تعرفى على نصائح مدرسية لطفلك

نصائح مدرسية لطفلك 


اولا بالنسبة لنمط الطفل

الطفل الحركي يحتاج الي
ان نتركه يتحرك اثناء المذاكرة او الواجب ولو ان يلعب بقطعة صلصال او عجين او يويو  لان الحركة تزيد تركيزه/لا تطلب منه اعادة التسميع وراك لانه حافظ بس مش سهل عليه التسميع /لا تكون عنيف معه إطلاقا/استعين بمجسمات لنقل فكرة المذاكرة مثال كرة ارضية او ماكيت
الطفل الحركي لازم المدرسة تفهمه ولو مفهمتوش انت متهاجموش كولي امر وافهمه…
الطفل الحواري بقه…. بيبيعك ويبيع فكرة المذاكرة لو بتهزئه كتير بلاش تهزئه ياريت تشجعه بالكلام بس متبالغش لانك عندما تبالغ في مدحك له يكذبك ويعتقد انك تجامله
الطفل محب الهدايا بيحفظ عن طريق الصور يبحلق في الكلام و يحفظ ومش لازم يردد كتير وراك ولا لازم يكتب …

ثانيا بالنسبة للمدرسة

احنا في مجتمع بيتعازم علي بعضه بالتوحد وفرط الحركة ياريت منسمعش غير من متخصص نفسي وبلاش فوضي التشخيص وهم ابرياء
وانصح اخواني المدرسين الافاضل بتشغيل الطفل الحركي ومسح السبورة وتوزيع الكراسات ومراقبة المشاغبين حتي يصبح مطيعا وبلاش نهاحمه لكن ياريت نشغله معانا كذراع يمني للمدرس
وياريت الاخصائي الاجتماعي نلاقيه في المدارس تاني وياريت في المقابلات بتاعة اولياء الامور نطالب بده ونتحد كأولياء امور وانا من هنا اعلن عن استعدادي التطوعي لدعم الأخصائيين بالمدارس في نطاق القاهرة بندوات عن الانماط وده طبعا حسب وقتي وعشان مصلحة ولادنا ،،،
واحيي عدة مدارس جاءتني منها حالات كان للاخصائي فيها دور رائع وهم متابعون هنا منهم من بالمعادي ومدينة نصر تحديدا…

ثالثا:الدراسة مش اهم حاجة في الحياة وعليك بالتالي

قابل ولادك بالترحاب وهم عائدون من اليوم الدراسي الحياة قصيرة عبر فيها عن حبك قول وحشتوووووووووووووني قول حمد لله ع السلامة
واؤكد ان الطفل الحركي لا يحب السرد عما حدث بالمدرسة ولكن ان احترمته يحكي مقتطفات تفهم منها سير الأمور…

احترم سنهم بالنسبة اللي ف كج 1، 2وكمية الواجبات القاتلة اعذرهم وبالراحة عليهم ومتعقدش الدنيا ومش اشكال لو ساعدتهم  وصبرت عليهم

خليك متفاهم ومش اول ما مدرس يشتكي تعمل حكاية المسائل بسيطة وبالتفاهم كده وقدر ان المدرس ساعات من ضيقه بيتكلم ويبان لك الامر كارثي وهو ليس كذلك

جروب واتس اولياء الامور اختراع فاشل أخرج منه… لانه مليان مشاكل والافضل التواصل باسلوب مباشر مع موقع المدرسة عشان متحرقش اعصابك

اعرف ان الايام دي محسوبة عليك ومن اهم ايامك ومش هينفع تضيعها في الزعيق خد الاولاد بالتفاهم

ملحوظات هامة

الطفل الحواري اسهل طفل يتذاكر له متخسرووش بالشتم والعصبية
الطفل الحركي ملول يحتاج اوقات مذاكرة  قليلة واستراحات كثيرة  وبلا عنف واتركه يتحرك
الطفل محب الهدايا عاشق التشجيع بالاستيكرات والبون بون والبسمة الحلوة وعلامة اللايك

رابعا متتحملش فوق طاقتك كأب او كأم

لو مش قادر مع انك حافظ قرآن كريم تحفظ ولادك استعين بحد…لو مش قادر مع انك خريج السن انجلش تذاكر انجلش استعين بحد…..
لكن مش لازم تشيل هم كل شئ
من الممكن ان ححات معينة تسهل اوي قصة المذاكرة
الهدوء عموما مع الاولاد وعدم العصبية ،،
ابدأ من الان …
علاقتك بهم اهم من اي شئ #ايوة اهم من المذاكرة
الطفل المهمل من المفيد انك تتركه يتحرج احيانا مع المدرس ولا تبادر بتنبيهه سببه يخاف ع مصلحته ..

خامسا الطفل اللي بيضيع حجاته

دايما كلمه بثقة انه حد محترم
ولو ضيع حاجة متلومش وقوله انا واثق انك هتخلي بالك وان الموقف ده مش هيتكرر
هيتغير ان شاء الله ♥

سادسا الطفل غير الاجتماعي او المنقول جديد

نعمل له حفلات مع زملائه
ونعزمهم …ونساعده  ع تكوين علاقات

سابعا الطفل الرافض للمدرسة اشعره انك مقدر إحساسه وتعاطف معه لكن خذ شكواه باهتمام  وليس بتكذيب

لا تقارن بين اولادك وبعض كل واحد له إمكانيات
المدرس المصري يحتاج التشجيع والاحترام اعطه تقديرا واحتراما وثق فيه ولا تجري علي الادارة تشتكيه….وتعامل معه كانسان مهموم كادت الهموم ان تشقه نصفين وقدره وقل له انا منتظر علي ايدك كل الخير
الاطفال اللي في دول عربية  أخرى ومعاهم جنسبات كتير قدروا شعورهم ادعموهم ……

الاطفال اللي بترفض الكتابة بالراحة عليهم

ومتغصبش عليهم ولا تعنفهم
عاوزة احكي حكايتي مع حبيب عمري  زياد ابني الحركي
كنت حاسة انه مختلف اوي عن اخته الحوارية وشقي ومش بيحفظ بسهولة….والمحفظة بتاعة القرآن اعتذرت عن التدريس له
وانا ووالده خريجا كلية من كليات القمة
كنا شاطرين دراسيا..كنت خايفة اوي يفشل
لكن مش ناسية وانا بابص في عينيه وباقوله بثقة رهيبة اول يوم في المدرسة انت اللي هترفع راسي انت اشطر واحد في مدرستك
كان ينظر الي….
بتركيز..الكلام ده وهو 4سنوات او 5
الان هو 11ما شاء الله ♥ ولسة فاكر كلمتي وبيقول لي مش ناسيها
شجعوا ولادكم 
كونوا اول مراية شافوا فيها نجاحهم

أضف تعليق