المرح في بيوتنا ..الحلقة 9: وقت النوم المرح (2)

المرح في بيوتنا ..الحلقة 9: وقت النوم المرح (2)

المرح في بيوتنا ..الحلقة 9: وقت النوم المرح (2)

إن الوقاية خير من العلاج ..
وإن في أسباب كتيرة لهيبرة الولاد ولقلة نشاط ماما بالليل، بتخلي وقت النوم وقت تقيل للأسف، رغم إنه من أفضل الأوقات اللي نقدر نخزن فيها ذكريات حلوة مع أولادنا ..😍

لبستِ الخوذة والبدلة العسكرية يا ماما؟! 💂
إذن .. هي الحرب 😅

للاستعداد للحرب المسائية لازم ماما تبقى عارفة شوية قواعد

الأولى: تحديد وقت الصحيان🕗

زي ما قرأتيها كده يا ماما يا حلوة ..
الصحيان هو اللي نثبت وقته، بالتبعية هيجوا وقت النوم مفرهدين ومسلمين نفسهم😁

ولادك لو بيناموا ١٢ وأنت عاوزاهم يصحوا ٨
غالبا دي محض أحلام
وهيصحوا مقريفين جدا
يبقى اللي هيحصل إننا هنخلي وقت الصحيان ١٠
نثبته أسبوع
وبعدين نقلل نصف ساعة كل أسبوع لحد ما تضبط
ودا هيخليهم بالليل خلاص مش قادرين وعاوزين يناموا في ميعادهم ” لو التزمنا بشروط الوقاية”📌

الثانية .. ناخد كل احتياطتنا في الوقاية💊
ممنوع الحلوى بعد ٦ مساء❌
النهار يخرجوا طاقتهم في اللعب ولو مرة في الأسبوع خروجة خارجية في حديقة – مش في مول-❌
عدم الضغط عليهم في المذاكرة والمسابقات والحفظ لإن دا بيرهق دماغهم وبيجوا بالليل عاوزين يستمتعوا بالهدوء اللي في البيت ❌

الثالثة .. وقت ما قبل النوم لا يزيد عن نصف ساعة⁦⏱️⁩
مهما كانت محاولاتهم لإطالته بنعتذر بطريقة شيك ونستسلم للنوم
ووجود روتين يومي متغير هيخليهم بإذن الله أهدى في استسلامهم للنوم 💤

الرابعة .. إطفاء الأنوار وقت النوم في البيت بالكامل💡
لما ييجي وقت النوم لازم البيت يبقى هادي ..
كل البيت بيستسلم للنوم
يا ريت ما نتكلمش عن السهرة اللي هنسهرها لما يناموا
أو الوقت اللي هتقعدي فيه تخلصي اللي وراك لما يناموا

إحنا كلنا بنتجهز للنوم أيا كان خططك إيه ليلتها⁦✍️⁩

الخامسة .. الروتين المتغير⁦⁉️⁩
الروتين معروف ..
ومتغير معروف ..
لكن إيه بقى عم الروتين المتغير دا بالضبط؟! 😅

الطفل بطبعه محب للروتين المعروف ..
أو خلينا نقول أغلب الأطفال ..
لكن برضو بيحبوا التغيير ..

فالفكرة إننا بنثبت وقت النوم .. دا روتين
لكن نغير محتوى الجلسة .. دا التغيير ..

إننا نثبت غسل أسنانا ورجلنا قبل النوم .. دا روتين
لكن نغير ترتيب الروتين اللي عارفينه مرة كده في الأسبوع .. دا تغيير

إننا كل مرة نحكي نفس القصة اللي بيحبها .. دا روتين ..
لكن نغير في قصتنا المحفوظة لحاجة مضحكة تانية .. دا تغيير

وهكذا ..
هل دا صعب؟!

بصراحة لو فكرت فيه كده هيكون صعب ..
لكن لو أشركت ولادك معاك .. هتبقى مرحة جدا 😂

بعد غسل الأسنان ..
وهنقعد على السرير ..
قوليلهم تيجوا النهارده نغير حدوتنا لحدوتة تانية ..
ممكن تتخيلوا شخصية وكل واحد يحكي حاجة فيها ..
شكلها .. طباعها .. أكلتها المفضلة ..
وتعملوا سوا سلسلة قصص جديدة من تأليفكم 🤩

ممكن تقوليلهم .. تحبوا تبدأوا تعملوا إيه النهارده؟!
تغسل أسنانها ولا نحكي القصة الأول ..

وهكذا ..

