المرح في بيوتنا ..الحلقة 5: قضاء وقت مرح مع ابني من سن ٧ ل ١٢ سنة

المرح في بيوتنا ..الحلقة 5: قضاء وقت مرح مع ابني من سن ٧ ل ١٢ سنة


إزاي أقضي وقت مرح مع ابني من سن ٧ ل ١٢ سنة❓

طبيعة السن دا مرحة جدا 😂
سن بداية الألش .. النكت .. الفوازير ..

السن اللي عاوزك تعلميه إزاي يلعب أكتر من إنه يلعب معاك ..
عاوز يتعرض لألعاب كتير ومختلفة عشان يقدر يشارك بيها أصحابه ..👬👭

بيحب يلعب مع أقرانه أكتر منك الحقيقة 😅
لكن وقت ماما المميز .. دا شيء مفروغ منه ⁦♥️⁩
عشان نبني ذكريات حلوة معاهم يفتكروها لحياتهم الجاية بإذن الله 😍

دور بابا كبير في المرحلة دي ..
خروجة أو لعبة بسيطة .. هيكون لها أثر نفسي إيجابي كبير بإذن الله ..👌

اتفقنا قبل كده إن السن دا لو ٥ دقائق يوميا له هيكون له أثر كبير في نفسهم ..
أهم حاجة الاستمرار على ال ٥ دقائق دول بإذن الله 💓

ولو قدرت تزوديه ولو مرة في الشهر .. هيفرق جدا جدا في نفسيتهم واستقبالهم لمراهقة آمنة بإذن الله ..

اختاري الوقت اللي تكوني رايقة فيه .. زودي وقتهم الخاص معاك 😍

عشان نحدد ممكن نقضي وقت معاهم إزاي .. هنقسم الوقت دا ل ٣ أنواع:

⁦1️⃣⁩وقت نشاط مع ماما⁦👩‍👦⁩
⁦2️⃣⁩وقت يتعلم إزاي يلعب👣
⁦3️⃣⁩وقت مع الأصحاب والأقارب👬👭

⁦1️⃣⁩وقت نشاط مع ماما ⁦👩‍👦⁩
“اتفقي مع بابا وقت الإجازة يشارك معاكم في بعض الألعاب دي باتفاق مسبق”

🎈بدون كلام
ممكن يكون اسم كرتون .. أو جملة من تأليفهم ويمثلوها

🎈بووم
بنقعد زي سبت أحد كده
ونقول الأرقام لحد ١٠٠
وعند مضاعفات العدد ٥ نقول “بووم” منقولش الرقم

🎈أأيي
اشرحي اللعبة للأولاد الأول قبل ما تلعبي عشان لو مش حبوها بلاش لتقلب غم 😂
بتقعدوا برضو زي سبت حد .. وكل واحد يضرب إيد التاني جامد .. اللي يقول أأيي يخرج 😅

🎈قلة .. قلتين قلة
بنعمل دور ما بيننا
أول واحد يقول قلة
التاني يقول قلتين قلة
الثالث ٣قلات قلتين قلة
ونفضل كده بقى بالعد التنازلي لحد ما نتلخبط 😅

🎈باقي القصة
نعمل دور . ..
 وحد يبدأ بجملة من قصة .. واللي بعده يكملها وكل واحد عليه الدور يكمل على نفس القصة

احذري من الألشات والنكت السخيفة اللي هتسمعيها 😂

🎈الذاكرة بالقصة
هنبدأ بجملة لقصة
بس مطلوب من اللي بعدي يقول جملتي الأول وبعدين جملته
وكل واحد عليه الدور يجيب القصة من الأول وبعدين يقول جملته
مثلا
روحت السوق
روحت السوق اشتريت خيار
روحت السوق اشتريت خيار وقابلت عمرو …
وهكذا

🎈عروستي
حد هيفكر في كلمة ..
وبعدين التانين يقولو له عروستي
فهو يوصفها بحاجة .. فيخمنوها
لو صح تمام .. لو غلط يسألوه تاني عروستي لحد ما يعرفوها

