المرح في بيوتنا ..الحلقة 13: ماما المرحة (3)

المرح في بيوتنا ..الحلقة 13: ماما المرحة (3)

المرح في بيوتنا ..الحلقة 13: ماما المرحة (3)

التقمص🤡

لأ .. مش القمص 😅
بلاش السكة دي من أولها كده😂

التقمص من الحاجات المرحة جدا اللي الولاد بيحبوها قوي ..

ماما خرجت من عباءة الأمومة وبقت حد تاني 🤠

هل التقمص دا صعب يعني؟!

كل اللي محتاجاها تستدعي روحك المرحة وتخليها تضفي على حواركم ..
والهدف مش إن الولاد يسمعوا كلامنا أو نؤمرهم فنطاع ..
الهدف إننا نخفف حدة التوتر اللي بيحصل في البيت من تصرفات الولاد اللي حقيقي بتستفزنا لما بناخدها بجد 😅

إيه ممكن الشخصيات اللي أتقمصها؟!
ورقة وقلم .. واكتبي ورايا يا ست الكل 😅

👺ماما الوحش 👺
ماما الوحش بتظهر لما ابنها بيرفض يعمل حاجة معينة ..

-مش عاوز أنام
= أن أن أن أن دششش ..
هتنام يعني هتناااام (بصوت بطيء لذيذ كده)
-(أكيد هيضحك) لأ برضو مش هنام
= اللي مش هيناااام هزغزغوووووه
– لا مش هنام (مكركر)
= يبقى هنزغزغ بقااااااا
زغزغي بقى وعيشي 😅
بعدها احكي الحدوتة وناموا .. كفاية الذكرى الحلوة اللي سبتيها عنده ⁦❤️⁩

👶ماما الطفل👶
ماما الطفل بتظهر لما ابنها بيعند في موضوع وهي عاوزة تلطف الجو

– أنا مش هاكل الأكل دا
= وأنا كمان مس هاكل الأكل تا ..
– خلاص اعملي لنا أكل تاني ..
= بس أنا صغيلة مس هعلف أعمل أكل أنا .. تعالى ننادي لماما ..
يا ماماااا .. يا ماماااا
اقلبي بقى بين الشخصيتين
ماما: إيه يا ولاد في إيه؟
ماما الطفل: مس حاوسة آكل الأكل تا
الطفل: وأنا كمان مس هاكله هههه
ماما: طب يا ولاد أنا فاهمة كويس انكم مش عاوزين تاكلوه بس ممكن تجربوه الاول
ماما الطفل: مس حاوسة
ماما: طب جربي بس حبيبتي
ماما الطفل بتفتح بقها وبتمسك أيدها مش عاوزاها تدخل لبقها
وفجأة الأكل دخل
ماما الطفل: طلع حلو.   إيه دا .. خليييبة قوي
وماما الطفل تاكل
الطفل كل ما اكلش عادي
كملي أكلك واشكري ماما 😅
سيبيه للزمن 😂

🐻ماما الكرتونية🐻
ماما الكرتونية بتظهر لما ماما تحس إن الجو عاوز تلطيف

– يا ماما أنا زهقت من الرياضيات
= ما تيجي نذاكرها زي بظ يطير
– إزاي يعني؟!
=( ماما ترفع إيديها قدامها ) إلى اللانهائية وما بعدها
😅

🦸ماما الخارقة🦸
ماما الخارقة بتظهر لما ابنها بيطلب حاجة غير عادية

– ماما .. تعرفي تتكلمي وأنتِ قافلة بوقك؟!
= هستدعي قوتي الصامتة حالا .. هيلاه هوبا هيلا هوبا
ماما بتقفل بوقها وبتتكلم وهي قافلاه

وقت ظريف😅
Enjoy 😂

🥳ماما المهرج🥳
ماما المهرج بتظهر لما الكلام يبقى عميق قوي وهيودينا في داهية ..😅

– ماما .. هو ليه أنت مش بابا وبابا مش ماما ؟!
= طب وأنت ليه مش ماما وأنا ليه مش أنت ؟!
– عشان أنا أنا
= وأنا أنا
– يا ماما بجد بقى
= لأ أنا جاية أهزر الحقيقة 😅

بعدها اتكلمي عن الله الحكيم وإن كل ميسر لما خلق الله ..