بس كده ما هيصدقوا بقى والموضوع يطول وأنا عاوزة أنام أو أقوم أخلص اللي ورايا؟!😭
هتحتاجي تكملي قائمة الممنوعات معانا عشان تقدري تتحكمي في وقتك بإذن الله معاهم …

🚫ممنوعات🚫
عشان نحط حدود لمعركتنا 😅
لازم ناخد بالنا من بعض النقاط اللي ممكن العدو يطب علينا منها 😂

⁦1️⃣⁩الأحداث اللي فيها تفكير 🧠
في الوقت دا ممنوع نشغل عضلة تفكيرهم ..
زي مثلا ..
🧐تعالى نحل مسائل حسابية
🙄فوازير ابن خالتك الوحيد لابن عمتك
😒لو كنت مكان البطل كنت هتعمل إيه – دي في وقت تاني الصبح مش دلوقتي-
😱فاكر لما روحنا لعمتك وكان عندها فازة حمراء فيها ورد أصفر ووردة بيضاء دبلت وكان في دبانة واقفة على مناخير باباك
❌ابعدي عن التفاصيل ❌

خلي كلامكم هادي ويوحي بالنوم ..

والجأي للحيلة اللي كل الأمهات بتعملها ..
تثاءبي 😂
بس خليها سلاح أخير بقى لما يبقوا رافضين الاستسلام 😅

⁦2️⃣⁩الأكل الدسم🥘
الغداء بتاع بالليل اللي كله دهون دا صعب جدا
ومرهق لهم ولجسمهم وصحتهم
الأطفال الرضع اللي بنأكلهم خلطة أرز المحشي عشان يناموا
دا تدمير لهم .. ممنوع❌
والكبار لو جاعوا .. يبقى فاكهة وخضار وفقط

⁦3️⃣⁩التليفزيون والشاشات📱
حتى لو جربت يناموا عليها وفعلا بيناموا
للأسف دا دمار لخلايا مخهم😓
ويخليهم يحلموا بكوابيس بالليل
ممنوع يا ماما حبيبتي مهما كان فيه لذة
حتى لو كانوا مراهقين ..

💤أنشطة وقت النوم💤

📖حكي قصة
طبعا دا الطلب الرسمي للأطفال أقل من ١٠ سنوات أو يمكن أقل من كده شوية ..

لو بتعرفي تألفي قصص أو مبتعرفش
📍تقدري تعتمدي على مصدر للقصص متاح ..
زي تطبيق قصص عصافير مثلا ..

📍شخصية باسم مضحك وبيعمل مغامرات
طفل اسمه زعبلاوي بيعمل كل مصيبة والتاني وبعدين يكتشف خطؤه ويحاول يصلحه ..
الاسم يكون غريب .. هيقولولك عاوزين قصة زعبلاوي
الأحداث تبقى مضحكة 😂
مفيهاش تفكير بس مضحكة ..
ويا ريت ميكونش فيها وعظ .. كل الحاجات دي الصبح ..

📍قصص تبديل الشخصيات ..
لو الفرخة بقت ثعلب والثعلب بقى فرخة ..
لو التليفزيون بقى شبشب والشبشب بقى تليفزيون ..
لو عمار بقى مروان ومروان بقى عمار (أسامي ولادك) 😂
وقصة بقى يعدوا فيها وكل واحد يعمل عملة غير متوقعة ..

📍سن من ٣ ل ٥ بيحب تحكي أحداث يومه
يعني تقولي اسم غير اسمه
صحي وعمل كذا وكذا وكذا
وكل الكذا دا من أحداث يوم الطفل ..
بيتبسطوا قوي في الغالب😅

💬دردشة
إيه أكتر حاجة حصلت النهارده فرحتك؟!
إيه حاجة ضايقتك؟!
عاوز تعمل إيه بكرة؟!
احكي عن يومك؟!
وأنت كمان جاوبي معاه ..⁦❤️⁩

📃أذكار النوم
لو أصغر من ٦ قوليها معاه
لو أكبر حفظيهاله ..
ويتعلم سنة النبي في النوم بالنهار .. ويطبقها بالليل ..

🎶أغنية إلى النوم
يلا يا سريري أنا جاية ..
علشان أنام نونة نونة ..
هننام النهارده ..
وراح نصحى بكرة ..
إن شاء الله ..
إن شاء الله ..
أي أغنية جميلة صغنونة تقوليها بعد النشاط اللي هتعملوه سوا بإذن الله

😍تصبح على خير وقبلة على الجبين
دي بقى بتشيل أي حاجة قبلها 😍
يعني لو مقدرتيش في يوم تحكي الحدوتة المفضلة ..
مقدرتيش توفي بوعدك في حاجة معينة ..
عاوزة تقومي من غير خناق ..
كل دا تمسحه قبلة الجبين والحضن وكلمة ” تصبح على خير يا حبيبي”
وهيفكرك بيها بعد كده لو نسيتي 😍

أكيد مش كل يوم هيكون يوم مثالي ..
وأكيد هتحصل أخطاء ..
وأكيد ماما هتزعق ..
ماما هتضايق ..
ماما هتنفخ من الغيظ ..

لكن تبقى اللحظات البسيطة دي اللي تمسح كل اللي بيمر بينا غضب عنا 🌹

انتظرونا في المرح في بيوتنا الحلقة القادمة 

المصدر:كوكبنا

أضف تعليق