سلسلة فى بداية حياتى العملية..أصغ جيدا لما يقوله أعدائك

 سلسلة فى بداية حياتى العملية..أصغ جيدا لما يقوله أعدائك 

 سلسلة فى بداية حياتى العملية..أصغ جيدا لما يقوله أعدائك


بمناسبة الجو العظيم ده والناس اللى فرحانه بالمطر فأنا قررت اصدعكم شويه واكتب بوست من سلسلة #فى_بداية_حياتى_العملية ؛
فى مقولة ل أفلاطون بيقول :” أصغ جيدا لما يقوله أعدائك ففى كلامهم الكثير من الحقيقه التى أخفاها أحبابك”
.
فى بداية حياتى العملية كمحاضر كنت اعرف محاضر شاطر اوى كلمنى أقابله عشان عايز يفتح شركة تدريب واستشارات  المهم قابلته قالى معاه مبلغ معين وحابب يفتح شركة وهيصرف كتير وهيعمل حاجه نضيفه!
فنصحته ميفتحاش دلوقتى لانه شاطر فى التدريب بس لسه معندهوش امكانيات شخصية ومهارات كويسه فى الادارة ودا كان رأيى.
.
المهم قالى مبررات كتير جدا كان اهمها ان له اصحاب هيعتمد عليهم فى الادارة والتسويق وهم مشجعينه جدا ومتحمسين ومحمسينه 
.
فتح الشركة وعدى شهر والتانى والتالت لحد ما عدى سنه كامله وهو قاعد بيخسر والدنيا مضطربة جدا وتقريبا خلص كل الفلوس اللى معاه!

عمل اجتماع لناس كتير من اصحابه اللى شغالين فى التسويق وكنت انا منهم وقعدنا وجاب الفريق بتاعه و عملنا فوكس جروب عشان نشوف هو فى ايه ونحدد المشاكل ونحط حلول ونساعده هو والفريق ، المهم اكتشفت ان الفريق كله شباب هو معلمهم و اخوه الصغير واخته اللى لسه فى الجامعه وكلهم تقريبا شيفينه قدوتهم وهم نفسهم اللى حمسوه انه يعمل شركة وديما بيبرروا الخساير ويعولوا الفشل على وضع البلد او ان فى ركود فى السوق او محتاجين نعمل عروض اكتر او نكثف الدعايا و محدش فيهم قاله انه اصلا مش عارف يدير المكان او فى مشكلة فى الادارة والتوجيه!!

صاحبنا قفل الشركة بعد فترة من الخساير والبهدله وزيه ناس كتير اوى بتسمع كلام ناس قريبه منهم سواء على سبيل المحبه والود او التحفيز والنفخ او المجاملات اللى وراها سبب – زى مجاملات الموظفين لصاحب العمل عشان يحافظوا على اكل عيشهم او يترقوا –
الناس دى بتخسر وقت و فلوس واشخاص وفرص يقدروا من خلالها يصححوا اوضاعهم وتمون نقطة تحول ليهم لكن بيفضلوا تحت تأثير مخدر الكلام الحلو والمدح والمجاملات والنفخ والتخفيز لحد ما بتنفجر الفقاعه دى على خسارة كبيرة اوى من النوع الصعب تعويضه او غلطات وقرارات غاشمه من الصعب العدول عنها..!
.
– متاخدتش قرار بناء على استشارة الناس القريبين منك لانهم بيحكموا بعواطفهم وممكن يغرقوك.
– استشير متخصصين ديما حتى لو هتدفع فلوس ، دا هيوفر عليك كتير اوى.
– حاول توصل لرأى أعدائك فيك لان جزء كبير جدا منه بيكون حقيقى و مش واصلك من اللى حواليك.
– افتح مجال وادى مساحه للناس اللى بتثق فى رأيهم ينقدوك نقد بناء.
– متخليش حد يوجهك لشىء هو مهتم به وشايفه حلو وهيكسبكم ويصرفك عن شىء تانى انت مهم به وشايف انه هيكسبك.
– أعمل الصح

المصدر: Mohamed Green

أضف تعليق