السفر لألمانيا : تجربة مهمة لصديق للسفر لألمانيا

تجربة مهمة لصديق للسفر لألمانيا

سوف نقدم لكم اليوم في موقعكم المفضل موقع يفيدك مقالة مميزة بعنوان السفر لألمانيا : تجربة مهمة لشخص في السفر لهناك مقدمه من الجروب المميز جروب المصريين في ألمانيا، هيا بنا لقراءة المقالة سويا . 

بسم الله الرحمن الرحيم
النهارده 282016 السفاره كلمتنى و جالى رد بالقبول الحمد لله لدراسه البكالريوس فى براندنبرج, بس كورس اللغه فى مدينه ايسن الاول.
هحكى كل حاجه بالتفصيل الممل عشان الناس اللى محتاجه حاجه تعرفها, فمعلش البوست طويل شويه لكن اللى عايز مقابله السفاره على طول ينزل هيلاقيها فى عنوان كده منفصله هى و الانترفيو
.
انا درست 3 سنين هندسه ميكاترونكس هنا فى العاشر و كنت مقيد فى رابعه هنا بس مكنتش بحضرها اوى عشان كنت باخد كورس الالمانى و بجهز نفسى لل B1 , يعني نقدر نقول بقالى 4 سنين فى هندسه العاشر 😀 .
بعد ال 3 سنين لقيت نفسى مش نافع هنا و هتأخر شويه و لسه عندي جيش يعني الموضوع بيضيع, قررت فى تالته انى اسافر ,انا كنت فرنساوي فى المدرسه, خدت كورس لغايه ليفل A1 فى Reach Out Academy, وبعدها خدت ال A2 كامل فى ال DFA , بعد مخلصته كان فاضل شهر على امتحان ال B1 فى جوته حسب المواعيد, وكان لازم اقدم عشان الحق اقدم فى الجامعتا و الحق الترم هناك فى المانيا , دخلت امتحان ال B1 و انا مخلص ال A2 بس, و جهزت للامتحان مع واحد اسمه اشرف, دخلت امتحان ال B1 فى 153 ونجحت في 3 اجزاء و جبت فى الليزن 57 يعني فرق سؤال عن النجاح فى الجزء ده, طلعلى شهاده بالنجاح فى ال 3 اجزاء و ورقه انى جايب 57 فى الليزن, زى الشهاده بس ورقه عاديه .
طلعت الشهاده قدمت فى 4 جامعات, قدمت فى ايسن بادربورن براندنبرج شتوتجارت
ايسن قالت عايزين ايلتس او اثبات ان دراستك كانت بالانجليزي ف الجامعه عشان هندسه ميكانيكا هناك نص انجلش و نص المانى, ورقه اثبات الدراسه من العاشر هنا دى خدت وقت و رد ايسن جه متأخر جدا عقبال مبعتلهم الورقه, جالى الرد من 3 اسابيع وانا مقدم فى شهر 4 .
بادربورن مردتش عليا لغايه دلوقتى.
شتوتجارت رفضتنى.
براندنبرج قبلتنى بعد 6 ايام الحمد لله. جهزت الحساب البنكى و قدمت بقبول جامعه براندنبرج, ودراسه لغه فى ايسن, “دراسه لغه فى ايسن عشان براندنبرج مدينه مفيهاش معاهد لغه كتير و الاسعار مكنتش كويسه بالنسبالى فى الكورسات هناك, قدمت فى Rheinland Privatschule على كورس B2 & C1 مكثف ب 780 يورو الاتنين و الدفع لازم الاتنين مع بعض”.

