الكدب اللي هو يعرفه ابنك غير اللي انتو تعرفوه ..ببساطة هو مايعرفش انه كدب

سوف نتناول اليوم فى موقعكم المفضل يفيدك عن الكدب اللي هو يعرفه ابنك غير اللي انتو تعرفوه ..ببساطة هو مايعرفش انه كدب نتمنى أن تلقى اعجابكم بأذن الله



الكداب بيروح النار 😖..جملة بقت مستهلكة وفاقدة لأي معني ..ترهيب للترهيب وخلاص .



إبنك بيكدب؟ !! اعرفي ان في أسباب ودوافع والكدب اللي هو يعرفه غير اللي انتو تعرفوه ..ببساطةهو  مايعرفش انه كدب 🤷‍♀️

خلينا الأول نعرف ايه هو الكدب..

الكدب يعني انه يزيف حقيقة او يزود علي اللي حصل او يقص منه او انه يختلق قصة من لا شئ.

طب الطفل اللي احنا عارفينه دا اللي عنده ٣ او ٤ سنين ل ١٢ سنة مثلا فاهم يعني إيه كدب كسلوك يعمل كوارث او ذنب يغضب ربنا فعلا !!

المفاجأة بقي انه “لا”🤭

الطفل من ٣ ل٦ سنين الخيال عنده بيبقي واسع وثري وبمجرد ما يشوف او يسمع حاجة بيبدأ يختلق قصص وخيالات جواه ويحاول يعبر عنها ويحكيها من باب جذب الإنتباه والمشاركة في الحوارات اللي حواليه ولما يتقابل دا بهجوم ونقد ونقول له (بطل كدب) بيعرف هنا يعني إيه كدب 😒

من ٦ ل ١٢ مش بيقول الحقيقة كاملة او بيزود عليها بإعتبار ذكاء منه وفراسة علشان يتجنب التوبيخ او يحصل علي مدح زيادة.

_ ومن هنا نقدر نعرف إيه أسباب الكدب عند الاطفال



*علشان يشد الانتباه ويأخد الإهتمام اللي مابيلاقيهوش لما يعمل حاجة إيجابية علي إعتبار منكم ان دا عادي وبديهي وكأنه بيشحت مشاعر حلوة لما يبقي مفتقد دا وعاوز يتحضن او يتدلع ويحس بالثناء 😔



*الكدب بسبب الخوف من العقاب (الزعيق _الضرب _ الحرمان ) وكل دول بيسببه له ألم هو بيحاول يتجنبه .



* كدب بسبب قلة الثقة في نفسه وإحساسه بالدونية سواء ماديا او معنويا نتيجة الحرمان او الغيرة من حد هو شايف انه افضل منه او بيحصل علي اهتمام اكتر منه ودا بيخليه يحاول يتجمل علشان يشوف نفسه في صورة يرضي عنها ويبدأ يصدرها للآخرين.



لما تضحكوا علي كدبة منه غير مقصودة فيحس انه كده بيتشجع ويكررها .



*الكدب كمان عدوي ودا لما يشوف اللي حواليه بيعملوا كده ويقلدهم

لما بيقولوا حاجة ويعملوا غيرها والحجج والأعذار علشان يخرجوا من الموقف وبعدها يبرروا بأسباب مش صح 😏 زي ان امه تخبي حاجة علي ابوه وتطلب منه مايقولش او يقول حاجة تانية والعكس وهنا وكأنهم بيقولوا له ان في حالات ممكن تكدب فيها 😖



المهم انكم لازم تعرفوا ان دايما فيه دافع او سبب ياريت تدوروا عليه قبل ما تبدأوا في عقابه او وصمه بصفة سيئة دي ونسأل نفسنا هو ليه لجأ للكدب



طب لو خلاص واجهنا دا بالفعل نعمل ايه!!



العلاج:

تجنبوا الترهيب بجملة الكداب بيروح النار لان دا بيربي عنه ألم معنوي وخيالات مؤذية وفكرة ان الكداب ربنا بيقطع لسانه اللي بتخليه يقفد الثقة والاحساس بالمصداقية لما يكدب فعلا ويلاقي دا مابيحصلش 🙄 و تثبيت لقب الكداب عليه علشان دا مع الوقت هايخليه يتعمد الكدب فعلا مادام كده كده انتم شايفينه كداب .



* كل مرة يقول فيها الحقيقة اشجعه واقول له انت صادق بمعني اننا نعزز عنده السلوك الصح ونثبته بالثناء عليه ودايما يبقي فيه مدح عليه ونحسسه طول الوقت انه مالوش غير انه يقول الصدق لان الصدق هو اللي هاينقذه بمعني اننا نديله الآمان الكافي انه يقول الحقيقة مهما كانت الأسباب .



* نعلمه يتحمل مسئولية اللي بيعمله وان لو ماقالش الحقيقة هايبقي في نتيجة وعواقب مش هاترضيه ودا من خلال القصص والحكايات والحوار طول الوقت مش بالنصايح والاوامر المباشرة .



*نبقي قدوة حقيقية ليه ويشوف دا فينا ويعرف ان الصدق من حسن الخلق وهو اللي هايكسبه احترام اللي حواليه و ورضا ربنا ومنه يبقي محترم نفسه .



المصدر:فن التربية الإيجابية – Dina Saad

أضف تعليق