المرح في بيوتنا ..الحلقة 4:ألعاب مع اطفالنا من 2 الى 6 سنوات

المرح في بيوتنا ..الحلقة 4:ألعاب مع اطفالنا من 2 الى 6 سنوات 

المرح في بيوتنا ..الحلقة 4:ألعاب مع اطفالنا من 2 الى 6 سنوات

زاي أقضي وقت مع ابني في عمر من ٢ ل ٦ سنوات❓

اتفقنا قبل كده إن السن دا محتاج مننا ١٠ دقائق يوميا ..

واستمرارنا على ال ١٠ دقائق دول هيخف كتير من التوتر اللي حاصل في علاقتنا بأولادنا ..

طبعا لو قدرت في مرة تزويدهم يبقى بتزودي من رصيد ذكرياتكم ووقتكم الحلو سوا بإذن الله 🤩

مرة في الشهر خليها نصف ساعة .. شحنة إيجابية لكم جدا😍

ممنوع يا ماما تحطي تايمر بالوقت ولما يخلص تمشي ..
إحنا عاوزين وقت من غير قيود 🤗

بنتفق إننا هنلعب سوا وهنوضب سوا .. عشان نقدر نلعب سوا كتييير بعد كده بإذن الله 😊

حددي معاه اللي هتعملوه قبل ما تبدأوا، وتتفقي معاه إننا هنكرر الوقت دا تاني بإذن الله ..

هنقسم وقتنا مع ماما ل ٣ أقسام:
قسم ماما في الموود🙋
قسم ماما مش في الموود🙍
قسم وقت خاص غير اللعب🙆

⁦1️⃣⁩ماما في الموود:. 🙋
⚽ دور أو دورين خلاويص (استغماية)

⚽دور القطة العامية

⚽نحدف الكورة في طبق الغسيل ونجري نجيبها ونشوف حطيناها كام مرة في دقيقة

⚽تماثيل اسكندرية
نقول تماثيل اسكندرية استوديو مصر والتماثيل مبتتحركش
وحد يبقى مسؤول يضحكهم من غير زغزغة 😅

⚽ننزل الشلت وننط عليها رايح جاي
مرة برجلينا الاثنين، مرة برجل واحدة ، مرة برجلينا الاثنين مع بعض

⚽ننزل تحت البطانية أو الملايةونعمل نفسنا في مكان ضيق زي صندوق أو مركب وفي مطر أو خيمة في غابة ونمثل حوار مع بعض تحتها

⚽نرفع ملاية السرير وهما ينطوا عليها 😍
ويا سلام لو في الصيف وفي مروحة والملاية تهفهف😅

⚽ عندك مقشة؟
اعملي نفسك بتكنسي وهما حواليك ..
وبعدين تقربي منهم فيجروا عشان محدش تلمسه المقشة
وبعدين تعملي نفسك بتكنسي تاني ..
كر وفر .. كر وفر .. 😆

⁦2️⃣⁩ ماما مش في المود:🙍
👏سبت حد (عشان مروان 😅)

👏طلعت أنا والعصفورة
في قائد للعبة، والباقي بيختار اسم حيوان، والقائد يحركهم لكلامه
طلعت أنا والعصفورة
نزلت أنا والقطة
طلعنا كلنا
نزلنا كلنا
ونرفع أصابعنا أو ننزلها حسب كلام القائد

👏آدي البيضة
آدي البيضة وآدي اللي سلقها وآدي اللي قشرها وآدي اللي حدقها وآدي ال …. كلها الهم المم المم .. ونزغزغ بقى 😅

👏ماذا لو ….؟!
في وقت فراغك كده حطي أسئلة غريبة واكتبيها في ورق في علبة وتاخدوا سؤال تقعدوا تتكلموا فيه

لو لسه الديناصورات موجودة إيه اللي هيحصل؟
لو بقى عندنا جناحات، هنعمل إيه بهم؟
لو النملة بقت قدنا، يا ترى إيه اللي هيحصل؟
لو كنا ساكنين في الريف، ممكن نعمل إيه؟
لو عندنا فيل في البيت، هيعيش إزاي؟!

👏تغيير الأصوات
نتكلم وإحنا مغييرين صوتنا
مرة ضخم ومرة مسرسع
مرة نتكلم أكننا قطة، أو اكننا فيل
مرة نتكلم زي الرجل الآلي بكلام متقطع
مرة نتكلم زي شخصية كرتونية محببة

👏خبي أسنانك
حد يخبئ أسنانه والتاني يضحكه بالكلام ولو بين أسنانه نبدل الأدوار

👏بدون كلام لكلمة واحدة ( حيوان)
واحد يقلد حيوان والباقي يحاولوا يعرفوا دا إيه

👏طوبة ورقة مقص
اللعبة المشهورة.. نعلمها لهم
الطوبة بتكسر المقص
المقص بيقطع الورقة
الورقة بتزحلق الطوبة

👏لعبة الذاكرة
نبدأ بكلمة وكل واحد يزود كلمة عليها
هنتفق على نوع حاجة معين ونزود على أساسها
زي مثلا حيوانات او خضار او فاكهة أو أثاث في البيت ….. إلخ
مثلا:
حد هيقول خروف
التاني يقول خروف وجمل
الثالث يقول خروف وجمل وحصان …
وهكذا

⁦3️⃣⁩ وقت خاص غير اللعب:
🌈نحكي حدوتة
قصة عارفاها أو قصص ورقية أو قصص إلكترونية

🌈كراسات رسم وتلوين

🌈نقلب في صورنا وإحنا صغار
بشوف صورك وانت صغيرة أو صوره هو وهو صغير ..

🌈نتفرج على فيديو قصير عن الحيوانات وتتناقش فيه
من اليوتيوب، فيديو قصير عن حيوان أو فيديوهات ناشونال جيوغرافيك
بس قصير مش عاوزين وقتنا يضيع معاهم في المشاهدة
وعشان هما كمان ما يقعوش قدام التليفزيون

🌈احكي له عن نفسك وأنت صغيرة قده
احكي له عن جده وجدته وعن إخواتك
فرصة يتعرف عليكم من زاوية تانية 😉

🌈اعملي شوية أسئلة عن نفسكم وكل واحد يجاوب عليها ممكن تعملي مايك وتلفوا بيه على نفسكم
يعني مثلا
اسمك
سنك
هوايتك
اللي ببفرحك
اللي بيحزنك
لعبة بتحبها وليه بتحبها
أكتر حد بتحب تلعب معاه

بلاش أسئلة بتحب فلان ولا فلان 🙄

😍لو عندك وقت حلو ونفسك تقضيه معاه 😍
العبي على الخيال 🤩
لعبة الدكتور والمدرس والطباخ والمطعم …..
ومثلوا أحلى تمثيل 💓

انتظرونا في المرح في بيوتنا الحلقة القادمة 

نفرحهم ويفرحونا😍😍😍

المصدر:كوكبنا

أضف تعليق