المرح في بيوتنا ..الحلقة 1: المرح الموجل

المرح في بيوتنا ..الحلقة 1: المرح الموجل

المرح في بيوتنا ..الحلقة 1: المرح الموجل

تصحي الصبح ..
على المطبخ ..
تحضر الفطار عشان تلحق الزن اللي بيحصل بسبب الأكل ..

– ماما .. تعرفي تلعبي سبت حد؟
– مش وقته يا مروان، دلوقتي وقت الفطار ..

تحط الفطار ..
يفطروا ..
تشيل الأكل وتنظف ..

تحضر لأكل الغداء ..
وتروح تلم الغسيل ..

– ماما .. تعرفي تلعبي سبت حد؟
– مش فاضية يا مروان .. لما أخلص .. حاضر

تروح تعتذر لمروان على إنها مشغولة ..
وتوعده إن بعد الغداء هتقدر تقعد معاه ..

تطبق الغسيل ..
تروح للأوضة توضبها ..
التسريحة منعكشة .. تفضيها ..
الملاية تغيرها ..
الأرض تمسحها ..

– يا ماما .. أنت مش لسه ماسحة الأوضة إمبارح؟
= …….. من التراب هاعمل ايه بس

– ماما .. تعرفي تلعبي سبت حد؟
– …. أخلص اللي في إيدي حاضر ..

تروح تكمل الأكل ..
الحمام نسيت القاعدة لازم تتنظف ..
والحوض بالمرة وهي واقفة ..
والدولاب عاوز يترتب ..
والغسيل تاني ..

– يا ماما .. بتعرفي تلعبي سبت حد؟
= أستغفر الله العظيم يا رب، من عنيا يا قلب ماما من جوه ..

اتغدوا ..
ولمت السفرة ..
وغسلت المواعين ..
ولمت المطبخ ..
ونشرت الغسيل 😅
تقعد بقى على الموبايل شوية ..

منى هتولد ..
صفية جابت حلة الضغط الجديدة .. عقبالي يا رب ..
مريم سافرت عمرة .. يا ما شاء الله .. ألف مبارك يا حبيبتي
نرمين لسه بتغير من زميلة جوزها في الشغل .. عقلها صغير بصحيح ..

– يا ماما .. بتعرفي تلعبي سبت حد؟
= شوية يا مروان حاضر .. من عنيا

نحضر بقى العشاء ..
ونتفرج شوية سوا على التليفزيون ..
حاكم أبو العيال مبيشوفهومش طول النهار ..
حقهم برضو يقعدوا مع أبوهم ..

– يا ماما .. تعرفي تلعبي سبت حد؟
– يا مروان أنت عارف إن بالليل أنا ببقى مصدعة
خليني أفوق شوية ونلعب

مش كفاية تعبها طول النهار؟؟ …
نفسها ترتاح شوية ..

تنام مش حاسة بالدنيا..
ومروان مفيش في دماغه غير سؤال واحد ..

إمتى العب مع ماما سبت حد؟!
———————————————————————————–
المرح المؤجل 😓

ليه وقتنا الخاص الضاحك مع ولادنا .. عزيز؟

ليه المذاكرة أهم؟
ونأجل كل حاجة لما تيجي الإجازة ..
و الإجازة أصبحت للكورسات والرحلات ..
هيقعد مع ماما إمتى؟

ماما تعبانة فعلا ..

بس مروان عاوز وقت خاصة له ..
عاوز يحس إنه مش تقيل على ماما اللي بتوضب له طول النهار ..
عاوز يحس إنه مهم زي انشغالات ماما الكتير ..

عاوز يشارك ..
عاوز يحس بالمرح ..

شاركينا بإيه أسباب تأجيل المرح في بيوتنا ؟!
انتظرونا في المرح في بيوتنا الحلقة القادمة 


المصدر:كوكبنا

أضف تعليق