المرح في بيوتنا ..الحلقة 10: وقت الخروج

المرح في بيوتنا ..الحلقة 10: وقت الخروج

المرح في بيوتنا ..الحلقة 10: وقت الخروج

– يلا حبيبي عشان تلبس ..😕

– يلا عشان تلبس الشراب ..🙄

– يا بني انجز بقى حرام عليك ..😭

– لو اتأخرنا مش خارجين أنا بقولك أهو ..😠

– هو أنا مفيش مرة تنصفني وتلبس لوحدك من غير مناهدة ..😩

– أنا كرهت الخروج بسببك ..😡

____________________________________________
الحلم اللي بتحلمه كل أم ..
إن الولاد يصحوا في الميعاد ..
يدخلوا الحمام ..
يخرجوا يلبسوا ويوضبوا نفسهم ..
يفطروا في هدوء ..
ويمشوا في سلام ..

هل دا بيحصل كده بسهولة؟!

أكيد لا ..
وإلا مكنتيش كملت المنشور 😅

طب هل هو أصلا المفروض يحصل بسهولة؟!🤔

إحنا بنبقى نفسنا كل حاجة تمشي بسرعة قبل وقت الخروج ..
ولما يرجعوا يحطوا حاجتهم في مكانها والدنيا تبقى منظمة ..

لكن في الحقيقة ..
التنظيم والترتيب دا مهارة عاوزة خطوات بسيطة عشان تثبت ..
والنحررة عاوزة ..  مرح 🤩

🏠 وقت الخروج من البيت 🏠
سواء كنت هتخرجي معاه أو لا ..
تعالي نتفق على كام حاجة تهون علينا وتخلي وقت الخروج مرح ..

🎯الاتفاق قبل الخروج
أنت عارفة إنه مطلوب منه يصحى الساعة ٦ صباحا
يبقى لازم يعرف قبلها بيوم الكلام دا
ويحضر نفسه للنوم بدري
ونساعده بالخطوات اللي ذكرناها قبل كده في مقال سابق عن النوم ..
(الروابط آخر المقال)

🎯تحضير حاجتنا قبلها بيوم
لو من النوع اللي بيختار لبسه بعناية
مش الحل إننا نقوله انجز والبس أي حاجة
لإن كده بنفقده ملكة تانية عنده إنه يلبس ويتشيك قبل ما يخرج
وخاصة البنات 👧
يبقى نتفق معاه قبل النوم يحضر حاجته بتاعة بكرة
لو بنوتة .. تختار توكتها وتسريحة شعرها ولبسها وشرابها ..
وما تمليش ..
اديها المهمة وهي تخلصها ..

🎯عشان يلبس بسرعة ..
اعمليها مسابقة ..🤩
يلا نشوف مين هيلبس الأول أنا ولا أنت ..
واتأخري شوية وخليه يكسبك 😅

اعملي تايمر ١٠ دقائق قوليله يلا نخلص قبل التايمر🤩

لو قبل ٦ سنوات ……….
🎯خلي الهدوم تكلمه
البنطلون: أنا عاوزك تلبسني بسرعة قبل التي شيرت ..
التي شيرت: نعم نعم .. هيلبسني أنا الأول أنت فاكر إيه
يلا البس البنطلون قبل التي شيرت ما يلبسك بالعافية 😁

أنا البنطلون الوحيد .. ممكن تساعدني تلبسني عشان مش بحب أقعد لوحدي؟!

أنا الفستان الأمور .. عاوز أخرج معاك النهارده عشان بحب أروح معاك باي .. ممكن ممكن تسمحي لي تلبسيني وأخرج معاك النهارده؟! ( بصوت فطوطة كده 😅)

لو لسه مش معتمد على نفسه في اللبس والتجهيز
🎯 غنيله وأنت بتجهزيه. .
من غير لا وزن ولا قافية ولا أي حاجة 😁

مين هيخرج معايا ..
علشان نروح مشوارنا ..
هنروح بسرعة بسرعة ..
وهنلعب العاب ..
وهنتمرجح على المرجيحة ..
ونتزحلق على الزحليقة ..

