المرح في بيوتنا ..الحلقة 16: أبى الذى أحبه(3)

المرح في بيوتنا ..الحلقة 16: أبى الذى أحبه(3)

المرح في بيوتنا ..الحلقة 16: أبى الذى أحبه(3)

– يا ماما!

= عاوزة إيه مني دلوقتي، أنت مش حاطة صورة أبو العيال بقالك أسبوعين ..

– آه صحيح، بس الكلام لك دلوقتي ..

= لا يا ستي، أنت حاطة صورته أهو في المنشور، حطي صورة الأم اللي بجونيلة دي، افتحي نفسي حتى أسمعك ..

– أصل إحنا هنجيب في سيرة الأب ..

= كده أنا معاك وش، قولي ..😂

– هو بابا بيعمل إيه في البيت؟!

= عادي يعني بيخلص شغل وييجي بقى عاوز يرتاح، يأكل ويقعد يلعب على البلاي ستيشن شوية ويروح ينام ..

– طب والولاد فين؟!

= بدخلهم جوه بقى يلعبوا، خلوه يرتاح شوية ..

– مممممم .. سامحيني .. بس أنا ببشرك بمستقبل سيء جدا للأولاد

= ليه يا ستي كده، متفشريش في وشي، إحنا زي الفل ..🤕

– ربنا خلقنا زوجين، زوج وزوجة، أب وأم ..
خلق الأم لها مهام اه .. والأب له مهام اه ..

لكن في التربية، جعل المسؤولية عليهم هما الاثنين ..

ودا مش عشان بس هنتحاسب عليها، عشان الأولاد بيحتاجوا للاثنين ..
دا احتياج مش رفاهية ..⁦☺️⁩

يعني بابا اللي غايب طول الوقت دا، بيأثر في الأولاد وفي حياتهم دلوقتي وبعدين ..

= طب ما هو عاوز يرتاح، أعمل له إيه بقى .. هو كل الرجالة كده يا أختشي 😭

– لا لا ، بلاش الكلمتين دول ..
في رجالة فعلا ممكن تكون بتئذي ..
بس أنت عارفة كويس إن أبو العيال مش كده ..

ودا اللي يهمنا ..
أبو العيال عاوزينه يشوف العيال، يضحك مع العيال، يكلم العيال، يعرف عن العيال ..

ميبقاش هو في جزيرة .. وهما في جزيرة تانية ..

أحيانا يا ماما بصراحة كده بتكوني السبب ..

= لا، متقوليش كده .. أزعل وربنا😣
دا أنا قايدالهم صوابعب العشرة شمع ..
توضيب وتنظيم وجداول وبذاكر عشان أربيهم وأتعامل مع أبو العيال صح وأهتم بالبيت ..
دا أنا مفيش زيي ..🤩

– طبعا يا ماما ..
وربنا يجعل تعبك في ميزان حسناتك ..
والجنة مش ببلاش ..

= يطيب خاطرك يا غالية ..😍

– المشكلة يا ماما إنك بتاخدي دور البطولة وهو مبهوأ عليك ..
بتاخدي كل الأدوار وبعد كده تزعلي لما تلاقي نفسك شايلة كل حاجة لوحدك ..
مفيش مرح في بيوتنا يكمل من غير بابا ..
ومفيش حب وسعادة في البيت من غير وجوده ..

كونك بتبعديه عن قصد أو من غير قصد ..
كدا عاقبته وحشة جدا

يمكن مش هتحسي بدا دلوقتي ..
لكن بعدين الوضع هيبقى أزمة،وساعتها مش هنلاقي حد يلحقنا ..

ماما أنا مش بقسى عليك ..
خليني أقولك إني مرايتك اللي عاوزة تقولك بكرة هيكون أحلى بيكم بإذن الله 🤩

– طب قولي يا ستي، شوقتيني!، قصدك إيه؟!

= بابا حقه عليكم يعرف إيه اللي بيحصل في البيت ..
إنجازات ولادكم..
مشاكلهم ..
ضحكاتهم ..
حركاتهم ..
شخصياتهم ..

– لما بتكلم بيتقالي إني رغاية ومبيسمعش ..🙄

= قلبي معاك والله هقولك إيه 😅
تيجي نغير طريقتنا ؟!

تعالي نقوله عن مشهد واحد في اليوم ..
“شوفت سما عملت إيه النهارده؟، رسمت حتة وردة جميلة جدا .. تعالي يا سما وري بابا كده”

” فاتك النهارده منظر عمر وهو بيكلم جدته في التليفون 😂 عسل بجد كنت عاوزة أكله”

” جنى عملت النهارده أول فيديو سجلت فيه إنجازها في القراءة، بجد أنا فخورة بيها قوي”

” يوسف النهارده أول مرة له في كورس البرمجة، بجد انبهرت بتألقه ومدربه اللي فرح بأفكاره قوي”

كده أنت بتقولي لبابا أنت معانا
 إحنا ما نستغناش عنك
ولادك يشرفوا
افرح بينا 🤩

رسائل إيجابية ..
إحنا معاك يا بابا .. متخليش زحمة الشغل تاخدك مننا

= كلام معقول، اشجيني ..

– وحاجة مهمة جدا ..

ليه بتاخدي قرارات لوحدك؟!
ليه كورساتهم واهتماماتهم وخروجاتكم وتطلعاتكم وخططكم ليكم أنتم بس؟!

= بيقولي أنت عارفة مصلحتهم اعملي اللي أنت عاوزه ..🙄

– طب ما تيجي نرجع تاني نتكلم عن الطريقة ..

اعملي فيها عبده العبيط 😅

“أنا محتارة بجد مش عارفة سما تاخد انهو كورس؟! ممكن تساعدني؟!”

” عمر خلص المستوى الأول بس مش عارفة أقيس ياخد المستوى الثاني ولا لا؟!”

” عاوزة أحط في خطتي الرسم لأحسن يوسف ما شاء الله مبدي اهتمام بالرسم جدا الفترة دي، لسه بدور في الإنترنت، لو وقع في إيدك حاجة قولي”

استحملي التنبيط اللي بيحصل في الأول، من عينة
“من إمتى بتاخدوا رأيي؟!”
“ما أنت عارفة بتسألي ليه؟!”
“وأنا أعرف منين؟!”

مشكلتنا كأمهات ما بنستحملش، من أول حفرة بنقع ونقوم نجري ..

يمكن يكون بابا له مهمة توفير الأمان للبيت ..

لكن المدير التنفيذي اللي هو أنت، من غيره مفيش حاجة تستقر ولا تتقدم ..

= تسمحيلي بسؤال؟!

-اتفضلي ..

= دا ٱيه علاقته بالمرح؟!

– لا أنت كده عاوزة نبدأ من تحت قوي ..

استنيني المقالات الجاية نكمل دردشة 😂

انتظرونا في المرح في بيوتنا الحلقة القادمة 

المصدر:كوكبنا

أضف تعليق