المرح في بيوتنا ..الحلقة 12: ماما المرحة (2)

المرح في بيوتنا ..الحلقة 12: ماما المرحة (2)

المرح في بيوتنا ..الحلقة 12: ماما المرحة (2)

– ماما أنا زهقان😩
= (بصوت مبحوح ونظرة شريرة) يبقى هو دا وقته😈
– وقت إيه يا ماما؟
= الاتصاااال بشركة المرح .. ألو .. شركة المرح .. تسمع ضحكتنا المسجلة؟!
.
– ماما أنا مش عارف أنام😔
= ( تثاءبي) وأنا مش عارفة أنام .. نعمل إيه في المعضلة دي؟! ( نامي على كتفه)
.
– ماما أنا جعان😣
= الأكل على الترابيزة
– فين على الترابيزة؟🤔
= باستخدام البوصلة شمال غرب .. باستخدام جوجل مابس جنوب شرق .. بالنسبة لي أنا طرف الترابيزة عند البزبوز بتاعها
.
– مش عاوز أذاكر😒
= حاسة بك حبيبي .. ما تيجي نعمل تايمر ونحدد الحاجات اللي عاوزينها تخلص .. ونشوف إحنا اللي هنكسب ولا التايمر ؟!🤩
.
– ماما عاوز … عاوز … لا خلاص مفيش😑
= عمر .. عاوزة.. عاوزة .. لا خلاص مفيش 😅
____________________________________________
المواقف اللي بتعدي علينا يوميا كتيرة جدا مع أولادنا ..
عشان نتخلص منها. . بنشتكي منها ..
ظنا منا إن خلاص كده الموقف خلص ..🙄

بس إيه اللي طبعناه في أولادنا؟
خدوا طابع شكله إزاي عننا؟
لما يكبروا ويفتكروا شكلنا .. هيفتكرونا بنضحك ولا مكشرين؟!😓

كل ذكرى جميلة هنسيبها لهم هتهون عليهم حاجات كتير قوي لما يكبروا ..

هنديهم فرصة يشوفوا نموذج للأم والأب جميل ..
يقتدوا بيه ..🥰

إيه أسباب لجوئنا للشكوى بدلا من المرح؟
تقدري تقري الحلقة دي من #المرح_في_بيوتنا هتجاوب على سؤالك بإذن الله ..
https://www.facebook.com/726678300803931/posts/1508196855985401/

إزاي أخلي يومنا فيه أوقات مرحة كتير؟!

هنتكلم عن بعض الأفكار بإذن الله تساعدك ..

🎯حددي وقت الجد
أيوووون .. الجد هو اللي يتحدد ..
الجد دا غالبا المذاكرة ..
حددي وقتها وما تخرجيش عنه ..
يعني مثلا اتفقنا على ساعتين او ثلاثة نلتزم بيهم .. وباقي اليوم كله للمرح ..
تذكري حبيبتي إنهم أطفال .. المرح اللي بيشوفوه دلوقتي هو اللي هيديهم دفعة لقدام بإذن الله ..

🎯شاركيهم اهتمامتهم التافهة بالنسبة لك
مهتم بما تأكل الدعسوقة ..
مهتم بكيفية العيش في الفضاء مع دميته سوكا
مهتم بإزاي نزرع مكرونة في البلكونة
مهتم بإزاي نشغل التليفزيون لما النور يقطع
مهتم بصنع عصارة تفاح في المنزل ..
مهتم بنشر السلام في العالم .. وهو لسه دابب أخته كف حالا
مهتم بتنظيف الحائط اللي تحتيه لعبه المكركبة😅

يا بني أنت لو مهتم بمذاكرتك زي اهتماماتك دي كنا غزونا كوكب زحل 😂

رغم تفاهة الأمور دي بالنسبة لك، لازم تعرفي إنها بالنسبة له حياة ..
هو عايش على التخيل والأحلام ..
وخاصة لو سنه صغير قبل ٧ سنوات

