المرح في بيوتنا ..الحلقة 6: قضاء وقت مرح مع ابنى المراهق

المرح في بيوتنا ..الحلقة 6: قضاء وقت مرح مع ابنى المراهق

المرح في بيوتنا ..الحلقة 6: قضاء وقت مرح مع ابنى المراهق

إزاي أقضي وقت مرح مع ابني في مرحلة المراهقة❓

كل ما نسمع كلمة مراهقة .. بنخاف .. بنقلق ..😨
بنحس إنها أصعب مرحلة ممكن تمر بيني وبين ابني ..
بنتخيل إن خلاص مفيش طريقة للوصول لاتفاقيات وحلول معاهم ..
دماغهم بقت ناشفة .. 😓
قلوبهم بقت صعبة ..
حياتهم بقت مخنوقة ..

فكرت في رصيدك عنده قد إيه؟!
في وقت بتقضوه سوا دلوقتي؟!
ولا حاسة إنه كبر خلاص؟🙄

هو سن محير .. حقيقي ..
مش عارفة تعامليه إنه راجل أو إنها بقت آنسة كبيرة ..
ولا لسه عيال صغيرين؟!

كلمة السر .. المرح🤩

تقضيتكم لوقت مرح سوا هيعلي رصيدك عنده .. ويكسر حاجز الثلج اللي بينكم ..

يمكن في الأول هيستغربك ..😒
بس تعودكم على وقت المرح اللي بينكم هيفرق كتير في علاقتكم ..😍

اتفقنا قبل كده إن السن دا محتاج منك مرة في الشهر ..
مرة واحدة على الأقل تفضي له نفسك ..
بس مرحهم غير ..
هما مش مروان هيلعب سبت حد ويتبسط على كده 😅

وقت المرح اللي بينكم .. محتاج مشاركته ..⁦👨‍👩‍👦⁩

هنقدم لكم بعض الأفكار اللي ممكن تساعد على أنكم أنتم الاثنين تقضوا وقت مرح يعلي رصيدك عنده بإذن الله ..

🎯بابا .. دورك هنا خطير ومهم ..🎯
لا تغفل عنه ..👍

هنقسمهم ل ٣ أقسام:
⁦1️⃣⁩ وقت مرح في البيت 🏡
⁦2️⃣⁩ وقت مرح خارج البيت🌄
⁦3️⃣⁩ أفكار مطرقعة🎉

⁦1️⃣⁩وقت مرح في البيت🏡

🏡سينما منزلية
لا لا ..
مش بس تختاري فيلم هادف أو كرتون عشان اتفرجوا عليه مع فشار وكده ..
إحنا هنعمل سينما بجد ..
هنعمل تذاكر .. وهيجوا يقطعوا التذاكر من المطبخ ..
وبعدين هيختاروا ياكلوا إيه معاهم ..
وهنعمل فلوس مزيفة أو حتى حقيقية بس تاخديها منهم في الآخر 😂
وهنطفي النور ..
وهيختاروا فيلم من الأفلام اللي هتعرضيها عليهم ..
وهتحجزي لهم كراسي محددة والاتفاق هيبقى في المطبخ كإنه مكتب حجز التذاكر والأكل ..
وهتوصليهم لكراسيهم ومعاهم أكلهم ..
ويبدأ الفيلم .. وفي استراحة في النصف ..
وبعد ما الفيلم يخلص هننور النور ويخرجوا طابور من الصالة 🤩
هي مرة في الشهر نجهز لها قبلها بقى 😉

🏡من سيربح المليون
أسئلة ولها ٤ إجابات
والفوازير مرطرطة على الإنترنت
وورق بقى نطبعه أو نكتبه ..
ممكن بابا يساعدنا في النقطة دي ..
ولما ياخد السؤال يكون له وقت محدد ومعاه ٤ مساعدات ..
وممكن كفكرة مجنونة نحط جدو ولا تيتا في قائمة المتصلين 😍
بالاتفاق معاهم طبعا ..
ونعمل شيك بالمراحل المطلوبة عشان لما بعديها نقوله ” فيك تكتفي بها الشيك ” 😅

🏡ألعاب الكترونية
البلاي ستيشن أو الوي أو التاب أو اللاب أو الموبايل ..
شاركهم في ألعابهم والعب معاهم دور ..
وقت خاص على طريقتهم 😉
عارفة يا ماما إن مالكيش في الجو دا ..
خليه يعلمك .. وعلى كمية الضحك اللي هتضحكوها 😂

🏡قاعدة في البلكونة أو السطح
اتفقي معاه إنك عاوزة تصحيه الفجر معاك
يا ريت تصلوا الفجر سوا وتبدأوا قاعدتكم ..
حتى لو مستغرب .. شجعيه ..
قوليله حابة أقعد معاك شوية ولو مرة واحدة ..
بحب قعدتك قوي 😍
الوقت دا بتاع الرغي ..
ما تساليهوش لا مذاكرة ولا أصحابه ولا اي حاجة..
اعملوا شوبين كاكاو واقعدي ارغي معاه شوية ..
عن نفسك ..
كلميه عن حياتك .. عن طموحاتك القديمة
اللي حققتيه واللي نفسك تحققيه ..
عن أهلك.. عن طفولتك ..
عن أصحابك .. مين فيهم لسه في دائرة الصداقة ومين خدته الأيام ..
بعد القعدة الحلوة دي اشكريه إنه إداك من وقته وإن دا شيء أسعدك جدا 💓
بوسة وحضن بقى بعد الكلام الحلو دا 😍