****** مقابله السفاره ******

مقابله السفاره كانت يوم 2662016 الساعه 10.15, حجزت الميعاد قبلها ب 4 ايام فى فودافون , قولتلهم ورقى جاهز و سفرى قرب و الكورس هيبدء و كده , ادونى ميعاد قريب يعني.
دخلت السفاره ب بالورق المطلوب كله, و المقابله كانت كالتالى من اول الموظفه اللى بره ع الشباك:

الموظفه خدت منى الورق كنت مدبسه بدبابيس مكتب عشان الترتيب و عشان محدش يفتح بوقه معايا
 خدت الورق و قالتلى ايه ده !
قولتلها ايه ده ! 😀
قالتلى انت اللى عامل الورق ده!
قولت ف سرى يادي النيله من اولها! , قولتلها ايوه انا اللى عمله
قالتلى دى حاجه نادره جدا لما بلاقى الورق منظم و مرتب كده! دى حاجه كويسه جدا.
كنت عايز ابوسها فى اللحظه دى 😀
قولتلها متشكر و ظبطط شويه حاجات فى الورق و دخلتني, رتبو الورق الخطوه دى حلوه بتدى ثقه بالنفس و انت داخل 😀 .
دخلت جوه سجلت اسمى فى شباك 6 اللى هو فى غرفه ازاز كده فى الوش, وفيه بنت رفيعه فيه هى اللى بتعمل الانترفيو,استنيت بعد مسجلت اسمى حوالى ساعه.

****** الانترفيو ******

الموظفه: صباح الخير
 صباح النور
الموظفه: سألتنى عن الاسم و البيانات و الكلام ده كله .
الموظفه: رايح المانيا ليه؟
دراسه
الموظفه: بدرس ايه؟
هندسه
الموظفه: ليه رايح المانيا بذات؟
شويه اسباب من ع النت الكل عارفها “المانيا متقدمه ودراسه ببلاش و مستوى المعيشه رخيص والكلام ده كله”
الموظفه: عرفت موضوع الدراسه من مين؟
من صحابى اللى سافرو و من النت
الموظفه: اسم صحابك ايه؟
قولتلها اى اسم 😀
الموظفه: معاك الماني؟
ايوه
الموظفه: ليفل كام؟
معايا B1
الموظفه: بتدرس المانى بقالك قد ايه؟
بقالى سنه
الموظفه: خدت المانى فين؟
فى DFA
وهنا كان اغرب سؤال شوفته منها 😀
الموظفه: يعني ايه DFA ؟
قولتلها نعم !
الموظفه: DFA دى اختصار , يعني ايه بقى DFA ؟
انا اتصدمت الصراحه مش عارف هو ده هيفيديك ب ايه يعني ولا هى رخامه وخلاص عشان معرفش اجاوب ! 😀
قولتلها بكل ثقه معرفش .
الموظفه: متعرفش؟!
ايوه معرفش معناه ايه انا خدت فيه كورس بس
الموظفه: تمام
الموظفه: دلوقتى هنتكلم المانى تمام؟
تمام
الموظفه: معاك قبول جامعه؟
ايوه
الموظفه: هتعيش ازاى فى المانيا؟
من الحساب البنكى و اهلى هيصرفو عليا
الموظفه: مكتوب قدامى انك مقدم لغه فى ايسن, وانت قبولك فى براندنبرج ليه؟
قولتلها نفس الكلام عشان هناك مفيش معاهد لغه كتير و غاليه
و شويه اسئله تقليديه تانيه مش فاكرها بالالمانى زى اللى مكتوبه هنا فى الجروب