بس الدخلة حلوة صح؟! 😅

🧐ماما الحكيمة🧐
ماما الحكيمة بتظهر لما ابنها بيتكلم في حاجة بتحصل كل يوم طبيعية وهي كده كده هتحصل وهتتكرر تاني بكرة 🙄

– ماما .. مازن ضربني (أخوه)
= أوووه ضربك فين؟!
– هنا على كتفي ..
= استنى كده ..
تحاول تطلع من شنطة خفية حقنة وتمثل إنها بتديهاله في كتفه
= الحقنة دي فيها زغازيغ .. بتجيب نتيجة بسرعة
لو رفض الحل دا أو أخوه جه
= تعالى يا مازن
واديله حقنة في ايديه
 = دي مسكن عشان إيدك ما تضربش تاني
بعدها بقى اسمعي منهم وطبطي واعملياللي عاوزاه 😅

حكيمة = بتدي حقن 😂
أومال فاكراني هقول حكيمة بتفهم وكده ؟!
هو بعد اللي بقولهولك في المنشور دا هيبقى في عقل أصلا 🤣🤣🤣

🤖ماما الروبوت🤖
ماما الروبوت بتظهر لما بتحتاج من ابنها حاجة يعملها

– ع مر .. سا عد ني لو س محت
= أيوه يا ماما!
– م ح تا جة .. تش يل .. ك يس .. الز با لة .. تر ميه .. ب ره

غالبا هيقوم .. واحتمال قبلها يدوس على زرار التشغيل عشان يقفلك 😅
استدعي ماما المهرجة واعملي نفسك اتقفلتي 😅

🏺ماما الجماد🏺
ماما الجماد بتظهر لما ابنها بيتعامل معاها إنها جاية مع العفش 😂

ابنك قعد على رجلك وهو كله عضم ومسامير 😅
– اه يا بني .. ارحمني أنا كرسي غلبان مقدرش على كل الضغط دا اهيء اهيء

ابنك سند ورقة على رجلك وبيكتب
– إيه رأيك في المكتب الجديد؟! حلو ولا نغيره؟! 😂

😑ماما وضع الطيران 😑
ماما في وضع الطيران بتظهر لما بيبدأ الزن أو لو عاوزة تعمل من بنها 😂

– ماما .. يا ماما جعان
(دي المرة بعد المليون بعشرة اللي قلتي له عل الأكل الموجود وخلاص مفيش كلام يتقال )
ماما وضع الطيران هتبص لابنها وتتنح ..
– يا ماما بقولك جعان
ماما وضع الطيران هتحوَل 😅
– يا ماما بقولك جعااان
ماما هترمي رأسها على الكنبة لورا في وضع الأغمن علي بالضبط 🤣

🧕ماما الماما 🧕
ماما اللي هي ماما بجد لازم تظهر وما تتقمصش أي شخصية تانية لو:
🛑في مشكلة حقيقية ابنك بيواجهها وعاوز مساعدة
زي إنه عاوز حد يتعاطف معاه في موقف مضايقه أو حاجة من حاجته اتكسرت أو ضاعت ..

🛑طفل حساس ومش بيتقبل الجد يقلب هزار

🛑 حد من الحضور حواليك ممكن يسخر من ابنك وطريقتك في الهزار معاه ممكن تشجعه يسخر منه بجد

ومن المحظورات المهمة جدا ..

نهزر اه
لكن نسخر من حاجة في الولد ❌
أو نقلل منه أو من قدراته ❌
أو نحسسه إنه عامل مشكلة كبيرة ❌

مش مهم تستخدمي أي شخصية ..

المهم .. خليك ماما المرحة في كل الأحوال ..🤩

نكرر تاني ..
رصيدنا عند ولادنا لازم يكون عالي ..
عشان أكيد في وقت هييجي مش هنقدر نديهم مرح فيكون عندهم مخزون كافي يستحملونا ويتقبلونا ..

الهدف مش حل المشكلة ..
الهدف إضفاء روح المرح على حياتنا مع أولادنا ..

انتظرونا في المرح في بيوتنا الحلقة القادمة 

المصدر:كوكبنا

أضف تعليق