المرح في بيوتنا ..الحلقة 15: أبى الذى أحبه(2)

المرح في بيوتنا ..الحلقة 15: أبى الذى أحبه(2)

المرح في بيوتنا ..الحلقة 15: أبى الذى أحبه(2)

أحيانا بابا وهو قاعد في البيت بيبقى متخيل إن مفيش حاجة يقدر يقدمها مخصوصة لأولاده ..
يعني ماما عاملة الواجب وزيادة فخلاص …🙄

أو إنه متخيل إنه مصدر للتهديد ..
اللي ماما ما قدرتش عليه يبقى نقول لبابا عليه 😈
ودا موجود كتير ..

فبابا دلوقتي عنده حاجتين بيعطلوه عن قضاء وقت مرح مع الأولاد ..

أولا .. ماما موجودة الله ينور😅
ثانيا .. بابا غير وظيفته الأساسية فهو العو اللي بنخوف بيه الولاد ..🙄

وللأسف، دلوقتي مفيش طفل غبي ..
قارشين كل أفكارنا وحيلنا الحمد لله 😅

فدا كله بيوصل للطفل، وبيكون صورة لبابا في دماغه ..

لو ولد .. فإحنا بنقوله دا مستقبلك ..
ولو بنت .. فإحنا بنقولها دا مستقبل زوجك ..😓

وعشان نكون قدوة حسنة لأولادنا، بابا محتاج يغير مفهوم قضاء الوقت مع الولاد ..

من غير شغل كتير.. ولا فرهدة ..

دورك الأساسي كأب هو إشعار أولادك بالأمان ..
في حيطة -سوري- نقدر نتسند عليها لما نقع ..
في حد مدير للبيت والبيت له رابط مش سايب كده..

وعشان نوصل الإحساس دا لأولادنا،. بابا محتاج يغير طريقة تعامله مع الولاد ..

🎯البوسة والحضن والطبطبة ..
دول مش بتوع ماما بس ..
بابا محتاج يحتوي أولاده بالتلامس، عشان دا مفهوم القدوة اللي بيتزرع جواهم ..

🎯زي ما بتحب تشوف الماتش ..
ابنك بيحب يشوف الكرتون ..
خليه يختار فيلم كرتون أو حتى حلقة منه
وتقعدوا تشوفوه سوا ..
حتى لو مرة في الشهر ..
هتكونوا ذكريات كتيرة ومشتركة بينكم ..
وألش كتير بقى 😄

🎯وقت النوم ..
حقيقي الولاد زهقوا من ماما وقصصها. .
عاوزين بابا مرة كده حتى لو كل شهر يحكي حدوتة وقت النوم لهم ..
بنفس الضحكة اللي بتضحكها معاهم ..
بألشك ..
بصوتك الخشن ..
دا احتياج مهم لهم مش رفاهية ..

🎯عارف لما بتقعد على الكنبة وابنك يرمي لك الكورة ويقولك احدفهالي ..
دا وقت مرح بسيط جدا ومش مكلف لا مجهود ولا خروج ولا وقت ..
كمل لعب بروح مرحة تصنع ذكرى سعيدة لهم ..

🎯لما تجيب لهم لعبة جديدة -لو حصل- ..
أقعد افتحها معاهم وجربها معاهم ..
شوف كم البسمات والذكريات اللي ممكن يخزنوها في موقف زي كده

🎯فضي نفسك كل أسبوع ولو ساعة ..
اتكلم معاهم ..
خليهم يحسوا إن في راجل في البيت فعلا يقدروا يروحوله لما تحصل مشكلة. .
كلهم عن مشاكلك. .
وخد رأيهم ..
مهما كان الرأي دا بسيط أو هايف بالنسبة لك ..
هو هيجي عالم الكبار من خلالك ..
مش عاوزينهم يكرهوا وجودهم في الدنيا بسبب قلة الاهتمام والكلام ..

🎯خلي بينكم أسرار ماما متعرفهاش
لا يا ماما ما تزعليش ..
دا كده بيبني ثقة بينه وبين ابنكم ..
ولما تيجي سيرة السر أو ماما عاوزة تعرفه ..
قولها لا دا سر بيني وبينه مقدرش أقوله ..

🎯اقعد معاه وهو بيتعلم حاجة على الكمبيوتر ..
إحنا الستات خلقنا ضيق شوية ..
علمه واتعلم معاه ..
واسمعه وشوف تفكيره وصل بيه لفين ..
دا أمانة في رقبتك زي ما هو أمانة في رقبة ماما ..

🎯اعمل له مفاجأة. .
حتى لو شوكولاتة ..
لعبة بلاستيك عادية ..
لفها في ورقة هدايا ولا كيس هدايا ..
لو مش هتضايق تكتب كارت يبقى اكتبه 😂
وابنك هيحتفظ بيه لإنه من أغلى حد عنده في الدنيا ..

تخيل كل الحاجات البسيطة دي لو موجودة حتى لو على فترات بعيدة ..
ابنك ثقته في نفسه تزيد ..
وثقته فيك هتزيد ..🤩

ولإن بابا مشغول. .
وعنده هدف كبير في حياته عن توفير عيشة كريمة للبيت والأولاد ..
فحقك يا بابا لما تتعب .. تقول ..

لما تكون مرهق ..
أو مشغول. .
أو مش قادر تدي ابنك ..

اعتذر له عن وقتك ..
وعوضه في وقت تاني يكون أفضل ..

هتعلمه الاعتذار ..⁦☑️⁩
هتعلمه إنه من حقه يرتاح ..⁦☑️⁩
هتعلمه إنه يثق فيك لإنك بتعوضه ..⁦☑️⁩

كل حاجة هتقدمها له دلوقتي .. هتتحفر عنده في خانة الكبار ..

الكبار هما بابا ..
وكل ما كانت صورة بابا كويسة ..
كل ما دا يخلي ابنك يحب العالم اللي رايح له ..
مهما كان فيه من منغصات ..
هيعمل زي بابا ..
ويعدي. .

انتظرونا في المرح في بيوتنا الحلقة القادمة 

المصدر:كوكبنا

أضف تعليق