سلسلة فى بداية حياتى العملية..اول وظيفه فى حياتى The first job in my life

 سلسلة فى بداية حياتى العملية..اول وظيفه فى حياتى  The first job in my life

 سلسلة فى بداية حياتى العملية..اول وظيفه فى حياتى  The first job in my life

ميزة القهوة انها بتقلب عليك ذكرياتك لذلك هقولكم حاجه افتكرتها وهصدعكم وامرى لله 🙄

 -فى_بداية_حياتى_العملية اول وظيفه فى حياتى كانت فى المبيعات فى شركة مستحضرات تجميل وكان المرتب ٤٥٠ ج وفى عمولات وبدأت احسب من اول شهر ازاى احوش واشترى عربية ١٢٨ ، المهم جه مدير المبيعات وبيعملنا motivation فسألنى عن ال life goals بتاعتى مكنتش فاهم قصده اوى لانى كنت طفل تقريبا 😅 قولتله نفسي اجيب عربية وشقه!
قالى اى شقه واى عربيه ؟
قولتله لاء عايز اجيب عربية جيب بس انا بخطط دلوقتى ل ١٢٨ ونحدث كل فتره للأعلى
والشقه عايزها فى مدينة جديده زى العبور او اكتوبر ودول كانوا الجديد وقتها 😅
وقتها ساب الميتنج كله ومسك فى كلامى وقالى انت بتفكر غلط وكده مصيرك هيبقي زى اغلب الناس هتتربط فى ساقيه الالتزمات زى الطور وهتجيب عربية وشقه بس هتبقي مضغوط نفسيا وانت بتسوق ومش هترتاح فى شقتك لما تروح تنام 🙄
وكان تبريره ان الناس اللى شغاله ٣ انواع فى تعاملهم مع الفلوس

النوع الاول :  بيعيشها بالطول وبالعرض ومش بيعمل حساب اى شيء وده طول الوقت محتاج فلوس وطول الوقت محتاج يشتغل وبيستمتع وقت قليل جدا وبيعيش فى ضغط وقت طويل.

النوع التانى : بيعيش زى ما الكتاب بيقول يفضل يرتب احتياجاته الاساسيه وهيشتريها ازاى ويزنق نفسه فى جمعيات واقساط ويدخل الدايرة المقفولة اللى كل نقطه فيها بتسلمه للنقطه اللى بعدها زى انه يشترى شقه فبالتالي محتاج يشطبها ثم يفرشها ثم يشترى عربية فيحتاج مصروف شهرى ليها شبه ثابت ويتجوز ويخلف والعيال تكبر ومع كل فتره بيقول هتعدى الفترة دى وهفوق بيلاقى نفسه بيدخل مرحلة جديدة من الالتزمات وان اللى بيشتريه او الخطوات اللى بياخدها ومتخيل انها بتريحه بالعكس بتزود ضغوطه والتزماته ودا تقريبا نموذج منتشر جدا!

النوع التالت : اللى بيذاكر كويس ازاى يستثمر فى نفسه ويصرف على رفع قيمة نفسه العمليه والمجتمعيه ، الناس دى اللى بيضحوا بحاجات كتير فى بداية حياتهم عشان يعملوا دراسات معينه او يحوشوا ويسافروا ياخدوا شهادة معينه او يجتهدوا جدا فى بداية شغلهم ويخلوا كل تركيزهم موجه لحياتهم العلميه والعملية ويحترفوا مجالهم ويكونوا مميزين فيه ودول بقي الندرة فى العالم اللى مش بيجيبوا الشقه قسط ولا بيشتروا عربية وخايفين من مصاريف الصيانه والبنزين ولا بيلعنوا اليوم اللى اتجوزوا فيه بعد ضغط المصاريف والخلفه ومصاريف الاولاد..

وذكرلنا مقولة د. عصام حجى  ” الفرق بيني وبين اغلب شباب بلدى هو انى اتخرجت وفكرت ازاى اكون مختلف ومتميز فشتغلت فى ناسا وانا مكملتش ٣٠ سنه وهم اغلبهم اتخرج ومع اول مرتب بدأ يحسب ويفكر هجيب شقه فين وعربيه وامتى وهتجوز ازاى وهلبس برندات و هعيش حياتى”

بعدها دخلت جمعيه برقم كبير نسبيا وقتها واخدت بيها كلها كورسات ونسيت موضوع ال ١٢٨  😅

الخلاصه ; استثمر فى نفسك واصرف على دماغك ومتخليش احتياجاتك الانسانيه وحاجتك للراحه والاستقرار المزعوم بشرا سيارة او شقه او لبس هم اهدافك فى بداية حياتك خلى هدفك انك تكون قيمة وتسبق جيلك وساعتها تقدر تكون ملك فى بلدك او تقدر تسيبها وتسافر و تكون بردوة ملك بره فى مكان افضل..

المصدر: Mohamed Green

أضف تعليق