المرح في بيوتنا ..الحلقة 3: مدة المرح

المرح في بيوتنا ..الحلقة 3: مدة المرح

المرح في بيوتنا ..الحلقة 3: مدة المرح

هل أنا محتاجة أفضل طول اليوم مع ابني عشان أصنع معاه ذكريات حلوة ونقضي وقت مرح سوا؟🤔

متهيألي مفيش أم إلا ومر عليها ولو للحظة إحساس بالذنب …😔
الولاد في مظاهرات بيعلنوا فيها إن ماما مش فاضية ومش بتقعد معانا ومش بتضحك ومش بتكلمنا .. وكلام كبير قوي سعادتك

أقولك على سر ..🤫
بس امسكي أعصابك ..
وحاولي تقعدي على كرسي عشان مش يغمن عليك 😅

أخصائيين التربية عملوا جدول صغنن للمدة اللي لو ماما أو بابا قضوها مع ابنهم هيكفوا أولادهم نفسيا بإذن الله ..
الجدول بيقول الآتي:
الأطفال من سنتين ل ٦سنوات: ١٠ دقائق يوميا
الأطفال من ٧ ل ١٢ سنة: نصف ساعة أسبوعيا على الأقل
أكبر من ١٣ سنة: مرة في الشهر في شيء جذاب له

استني …
احنا اتفقنا تمسكي أعصابك

يعني ابني ذو الأربع سنوات اللي مدوخني طول النهار عاوزني ألاعبه ..
عاوز بس ١٠ دقائق يوميا 😱

وابني اللي عدى ال ٧ سنوات .. بحسبة بسيطة كده ٣٠÷٧ يعني تقريبا من ٤ ل ٥ دقائق يوميا 🥺

وابني اللي عدى ال ١٣ سنة غالبا مش هيبقى لازق فيك وعاوزك معاه طول الوقت ..😧

صدمتك صح؟!

خدي بق ميه وتعالي لي ..
..
..
..
..
..
..
نفهم من الكلام اللي قلناه دا أكتر من حاجة ..

أولا .. ابني كل ما يكبر
كل ما التصاقه بي هيقل ..
يعني دا مش شيء دائم أو حاجة هنفضل فيها على طول ..
يبقى نهتم بهم صغار .. عشان يفتكروا ذكريات حلوة معانا لما يكبروا ويبعدوا ..

ثانيا .. مفهومنا عن إن لو قضينا وقت كبيييييييير مع أولادنا كله لعب وضحك وهزار هو دا الطريق الصح عشان يطلعوا سلام نفسيا .. مش دا المطلوب
ولو في سن كبير guess what ?
مش هيحب يفضل طول الوقت معاك أصلا 😅
غير كده الفكرة دي بتعجزنا .. بتخلينا نيأس من إننا نوافق على طلباتهم في تقضية وقت معانا

ثالثا .. قوة مدة المرح في استمراريتها 👌
مش طولها مع انقطاعها
يعني مش هاجي يوم اقضيه لعب في لعب
وأفضل شهر مبنعملش سوا أي أنشطة مرحة خالص

رابعا .. والمفاجأة🤩
مدة المرح المطلوبة قصيرة ..
أقصر من إننا نرفضها ..
أقصر من إننا نفكر فيها أكتر من اللازم..
أقصر من إننا نقول مالهاش وقت ..

طب نعمل إيه بقى بعدالكلمتين الحلوين دول؟
ورقة وقلم واكتبي معي يا ست الكل ..😂

مهمة رقم واحد⁦1️⃣⁩
تقعدي مع ابنك لو بيقدر يتكلم وتتحاوري معاه
وحطوا قائمة بكل الألعاب أو الأنشطة اللي يحب يعملها معاك
أنت وهم تقولوا كل حاجة
وبعدين اعملوا تصويت على كل لعبة
الألعاب اللي التصويت فيها واخد عدد أصواتكم كلكم
تتحط في قائمة
وكل يوم تاخدوا حاجة تعملوها سوا ..😊

مهمة رقم ٢⁦2️⃣⁩
لما يبدأ يومك الصبح حددي إيه الوقت المناسب للعب بالنسبة لك بينك وبين نفسك كده ..

يا سلام لو خليتيه بعد الصلاة ⁦❤️⁩
ويربط إن الصلاة بنلعب بعدها

يا سلام لو تخليها قبل المذاكرة 😅
عشان يربط إن المذاكرة قبلها لعب😉

يا سلام لو تخليها في أول اليوم وأنت فايقة
قبل العصر تحديدا وقت العد التنازلي ل (البنزين خلص)
عشان تلعبي بنفس وما تتحججيش بأي حجة من الظروف الكتير اللي بتواجهنا طول اليوم

وكل مرة ننوع ..
مش كل مرة نفس الوقت ..

مهمة رقم ٣⁦3️⃣⁩
اللعب لعب
والجد جد

هنلعب نلعب بذمة🥳
هنذاكر هنذاكر بذمة📖

بلاش وقت المذاكرة ناخده جد ..
ووقت اللعب جد برضو ..😆

قليل من المرح يفيد أحيانا 🤸

مهمة رقم ٤ ⁦4️⃣⁩
استعيني بالله قبل كل شيء ⁦❤️⁩
وارمي كل اللي وراك .. وراك خالص بعيد
دا وقت خاص بتصنعي فيه ذكرى جميلة
ووقت قصير أصلا .. ليه شايلة الهم حتى في دي؟

مهمة رقم ٥⁦5️⃣⁩
الاستمرارية
سر نجاح خطوة الوقت الخاص مع اولادك
إنك تستمري
هتقفي
يبقى هنرجع للزن تاني ..🙄

ملاحظات مهمة خدي بالك منها📢
١. ما تقوليش لابنك دا وقت المرح الخاص بينا
او دا وقت الهزار بتاعنا
خليها بتلقائية
قوليله مثلا .. أنا فاضية بعد الصلاة ١٠ دقائق فكر تحب نلعب إيه من القائمة اللي اخترناها🥰

٢. خليك مرنة
لو حب يجرب لعبة جديدة ما اتفقتوش عليها
تمام
جربي معاه وما ترفضيش
هتستمتعي بإذن الله 🤩

٣. لو رفض إنك خلاص هتقومي ومش هتكملي لإنك مشغولة وهو لسه عاوز يلعب
تكلميه بهدوء وتقوليله ظروفك
اشركيه في اللي وراك
واشركيه في مساعدتك
خليه يحس إنه في العالم بتاعك مش في جانب آخر أنت بعيدة عنه فيه
في الأول هيرفض
بس بعد كده ومع تكرار ردك بنفس الطريقة هيستجيب

طب الحمد لله
كده أنا عرفت المدة وهلتزم بيها
وأقوم بقى أشوف حالي
وكفاية بقى قراءة مقالات #المرح_في_بيوتنا

لا ..
استني ..
إياك تمشي ..

المرح مخلصش..😆

دا أول الخيط ..
المرح مش كبسولة بناخدها في وقت معين وخلاص ..
دا عيشة وحياة وكلام كبير قوي يا فندم ..

عاوزة تعرفي إيه هي؟!
انتظرونا في المرح في بيوتنا الحلقة القادمة 

المصدر:كوكبنا

أضف تعليق