمرحلة التمييز ماقبل البلوغ ٧ سنوات و مافوق ممكن نضيف لإظهار الضيق على الوجه أننا نتجنبه شوية كده و ما نتكلمش معاه مع وجود شخص آخر يعلمه ليه مش بنرد عليه و يشجعه على تغيير الفعل ده
⭕️⭕️⭕️
✅و طبعا فترة الإعراض دي ممكن تبقى نص ساعة في السن الصغير و تطول مع الطفل الأكبر
ففي حديث عائشة رضي الله عنها قالت: “كان رسول ‎ﷺ  إذا اطَّلع على أحد من أهل بيته كذب كذبة، لم يزل مُعرضًا عنه حتى يحدث توبة”
✅و طبعا مش بعد ما يقول الصدق نعاقبه على كذبه كده عمره ما هيصدق تاني خلاص هو عقوبته كانت الإعراض
والله المستعان

المصدر:د.شيما مشرف

أضف تعليق