المرح في بيوتنا ..الحلقة 14: أبى الذى أحبه(1)

المرح في بيوتنا ..الحلقة 14: أبى الذى أحبه(1)

المرح في بيوتنا ..الحلقة 14: أبى الذى أحبه(1)

بابا ..
بحب أشوفك قوي وأنت قاعد معانا ..⁦❤️⁩

صحيح أنت مش بتبص لي ساعتها ..
بس بقعد أبص لك .. وبعدين ألعب مع أختي ..
 أبص لك .. وبعدين أرد على ماما
أبص لك .. وبعدين ألعب بلعبتي ..
بحس إن بيتنا حواليه سور قوي .. وبحب أبص على السور عشان أطمن ..🥰

بحب قوي لما تدخل من الباب وأنت جايب لي حاجة لي ..
بستنى اللحظة دي كل مرة ..🤩

وبحب لما تناديني وتحضني ..
على فكرة ريحة حضنك مش زي ريحة حضن ماما ..
وبعرف أفرق بينهم كويس
أنا شاطر خالص ..😉

لما بتسألني عن حاجات بتاعتي ..
عملت إيه النهارده؟!
ذاكرت المسألة بتاعة إمبارح؟!
عملت اللعبة اللي كنت عاوز تعملها؟!
خلصت ليفيل الوحش ولا لسه؟!

ساعتها بجد .. بحس إنك شايفني ..😍
حتى لو عينك ما جتش في عيني ..

عارف يا بابا ..
لما بتديني فرصة أبقى قائد وتسمع كلامي ..
تحب نروح فين النهارده؟!
اختار كرتون عشان نشوفه سوا ..
اختار أنت غدا النهارده ..

أنا ببقى طاير زي الطيارة الورق اللي طيرناها السنة اللي فاتت على البحر سوا ..🎐
بحس إني فوق قوي .. وقوي ..
بحس إنك شايفني ..🥰

على فكرة يا بابا ..
في حاجة هقولك عليها ..
بس عشان خاطري مش تقولها لماما ..🤫

أنا بزهق من ماما ..😓
اه بجد ..
أصل كل يوم في وش بعض وهي بتكرر أسئلتها دائما وبصراحة إحنا مطلعين عينيها ..
بس حقنا طبعا ..😜
لو مخنقتكوش أخنق مين طيب ..😂
وأنا عيل رخم .. أنا عارف كل حاجة على فكرة ..🧐

ببقى عاوز  كلام جديد ..
أو صوت جديد ..
أو حب جديد ..

ماما مش هتخترع يعني 😅

كلمة ممتاز ..
 برافو..
شكرا ..
بحبك ..
منك لها طعم تاني ..
طعم جديد ..🤩

لما بتحكي لي عن شغلك ..
بحس إني كبير ..
كبير قوي ..
قد البرج اللي روحناه سوا زمان ..
بحس إني عاوز أكبر عشان أبقى زيك ..

تعرف إن أختي بتقولي إنها بتحب لمسة إيدك لشعرها أكتر من ماما ..
بس ما تقولش لماما ..
لأحسن تزعل ..🤫

لما بتطلب مني نلعب سوا لعبة أنا بحبها ..
بحس إنك عارفني قوي ..
وواخد بالك مني قوي ..
ودخلت جوه قلبي وقريت اللي بحبه وقلتهولي ..

وشايفني ..⁦❤️⁩

ويا سلام على اليوم لما تكون مبسوط وتيجي تحكيلنا قصة من بتوعك ..
بجد بتضحكني قوي ..😂
ماما مش بتعرف تحكي القصة زيك كده ..
أصل مفيش قصة حد هيكتبها اسمها الحمار الأحول أو الفار المستعبط ..😆
وماما بتقرا من الكتب ..🙄
بحب القصص اللي بتضحكني دي قوي ..
وإيدك اللي بتكون على وسطي عشان تطبطب علي وأنا نائم ..
على فكرة بعرف إنك قمت من جنبي ..
وبمثل إني نايم عشان مش أضايقك ..
وتيجي تاني يوم تحكي لي قصة ..
بس مش بتيجي ..😓

أنا عارف إنك مش موجود أكتر الوقت عشان انت مشغول ..
لما سألت ماما ليه بابا مش بيقعد معانا زيك ..
قالت لي إنك مشغول عشاننا ..
بحاول اكرر كلامها دا كل يوم مش بشوفك فيه ..
بس بصراحة في وقت مش بعرف أقبله ..😫

أصلك لو مشغول عشاننا ..
طب ما أنا محتاجك دلوقتي ..
هو مش دا شغل؟!🤔
هو مينفعش حتى شوية صغننة يعني من وقتك تديهولنا؟!
صغننين .. مش كتير خالص ..

لو حضنتني أو لمستني أو بوستني أو سألتني أي سؤال جه على بالك ..
هكون مبسوط قوي ..🥰
حتى هحاول أقنع نفسي بإنك فعلا مشغول عنا عشاننا ..

وساعتها ..
أقدر أستحمل لما تقفل على نفسك باب الأوضة ..
أو تركز في موبايلك وانا بكلمك ..

هيكون لك رصيد عندي زي البنك أحوشهولك وأفتكرك بيه ..

بحبك يا بابا ..
وبحب وجودك في البيت ..
وجودك مختلف ..
وحبك مختلف ..
وضحكك مختلف ..

وبحب إنك تشوفني ..😍

انتظرونا في المرح في بيوتنا الحلقة القادمة 

المصدر:كوكبنا

أضف تعليق