🏡أكلة على ذوقك
قوليله عاوزين ناكل من إيديك الحلوين ..
اختار أكلة من الإنترنت ونجمع مكوناتها وتطبخها لنا ..
وأنت هتكون مساعد الشيف ..
يعني هو اللي يقولك تعمل إيه ومتعملش إيه ..
ونشوف أخرى العكيكة إيه بقى 😂
وهتكون غداكم .. وهتاكلوها بجد ..
نتفق مع أفراد البيت على الحكاية دي قبلها 😅

⁦2️⃣⁩ وقت مرح خارج البيت 🌄

🌄خروجة في كافيتيريا
ابعتي له دعوة على إيميله أو موبايله حسب المتاح
برسالة رسمية تبدأ ب ” نتشرف نحن عائلة فلان الفلاني بدعوتك إلى …….” وهكذا
وتكتب اليوم والساعة بالضبط
وأكد معاه الوقت قبلها ..
وتخرجوا تشربوا حاجة سوا ..
خليه يختار لك الي هتشربه 💓

🌄فلوكة في النيل
اتمشوا سوا في الشارع وفاجؤوهم برحلة في النيل
حتى لو مرة في السنة هتفرق معاهم قوي 😍
طبعا الكلام دا لو قريبين من كورنيش. او في فرصة لدا ..

🌄مفاجآت السفر
بيحبوا المفاجآت قوي قوي ..🤩
فجأة كده اتفقوا ماما وبابا على السفر وحضروله من غير ما تقولولهم ..
وقولولهم قبلها بالليل يا دوب يحضر شنطته ..
اختاروا الوقت المناسب للسفر ..
ويا سلام لو قدرتم تغيروا طريقة السفر ..
مثلا بالقطر أو الباص ..
حسب إمكانياتكم ..👍

🌄قعدة مع أصحابهم
قوله اختار أكتر اتنين من أصحابك يخرجوا معانا ..
لو ماما اخرجي مع بنتك .  لو بابا اخرج مع ابنك
وروحوا مكان يختاروه سوا ..
ممكن تديله مبلغ يخرج مع أصحابه لوحدهم ..
وثق فيه ..🥰

🌄 أماكن خروجاتهم
لو ولد .. اعزمه على صالة بلياردو أو بولينج  أو ملعب لرياضة بيتدرب عليها ..
لو بنت .. اعزمها على خروجة تسوق سوا باكسسوارات مثلا
يا سلام لو تقلبوا ..
البنت مع أبوها والولد مع أمه ..
جربوا مش هتخسروا حاجة ..

⁦3️⃣⁩ أفكار مطرقعة 🎉

🎉خروجات المفاجأة
لو معندوش خطط وأنت عارف
فاجئه بخروجة حالا
البس وانزل حالا نتمشى .. نتفسح .. ناكل ذرة ونرجع ..

🎉صحيه من النوم بالليل وقوله عاوزك ضروري
ولما يطلع تكون محضر فشار تاكلوه سوا
والأجمل .. تطلب منه تصلوا سوا ركعتين وهو يكون الإمام .. أو هي تأم أمها ..

🎉اتصل بيه لو بره لو سنه كبير شوية .استناني عند الحتة الفلانية أنا جاية حالا
وتروحوا تجيبوا هدية لجدته أو تجيبوا لبان وتيجوا 😅

🎉لو له هوايات شجعيه يعرضها على الإنترنت
مدونة أو قناة على اليوتيوب

🎉حضري لهم حفلة من غير مناسبة
وفاجئيهم بيها

🎉اعملوا علبة يكتب فيها حاجات مطرقعة من تأليفه
واتفقوا على يوم في الشهر ثابت لعمل الحاجة دي سوا
أول خميس في الشهر مثلا
حاولي مش ترفضي اي حاجة .. خلي في مفاوضات عشان يحس فعلا إنك صادق في كلامك 😍

الأفكار تبدو مرهقة ..
بس مش لازم كل مرة نعمل حاجة مكلفة أو مرهقة ..
كل سنة حتى حاجة مكلفة أو محتاجة مجهود ..
على الأقل هيكون عندكم ١٠ مواقف اتحفرت في الذاكرة قبل ما يكبر ويسبب العش ..😓
ورصيدنا يعلى عندهم ..😍

وهما في سن محتاجة لرعاية من نوع مختلف ..
إياك تستكتر الحضن والبوسة ..
هما لسه في ريعان النضج .. لسه محتاجين حضنكم وقبلاتكم ..
انتظرونا في المرح في بيوتنا الحلقة القادمة 

المصدر:كوكبنا

أضف تعليق