🛑طب أعمل إيه لما يقولي عن حاجة مهتم بيها أو موضوع هو شغوف بيه لفترة؟!⁦🛑
📌 حددي وقت يومي للجلوس معاه واتناقشوا عن مشروعه مهما كان تافه أو مستحيل ..
📌علميه البحث عن طريق الإنترنت عن أفكاره هيلاقي حاجات مشابهة لها تفتح أفقه
📌لو عنده أفكار كتير خصصي له كشكول يحتفظ بيه سموه “دفتر الأفكار” ويكتب اسمه عليه
📌لو عندك أكتر من طفل خليهم يناقشوا أفكارهم سوا معاك ويساعدوا بعض بالأفكار
📌 خليه يرسم رسمة عن مشروعه
📌 ممكن ينفذه بالكرتون لو حاجة مادية
📌لو حاجة مستحيلة وهو عاوز يطلعها بره للناس، ممكن يعمل قناة على اليوتيوب او مدونة ويتكلم فيها وانشريها بين خمسة ستة من معارفك اللي تعرفي انهم مش هيستسخفوا فكرته

تخيلي ابنك لما يكلم حفيدك هيقوله إيه عنك؟! ⁦❤️
هيقوله ماما كانت مصدقاني مهما كنت بقول أفكر 😍

🎯التخيل
-ماما هو الحائط لو اتكلم هيقول إيه؟!
=مفيش حيطة بتتكلم حبيبي😑

-ماما .. هو لو ينفع يبقى عندنا جناحات؟!
=لا طبعا مينفعش .. الطيور وبعض الحشرات بس اللي عندها جناحات ..😑

-ماما هو أنا ليه مش أمك؟!
=عشان أنت ابني حبيبي وأنا بحبك يا قلبي😑

كل ما ولادنا يحلقوا بره السرب .. نروح مقيدينهم ونرجعهم العش تاني ..
رغم إن تخيلهم دا دلوقتي سر من أسرار إبداعهم لما يكبروا

🛑تعرفي إيه فائدة تنمية خيال الأطفال؟!🛑
– الخيال بيعلي قدرة الأطفال على حل المشاكل بطرق مختلفة
– الخيال بينمي الذكاء العاطفي والمعرفي عند الولاد، كل ما يتخيلوا أكتر كل ما أسئلتهم تكتر وأفقهم يعلي
– الخيال بيكسر حاجز الملل عند الاطفال، يخرج بره الصندوق ويفكر في ألعاب تسليه أكتر من غيرك
– الخيال بيخليه يشوف حاجات كتير حواليه جميلة رغم قبحها، يشوف الجمال في الصورة بدلا من النقد😍

-ماما هو الحائط لو اتكلم هيقول إيه؟!
=هيقول يا ريت ما تستخدموش اللون الأحمر علي عشان عندي حساسية من الأحمر😅

-ماما .. هو لو ينفع يبقى عندنا جناحات؟!
=اه طبعا .. أنا هيكون عندي جناحات زي الفراشة وانت زي العصفورة ونطير سوا
-دا إزاي كده؟!
=في الجنة حبيبي 💓

-ماما هو أنا ليه مش أمك؟!
=( سرسعي صوتك) إزيك يا ماما .. وحستيني .. أنا حاوز أقولك كلام كتييييل .. حسان أنا بحبك أوي أوي

كل موقف من دول ممكن ما يخلصش وما يقتنعش بالكلام اللي قلتيه .. بس مهما كانت إجابتك بعده هتكون إجابة مقبولة عشان ماما قالتها بحب ومرح 😍

🛑أنمي الخيال إزاي؟!🛑
بقراءة القصص، الرسم والتلوين، احترام أفكار الطفل مهما بانت تافهة بالنسبة لنا
وفي طرق كتير مرحة بتنمي الخيال هنتكلم عنها في كلامنا القادم بإذن الله

🛑 امتى أستخدم الخيال؟!🛑
لما تلاقي سؤال عجيب غريب مينفعش على كوكب الأرض😅
حاجة لا تخضع لقوانين الفيزياء والكيمياء والأحياء والرياضيات ..
أول ما يشطح .. اشطحي معاه 😂

انتظرونا في المرح في بيوتنا الحلقة القادمة 

المصدر:كوكبنا

أضف تعليق