المرح في بيوتنا ..الحلقة 7: الصباح المرح

المرح في بيوتنا ..الحلقة 7:الصباح المرح

المرح في بيوتنا ..الحلقة 7: الصباح المرح

هل وقت المرح محدد؟!⁦⏱️⁩
بعد رحلاتنا السابقة في قضاء وقت ممتع مع أولادنا ..
هل من حقي تحديد وقت المرح اليومي مع ابني عشان أزرع ذكريات جميلة معاه؟!
هل دا كافي؟!

الإجابة .. لا …
أومال إحنا كنا بنقول كل الأفكار السابقة دي ليه كلها؟!😅
عشان نوضح لماما وبابا إن المرح قريب وسهل ..
مش محتاج يترتب له كتير ..
ولو ماما وبابا لسه في محاولاتهم الأولى مييأسوش ..
ويعرفوا إن البداية من وقت صغير نحاول نستمر عليه ..
ونعلي رصيدنا عند أولادنا عشان يستحملونا في الوقت الغير مرح اللي حتما ولا محالة هيحصل 😓

رحلتنا دلوقتي هنكمل فيها عن إزاي نخلي بيوتنا مرحة .. بدون تكلف .. بدون تعقيد ..

لو جينا نشوف إيه أهم الأوقات اللي بتمر علينا في بيوتنا، هتلاقي الآتي:

وقت الصحيان ⁦☀️⁩
وقت النوم🌑
وقت الخروج من البيت⁦🏙️⁩
وقت الدخول للبيت🏠

غالبا دول أكتر ٤ أوقات مهمة بيعدوا علينا مع أولادنا ..
وغالبا لما بنضبط ساعة المرح في الأوقات دي ونقلل من اللوم والعتاب والصراخ والعصبية ..
بنحصل على وقت هادي مع أولادنا، وقت فيه ذكرى جميلة حقيقية 💓

⁦☀️⁩وقت الصحيان⁦☀️⁩

💞يجعل صباحك صباح الخير يا أسطى عطية

💕صباح النور على البنور يجعل يومنا هنا وسرور

💕صبح الصباح فتاح يا عليم والجيب مفوهش ولا مليم

💕يا صباح الخير يا اللي معانا .. دا الكروان غنى وصحانا ..

جربت مرة ابنك يقولك صباح الخير فتغنيها له😅

جربت تألفي أغنية لوقت الصبح لما يصحى وتشوفيه تغنيها له 😍

إيه الصباح الجميل دا؟! 💓

أو تعبري له عن مدى فرحك بإنه صحي من النوم ..

💕صباح الخير على عيونه

💕صباح الورد على الحلوين

💕صباح الخيرات على حبيب قلبي

يا صباح اللي بتغني 😅

يا سلام لو مع الكلمة الحلوة دي .. حضن دافي من ماما وقبلة على الخد أو الجبين ..

تعرفي إنك بتعملي وقاية ليومك بحاجة بسيطة زي دي ..
بتمنعي حدوث نكد كتيير الصبح لما بتعلي رصيدك عندهم في الوقت دا ..
الحضن والقبلة والكلمة الحلوة تعلي الحب والقرب وتقلل النكد والضيق ..😻

حاجة مش هتاخد ٣ ثواني بالعدد ..
لكن أثرها رائع لما تكرريها كل يوم مع أولادك واحد واحد ..

افتكري إنك دائما بتلوميهم إنهم بيطلبوا حاجات عجيبة قبل النوم وأنت بيبقى بنزينك خلص ..
ووقت الصبح هو أكتر وقت بتكوني فايقة فيه ..

اثبتي لهم إن لك وجه جميل فعلا بيطلع لما تكوني فايقة .. وإن الوجه التاني دا سببه إنك بتكوني مرهقة طول اليوم مش قادرة تدي ..

أقولك على سر🤫

لو كررتي العملية دي كل يوم .. ونسيتي مرة تعمليها ..
هما هيفكروك😍

طب الولاد اللي نومهم تقيل ولازم يصحى عشان المدرسة أو عشان ورانا مشوار أو عشان ينام بدري بالليل ؟!🙄

خدي الكبسولة دي وادعي لي

💊أولا .. لازم تعرفيه قبلها بيوم إنه هنحتاج نصحى بدري بكرة وتذكري الأسباب وتتكلموا عن عواقب التأخير دا ..
واتفقوا تناموا بدري عشان نصحى بدري..

💊ثانيا ..لازم تصحي ابنك قبل ساعتين من المشوار
مينفعش أنت عارفة نومه تقيل وتصحيه قبلها بنصف ساعة
كده إحنا بنقول للنكد تعالى بسرعة إحنا مستعجلين

💊ثالثا .. نامي أنت بدري عشان هتصحي بدري قوي تحضري حاجتكم عشان نقلل من خناق الصبح ..

💊رابعا .. اقعدي جنبه وطبطبي على ظهره وادعيله .. وغنيله .. وزغزغيه .. وفكريه باتفاقكم

💊خامسا .. لو صحي اشكريه على إنه كان قدر الاتفاق وإن دا شيء أسعدك حقيقي ..
لو مصحيش لازم تكون في عاقبة لدا حقيقية ..
لو المشوار اللي هتروحوه يهمه يبقى عارف إنه للأسف مش هنعرف نروحه بالشكل دا
لو ميهمهوش يعرف إنك بتزعلي من كسر الاتفاق وإن دا شيء للأسف بيزعجك
والكلام دا يتقال قبلها بيوم ..
ما تعاقبيش على حاجة أنتم ما اتفقتوش عليها أصلا

وقت الصبح دا مهم لينا كلنا .. مش لأولادنا بس ..

أنت لو صحيت على خبر حلو او كلمة حلوة أو لفتة حلوة من زوجك ..  هتلاقي نفسك يومك أحلى وفرحانة ومقبلة على الحياة..😍

لو صحيت على خبر نكد او كلمة وحشة أو نقد .. هتلاقي يومك اتقفل من قبل ما يبدأ😔

وأولادنا زينا ..
ومشاعرهم زينا .. يمكن أقوى ..

لو حس إنه مقبول .. هيكمل. .ورصيدك عنده يعلى ..👍

لو حس إنه منبوذ .. هيكمل .. بس بالعكس .. ويبقى مصدر إزعاج .. ورصيدك عنده يقل ..👎

قولولنا بتستقبلوا صحيان ولادكم إزاي كل يوم؟!

انتظرونا في المرح في بيوتنا الحلقة القادمة 

المصدر:كوكبنا

أضف تعليق