وهى بتسألنى بالالمانى كان فى كذا حاجه مبفهمهاش و اقولها يعني ايه مش فاهم و كانت تترجملى عربى ساعات , فانا لقيت الموضوع كتر و كل شويه سؤال مفهموش, شغلت الدماغ المصرى فى اخر سؤال المانى 😀 , السؤال كان اوله haben sie؟
قولت يبقى اجابته ايوه او لا 😀 قمت رازعلها ايوه وخلاص ja 😀
قالتلى ja؟ وبتبصلى بصه غريبه شويه , قولتلها ja 😀
راحت متكلمه بالعربي بقى, قالتلى تمام ايه بقى اخر سؤال انا قولته ده؟
ثبتتنى بنت ال 😀 , قولتلها مش عارف الصراحه 😀
قالتلى لما انت مش عارف بتقول ja ليه !
وهنا اول قلم خدته 😀 😀 😀
قولتلها معلش , قالتلى تمام متجاوبش غير على اللى عارفه عشان مسجلش حاجه غلط
قولتلها ماشى
الموظفه: القبول ده مكتوب انك هتدرس فى شهر 9 2016 , يعني كمان شهرين, انت ازاى هتاخد الالمانى كده !
لسه بقولها القبول…..
الموظفه: تقولى مكتوب 2016 رايح ليه !!! و ازاى هتدخل !!!! و قفشت اوى 😀
قولتلها اتكلم طيب؟
الموظفه: ها
القبول اللى حضرتيك مسكاه مكتوب فيه انى هدرس فى 2017 فوق , السطر اللى حضرتيك قريتيه ده كاتب ان الجامعه فى براندنبرج بتقدم كورس لغه بس لازم يكون معايا B2 , و الكورس هيبتدى فى شهر 9 2016 , ده لو عايز اخد الكورس ده يعني عندهم. لكن الدراسه نفسها فى 2017
اتخرصت 😀
سئلت بالالمانى تانى القبول ده مكتوب فيه انك هتبدء دراسه فى الترم الشتوي 2017, يعني شهر 9 تقريبا السنه اللى جايه, وانت مقدم لغه دلوقتى الكورس هيخلص فى شهر 1, هتعمل ايه ده كله من شهر 1 لشهر 9 !!!!
ممكن اجاوب عربي؟
الموظفه: لا
طب انجليزي؟
الموظفه: ماشى
انا كنت عامل حساب السؤال ده و خليت الجامعه تكتبلى ف القبول انى هدرس كام ماده كده تحضيرا للسنه اللى هدخلها عشان الوقت الكبير ده, و فعلا زودته, و قولتلها انى هعمل كده.
الموظفه: تمام
الموظفه: انت نازل فى الليزين فى ال B1 ؟
ايوه
الموظفه: طب انت حاجز كورس B2 & C1 هناك, مينفعش لازم تكون حاجز B1 عشان انت ساقط فيه كده
قولتلها ده جزء واحد, وجايب 57 يعني فرق سؤال مش نازل كتير يعني
الموظفه: لا مينفعش لازم تكون حاجز ال B1
حورت عليها و قولتلها لما هروح هناك لو لقيت نفسى مش كويس فى الكورس هنزل الكورس اللى تحتيه اللى هو ال B1 و هو بنفس السعر
الموظفه: لازم يكون فى ورقه رسميه من المعهد مكتوب فيها انك ممكن تعمل كده
معايا الميل
الموظفه: لا ورقه رسميه
قولتلها طب وبعدين يعني؟ مش معايا دلوقتى
الموظفه: مينفعش
طب و الحل؟
الموظفه: لازم الورق كله يكون جاهز عشان نبعته هناك, بس لو عايز تبعته كده براحتك بس انا بقولك كده غلط ولازم كذا كذا
تمام ماشى ابعتيه
الموظفه: برضو؟
ايوه
الموظفه: تمام

 رجعت تتكلم عربي

الموظفه: بيان الدرجات اللى معاك مش جايب فيه اخر سنه ليه؟
عشان محضرتهاش تقريبا عشان كنت بتعلم المانى
الموظفه: لازم يكون موجود

” انا كان معايا بيان درجات بالسنه دى لوحدها, بس مكنتش عايز اقدمه عشان كان فيه 7 F من 21 ماده *ساقط فى 7 مواد يعني* “
المهم دار حوار كبير و لقيتها مصممه انى اجيبه, قولتلها انا معايا واحد بس مش موثق من السفاره
الموظفه: هاته
الموظفه: تمام معاك نسخه منه؟
لا
الموظفه: طيب اتفضل استريح شويه
خدته و صورته جوه و استجدعتها الصراحه فى الحكايه دى 😀
بعد ربع ساعه ندهتلى
كان كده تقريبا الانترفيو خلص, ودخلنا على الصبمه و الفلوس و الكلام و مراجعه البيانات و الامضى وده كله.
بس و قالتلى تمام كده و استنى مكالمه السفاره