🎈احكي له عن نفسك وأنت صغيرة
بننسى في زحمة الدنيا نكلمهم عن حياتنا
كلموهم عن فشلكم ونجاحكم
وعن ذكريات طفولتكم … 💓
يوم لما جدتك لعبت معاك ..
وجدك لما شالك
ولما دخلت الامتحان ومعرفتيش تحلي
يوم ما دعيت ربنا 💓

🎈اقروا كتاب
لو بتقري كتاب أو مش بتقري ..
لازم تعودي نفسك إن ابنك يحب الكتب ..
هاتي كتاب من الكبار دول .. في حاجة بتحبيها ..
واشركيه معاك كل يوم تقروا صفحة وتشرحيها له
او تدوروا على النت لو مش فاهمينها 😉

🎈اتفرجوا على برامج هادفة
الشخصيات المبهرة محيطة بأولادنا في كل حتة ..
ليه مش نقدم لهم نماذج مشرفة؟
زي برنامج خواطر مثلا …

🎈حرب المخدات
جو المرح المنعش 🤩
مخدات الأنتريه أو حتى السرير .. وإديلهم ما ترحميهومش😂

🎈اتفرجوا على ألغاز
في على اليوتيوب فيديوهات صغيرة فيها ألغاز
اختاري فيديو واتفرجوا عليه وحلوا اللغز
زي الرابط دا مثلا (يرجى إغلاق الصوت للموسيقى)
https://youtu.be/oOd8Qpif1Gc

🎈تابعوا اليوتيوب
الجي ميل عامل خدمة ظريفة
تعملي لابنك إيميل ويكون لك إشراف عليه
حلو لو ساعدناهم يكون لهم إيميل .. ويشتركوا على قنوات في اليوتيوب محددة
ويتابعوا إشعاراتها وتتفرجوا على الجديد منها سوا 🤩
زي مثلا قناة “حرف إبداعية في ٥ دقائق”

⁦2️⃣⁩ وقت يتعلم إزاي يلعب👣
“لو عندك أكتر من طفل ممكن تعليمهم اللعبة وتنسحبي”

⁦🖍️⁩الرجل المشنوق hang man
لعبة كنا بنلعبها زمان ..
حد يفكر في كلمة .. وعلينا تخمينها
هنسأله سؤال إجابته نعم او لا
وبعد ما يرد نخمنها
لو صح تمام
لو خطأ .. هيرسم أول خطأ لنا على شكل دائرة وهي وش الرجل المشنوق
ونفضل كده لحد ما يرسم عصاية لجسمه .. والذراعين والرجلين
يعني مسموح ب ٦ أخطاء فقط
الراس والجسم واليدين والرجلين
ممكن نزود عينين وفم ومناخير عشان نزود الوقت 😉

⁦🖍️⁩بينجو
لعبة بينجو المعروفة
ورقتين ونرسم في كل ورقة جدول عبارة عن ٥×٥
ونكتب جواه من ١ ل ٢٥ غير مرتبين
ونكتب كلمة bingo
وكل واحد يختار رقم .. ونشطب عليه كلنا
لو حد شطب على 5 ارقام افقي أو راسي أو زيجزاج
يشطب على حرف من كلمة bingo  لحد ما يخلص الكلمة ..

⁦🖍️⁩أتوبيس كومبليت stop it complete
لعبة بنت ولد جماد حيوان نبات بلاد
نختار حرف ونجيب لكل المجالات دي كلمات بتبدأ بيها
ممكن نلعبها على 28 يوم لحد ما نخلص الحروف كلها 😍

⁦🖍️⁩فن الأوريجامي أو الكويلينج
اليو تيوب ملياااان 🤩

⁦🖍️⁩يتعلم رسم الكرتون لو فوق ١٠ سنوات
ممكن يتابع المسلسل دا
كيف ترسم الكرتون

⁦🖍️⁩ألعاب ورقية
اكتبي على اليوتيوب هيطلع حاجات تحففة🤩
زي دي كنا بنلعبها زمان
https://youtu.be/AacOP3B9Y6U

