المرح في بيوتنا ..الحلقة 2:هل المرح مهم ؟!

المرح في بيوتنا ..الحلقة 2:هل المرح مهم ؟!

المرح في بيوتنا ..الحلقة 2:هل المرح مهم ؟!

تعالوا نتخيل كام مشهد كده من اللي بيحصلوا لما مروان بيسأل ماما ..
– تعرفي تلعبي سبت حد؟

مشهد ١
مروان: تعرفي تلعبي سبت حد؟
(الكاميرا داخل مخ ماما)
– مواعين .. مشاوير .. تمرين .. اه يانا .. سبت حد .. السبت إجازة والحد هنجيب بزازة .. غسيل .. عربي .. مينا موحد القطرين .. سبت حد ..مواعين تاني .. فتة الشاورما يوم الجمعة .. عرض الخضار على النت .. سبت حد .. الراجل عاوز القميص الأبيض .. المكوة تروح للكهربائي .. النجار عاوز منشار .. سبت حد .. مواعين ……..

رد ماما:
السبت إجازة هشوف لك الثلاثاء حاضر ..
———————————————————————————–
مشهد ٢:
مروان: تعرفي تلعبي سبت حد؟
(الكاميرا داخل مخ ماما)

رد ماما بعد المرة الثالثة من سؤال مروان:
– شوية بس .. هفوق وأجيلك ..
———————————————————————————–
مشهد٣:
مروان: تعرفي تلعبي سبت حد؟
(الكاميرا داخل مخ الأم)
– ماما هتبدأ تلعب سبت حد ..
ماما هتكسب
مروان هيزعل
تقوم ماما تمثل إنها هتخسر
يقوم مروان عاوز يكسب تاني
قوم ماما تقرر إنها محتاجة تقوم دلوقتي
يقوم مروان يمسك فيها
تقوم ماما تقرر تزعق عشان يبعد عنها
وعلى إيه النكد؟! هي ناقصة

رد ماما:
– مش فاضية دلوقتي .. شوف لك حاجة تعملها ..
———————————————————————————–
مشهد ٤:
مروان: تعرفي تلعبي سبت حد؟
(الكاميرا داخل مخ الأم)
وبعدها نلعب صلح .. وبعدين نجري ورا بعض .. بعدين تتشقلب على ظهري .. بعدين نمشي على الحيطة ..
يا بني أنا ماشية بالعلاج ..

رد ماما:
– خد التابليت العب عليه أحسن ..
———————————————————————————–
مشهد ٥:
مروان: تعرفي تلعبي سبت حد؟

(الكاميرا داخل مخ مروان)
عاوز أشوفك بتضحكي لي ……..
———————————————————————————–
مشاهد متكررة ومتباينة في بيوتنا تقريبا كل يوم ..
بين طفل حياته كلها لعب × لعب
وأم حياتها كلها مسؤوليات ومشاكل ..

أحلى علاقة في الدنيا بيتغنى لها أحلى أغاني وبنفتخر بيها وبنتكلم عنها طول الوقت ..

ورغم كده ..
المعادلة ناقصة ..😥

صعب تفضل العلاقة قوية طول ما كل واحد في جهة..
ولإن ماما هي الأكبر ..
وهي اللي تقدر تقرب وتبعد وتاخد قرارات أقرب للحكمة ..

فلازم يكون في حل ينصفها ويقوي العلاقة دي ..

وقبل ما نعترض على الأعراض زي ..
غضب الولاد ..
مبيسمعش الكلام ..
مبيحترمنيش ..
بيفضل أصحابه علي ..
بيبص لي بقرف ..
بيبعد وشه عني وأنا بكلمه ..
مجرد ما بشوفه صوتي بيعلى ..

لازم نتكلم عن المرض اللي سبب الأعراض دي ..

بمنتهى البساطة ..
ابني زي البنك ..💲
كل ما هحوش فيه وأحط ..
كل ما أقدر أسحب منه وقت لما أحتاج ..

عمرك ما هتقدري تمنعي نفسك من الغضب ..
ولا إنك تسيطري على نفسك وقت المود الوحش ..
ولا تغير هرموناتنا كستات اللي بيحصل لا محالة ..🤪

لكن إحنا حياتنا مش كلها مآسي ..
فيها حاجات كتير عاوزة مننا بس نحسن استغلالها ..
عشان لما آجي أسحب من الرصيد .. ألاقي حاجة أقدر أسحبها وما أثرش على أغلى علاقة في الدنيا ..❤

وعشان كده ..
تعالوا نعد بعض الأسباب اللي بتخلينا نقرر من جوانا إن مفيش وقت للمرح ..

١. ماما توقعاتها كبيرة قوي عن المرح:👀
هحتاج أطبع ورق ..
أو هنقعد نقص ونلون ونعك الدنيا ..
أو هنقعد ساعة نلعب وانا مش فاضية ..

٢. ماما مرهقة:🤕
ماما عندها مسؤوليات كتير قوي مش قادرة تتنفس ..

٣. ماما عاوزة تفصل:😵
دا الثلاجة بتفصل يا جبابرة ..

٤. ماما صحتها ضايعة:🤒
ماشية بالعلاج ..

٥. ماما عندها أولويات كتير أعلى من المرح:🧐
هنودي المذاكرة والتمرينات والكورسات فين طيب؟!

تفتكروا إيه أهمية المرح في بيوتنا؟!
هل هو أصلا مهم .. ولا عدم وجوده مش هيفرق في حاجة؟!
انتظرونا في المرح في بيوتنا الحلقة القادمة 
في انتظار مشاركاتكم على المنشور ..
المصدر:كوكبنا

أضف تعليق