انا صاحبى كان مقدم على فيزا فى نفس المدينه ايسن و نفس معهد اللغه و اتقبل فى 16 يوم
فانا قولت نفس الموضوع او بالكتير شهر و يردو عليا, ردو عليا بعد شهر و اسبوع, و كنت قلقان جدا الفتره ده و اعصابى ضايعه, و افكار كتير كانت بتجيلي انى هترفض عشان سنى كبير و درست هنا 3 سنين , واحد صاحبى قالى فى ناس اترفضت للسبب ده و قالولهم خلصو هنا السنتين و اطلعو ماستر , فخلانى قلقت,ده غير انى نازل فى جزء فى ال B1 , ده غير بيان الدرجات اللى فيه 7 F مشاء الله 😀 قولت كده خلاص مفيش فايده, و هما كمان طولو ف الرد فكنت هموت

لكن الحمد لله كلمونى النهارده و اتقبلت , فكل واحد يسعي وبس, ميبصش للظروف, اعمل اللى عليك و سيب الباقى على ربنا, ناس كتير بتجيب احباط, وناس هنا ع الجروب كمان تقول لو مش كذا هتترفض و لو لو لو لو
ملكش دعوه بحد, اجتهد و والله ربنا مش هيضيع مجهودك ابدا, بس انت اعمل اللى عليك , و هو لو فيه الخير ليك ربنا هيجبهولك, وخليك بره المجتمع الغريب ده اللى هيحبطك فى اي حاجه, حتى الاهل من كتر خوفهم عليك و انهم مش عايزينك تسافر وتبعد عنهم هيحبطوك, هما عندهم حق, بس هقعد جنبهم هنا مش هلاقى اكل قدام. فخليك واثق بنفسك و ان شاء الله ربنا يكرم الكل هنا باللى هو عايزه.
انا عمرى مكتبت بوست على الفيسبوك , بس كتبت ده عشان الناس تستفاد فى الاول , و عشان الناس الكتير اللى بيجلها احباط بسبب ظروف البلد هنا و هناك فى المشاكل اللى بتحصل, وكنت بحب اشوف ناس كاتبه تجاربها عشان كانت بتفدني جدا.
وشكرا للجروب الكبير ده اللى استفدت منه بنسبه 90% فى المشوار ده كله, البوست المثبت ده كنز والله , و اسئله الناس هنا كمان بتفيد الواحد, و شكرا لكل اللى ساعد
ربنا يوفقنا و يوفقكم فى بقيه المشوار ونسافر على خير ان شاء الله و ننجح هناك 

قد تحب قراءة : 

ـ الدراسة في ألمانيا : الأسئلة العامة لمقابلة السفارة

ـ الدراسة في ألمانيا : المطلوب مني بعد الحصول علي الفيزا ؟ حاجات مهمة تاخدها معاك من مصر

ـ السفر لألمانيا : ماذا بعد الوصول لألمانيا ؟

ـ السفر لألمانيا : العمل في ألمانيا كطالب

ـ السفر لألمانيا : ما هو المطلوب حتى ادرس في ألمانيا ؟

ـ السفر لألمانيا : لو جواز السفر ضاع تعمل ايه ؟

ـ السفر لألمانيا : الحصول على قبول معهد لغة في ألمانيا ؟

ـ السفر لألمانيا : خطوات فيزا اللغة Sprachkurs Visum

ـ السفر لألمانيا : معلومات عن السنة التحضيرية Studienkollegs

ـ السفر لألمانيا : ما هي السنة التحضيرية ؟ 

ـ السفر لألمانيا : التحضير للإختبار تجربة شخصية حول طريقة إجتيازه 

ـ السفر لألمانيا : دراسة الماجستير والدكتوراه في الجامعات الألمانية

ـ السفر لألمانيا : كيفية الحصول على قبول بنفسك

ـ السفر لألمانيا : أسباب الرفض في الجامعات الألمانية

ـ السفر لألمانيا : فتح حساب مغلق في دويتش بنك

ـ السفر لألمانيا : البطاقة الزرقاء ” اقامة للعمل”

ـ السفر لألمانيا : تجربة فيزا البحث عن العمل

أضف تعليق