⁦🖍️⁩كتب التسالي
منتشرة جدا في المكتبات ومعرض الكتاب أهو تقدري تجيبي منه
وفي كتب جاهزة للطباعة على الإنترنت كمثال
https://drive.google.com/folderview?id=0By5d2JPSxqAiM0duRnpZTUplaDg

⁦🖍️⁩مجلات هادفة
زي ماجد أو ميكي أو اللي هو يحبه

⁦🖍️⁩فوازير
سن الألش لازم فوازير😅
كل الفوازير بتاعة زمان بقى ..
حاجة بعينين ومبتشوفش؟ المقص .. وهكذا
أقولك على سر ..
سيري على نظام الاندرويد عندها نكت وفوازير 😉
خليهم يكلموها ويسمعوا ..
بس احذري .. النكت بتجيب الضغط والسكر مجتمعين 😅

⁦3️⃣⁩ وقت مع الأصحاب أو الأقارب👬👭
“في الغالب بيعرفوا يلعبوا إيه أحسن مننا، بس لو مبيعرفوش فدي أفكار للألعاب الجماعية “
📌أي ألعاب تنافسية بننتظر الكل يوصل للنهاية، حتى لو متأخر ، مفيش مبدأ المكسب والخسارة هنا خالص بالعكس كلنا بنوصل📌

🤸التليفون الخربان
تقعدوا في دائرة، وحد يقول كلمة بسرعة في أذن اللي جنبه
الكلمة بتتنقل بينهم لحد آخر واحد يقولها
هتطلع كلمة مالهاش علاقة باللي استقالت 😅

🤸تمثيل حركات
يقفوا صف ورا بعض كل واحد وشه في ظهر التاني
ما عدا آخر واحد
وشه العكس
واحد بقى هيكون معاه يعمل كام حركة ورا بعض
وعليه بقى ينقلها للي قبله
واللي قبله ينقلها للي قبله
لحد آخر واحد.. يعملها ونشوفها صح ولا غلط

🤸غمزة
اوراق بعدد اللاعبين صغيرة
كلهم فاضيين ما عدا واحدة عليها رسمة عين
كل واحد بيختار ورقة مقفولة
اللي تيجي العين معاه
عليه يغمز للباقي ماعدا واحد ..
كل الي اتغمز له بيحط الورقة على الأرض ..
الأخير يخمن بقى مين اللي معاه الورقة😅

🤸المنديل
شرحها في الفيديو دا
https://youtu.be/WRv945izAWw

🤸بالونة في وسط اتنين
كل اثنين بينهم بالونة ويحافظوا عليها لحد لما يوصلوا لخط النهاية

🤸أكياس المخدات
كل واحد يلبس كيس مخدة في رجله الاثنين وينط بيه لحد ما يوصل لخط النهاية
“استغني عن أكياس المخدات عشان في احتمال تتقطع 😅”

🤸 كل اثنين يربطوا رجلهم في رجل بعض
بإيشارب عندك
ويحاولوا يوصلوا لخط النهاية سوا

🤸 واحد يمسك رجلين التاني
والتاني يمشي على إيديه
ويحاولوا يوصلوا لخط النهاية سوا

🤸اضربي كمية كريمة كتييير
وطبقين
وحطي في قاعهم عملة معدنية في كيس صغير
وحطي الكريمة فوقيها
وعلى المتسابقين يوصلوا للعملة ببقهم 😋

اشركيه معاك وقت الطبخ أو شراء الهدوم أو ترتيب البيت
علميه يعمل وجبة لنفسه بسيطة🤩
لازم يحس بإنه بيته هو كمان وبانتمائه له وللأسرة💓

لو ولد خليه يساعدك في شراء حاجتك زي اكسسواراتك وبرفاناتك ..
لو بنت خليها تجيب هدية لوالدها 😍
انتظرونا في المرح في بيوتنا الحلقة القادمة 


المصدر:كوكبنا

أضف تعليق