يا ماما إحنا رايحين لتيتا أصلا زحليقة إيه؟! 😕

اه صحيح
يبقى ..
يلا نروح لتيتا
علشان نلعب مع عمر ..
ومازن وجدو ..
ونشوف الشمس الحلوة ..
من شباك تيتا .. الحلوة  😁

وهكذا …

👈لو بتحضري حاجات الصبح ..
زي مثلا ساندويتشات المدرسة
أو أكل الرحلة ..
أو شنطة خروج ..
خليه يساعدك ..

كل ما هيكون شايل المسؤلية معاك كل ما هيحس بمسؤولية الخروجة نفسها ..

كل ما هتعملي الحاجة لوحدك .. كل ما هيحس إن حق مكتسب والخروجة دي مش بتاعته أصلا وهو مجبر عليها ..

وبعد ما يساعدك بقى ..
وقبل ما تخرجوا ..

😍بوسة وحضن .😍
وقولي له: إحنا فريق عمل رائع 🤩
وخبطوا إيدكم في بعض زي give me five  كده
وتذكري تنظيمه أو ترتيبه أو حاجة عملها معاك ..

الطريقة دي هتخفف من الأيام الجاية اللي بتحتاجي مشاركته فيها ⁦❤️⁩
هيبقى عاوز يساعدك تاني ويشاركك تاني بإذن الله ..

🏠 وقت العودة للمنزل 🏠
لو راجع لوحده ..
يبقى بوسة وحضن ..
وتعبري عن إنه وحشك النهارده ..
والبيت كان مستنيك 😍

طب دا بيروح المدرسة كل يوم ..
كل يوم هعمل كده؟! 😕

يا ستي يوم في الأسبوع .. حد طايل 😅

طب رجعنا بقى من بره يبقى في روتين ..
في حاجة عاوزة ترجع مكانها ..

⁦1️⃣⁩الهدوم في الغسيل ..
⁦2️⃣⁩الشراب بالأخص في الغسيل ( بيتنسي دائما )
⁦3️⃣⁩الشنطة تتفضى ..

سواء كانت شنطة المدرسة .. أو شنطة الرحلة .. أو شنطة فيها طلبات بيت مثلا ..

عندنا حاجة من اثنين نعملها ..

لو روتين متكرر
زي المدرسة مثلا أو تمرين النادي
يبقى ممكن نعمل 🎆أغنية 🎆

اخلع هدومك يا عمر حطها في الغسيل ..
ومتنساش الشراب برضو نحطه في الغسيل ..
والشنطة نفضيها ..
علشان نخليها ..
دائما نظيفة ..
وريحتها جميلة ..
يلا يا عمر يلا ..
شهل يلا بسرعة ..

ونقعد بقى نغني ونشجع ونساعده لو تعبان ..

الحاجة التانية
🎆ورقة روتين🎆  تتعلق نرجع لها كل ما نيجي من بره..
ومن غير كلام كتير ..
لما يرجع من بره نشاور على الورقة عشان يفتكر ..
أو مثلا نعمل بإيدينا رقم ٣ على أساس إنهم ٣ حاجات ..

لو طلب يفضي الشنطة بعدين ..
تمام ..
بس قوليله محتاجة تعرفي إمتى عشان تفكريه ..
بعد ما ياخد دش ..
بعد الأكل ..
قبل النوم ..

وهكذا ..

قبل النوم بقى اطلبي منه يقولك 🤩٣ حاجات حلوة🤩 حصلت معاه في يومه النهارده ..
واسمعي منه عشان تعرفي فعلا إيه اللي عجبه في وقت الخروج ..

خروجة سعيدة ..
وعودة ممتعة بإذن الله ..

كل دا محتاج وقت عشان تتعودوا عليه ..
وأكيد هيحصل مقاومة في الأول ..
بس لما يبقى روتين ..
هيخفف كتير من الأوضاع الغير مرحة اللي بتحصل في وقت الخروج والعودة للبيت ..

انتظرونا في المرح في بيوتنا الحلقة القادمة 

المصدر:كوكبنا

أضف تعليق