سلسلة فى بداية حياتى العملية… cv بتاعه فاضي

لو بتبدأ حياتك العمليه او لسه طالب فى الجامعه المقال  ده ليك  

 سلسلة فى بداية حياتى العملية... cv بتاعه فاضي


صديق خريج 2018 باعتلى بيعانى من مشكلة ان ال cv بتاعه فاضي ؟! وانه اتطوع فى انشطه بس حاسس انها بعيد عن المجال اللى هو حابب يبدأ فيه!
طيب لو انت لسه قى بداية حياتك العمليه اقرأ المنشور ده ومعلش استحملنى فى شوية الرغى دول بس بإذن الله مش هتندم ❤🌸

وانا فى بداية  الجامعة عملت c.v عشان اخويا كان جايبلى شغل المهم ان ال c.v كان كله كدب اساسا كله مهارات وكورسات وانجازات فى الحقيقه معملتهاش لكن كان نفسي اعملها 😂
المهم اخويا زعل منى وقالى انت كده بتغش وهتخلى شكلى وحش قدام الناس لانهم هيدوك الشغلاله عشانى وهيثقوا فى كلامك وبعد كده هيكتشفوا انك مش بتعرف تعمل الكلام ده كله !!

طبعا زعلت انا وهو ومخلانيش اقدمه بس بعدها بأيام قرأت مقال مترجم على منتديات -ياهووو مكتوب- بيتكلم عن حاجه كنت اول مره اسمع عنها وتقريبا مسمعتش عنها تانى كان بيتكلم عن “فن الإدعاء الايجابى .!!”

مقدمة المقال بتحكى قصه عن بيل جيس وانه بداية علاقتة بالبرمجه كانت بسبب إدعاءه وسط اصحابه انه بيفهم فيها وهو مكنش يعرف اى حاجه عنها لسه و دا كان عشان ينال اعجاب بنت زميلته ؛ و اصحابه طلبوا منه يثبتلهم ده فكانت بداية ولعه بالموضوع و بقي تركيزه كله ميطلعش كداب ويتعلم ويظهر قدامهم انه محترف وقد كان وبعدها بسنوات قليله بقي بيل جيس صاحب الشركة العملاقة اللى كانت ثورة فى وقتها (Microsoft  )..

المقال ده اوحى لى بطريقة مختلفه “للتخطيط الوظيفي” وكان المصطلح ده مش منتشر الفتره دى اساسا ولا الكارير كوتشينج طبعا 😅 ..

الطريقه كانت انى اجيب ال c.v اللى انا كاتبه و بتمني اللى فيه يبقي حقيقي فعلا انجازات ومهارات ، وببساطه احوله  To do list !

بشرط اخده نقطه نقطه بالتدريج سواء مهاره او انجاز او تعلم لغه او الحصول على شهاده او كورس ؛ وابدأ اكلم الناس عن النقطه دى وانى ماشي فيها واخدت خطوات كبيرة – وانا لسه مبدأتش اصلا – و خلال الفتره دى اعرض خدماتى المجانيه الخاصه بالنقطه دى وادبس نفسي في شغل يخصها او ادبس نفسي فى تطوع يخصها..!

لقيت تحول رهيب و فرص مش طبيعيه بدأت تظهر مع كل نقطة اركز عليها ؛  هحكى عن ابرز حاجتين مشيوا معايا بالطريقه دى :-

الاولى :
عملت كده فى البورصه و فجاءه لقيت ندوة فى الجامعه عن البورصه وكانت نقطة تحول فى حياتى فى مجال البورصات خصوصا الforex وكان المحاضر د/ Ahmed Aboeldahab وكانت فرصه عظيمه لان بعدها بقيت تلميذه ومقرب منه جدا من فضل الله واتعلمت منه كتير اوى مش بس فى الفوركس والبورصه لاء كمان فى فهم عقليات الناس واحتياجات الاسواق والعلاقات العامه وخلال فتره بسيطه جدا اشتغلت فى شركة مالتى ناشيونال وانا كنت لسه طالب ..

التانيه :
عملت كده فى اللغات وكنت ضعيف جدا فى ال English  وفجاءه فى شركة كنت شغال فيها فى المبيعات لقيتهم دبسونى فى كورس اون لاين انا و 3 تانيين مع محاضر مبيعات من قسم الموارد البشرية فى الشركة الام فى امريكا وطبعا مفيش كلمه عربى طول الكورس 😅
ومقدرش اقول انى مش فاهم او اعتذر لانى انا عمال طول الوقت ارمى مصطلحات انجليزى واعمل فيها انى اجنبي 😅…

الكورس ده كان سبب فى تقدم مستويا بشكل لطيف لانى كنت بخاف اتحرج قدامهم فكنت بطحن نفسي مذاكرة انجليزي ومحادثات على غرف الشات مع اجانب …
و بعد فتره ظهرلى رفيق الدرب برنس امريكا والعالم العربى والغربى مولانا الدكتور Ahmed Fawzy   وده كان حدث تاريخي طبعا لان فى فتره قياسيه بقينا تقريبا اخوات وبنعمل شغل سوي وتقريبا 24 ساعه مع بعض وده فرق 180 درجة فى طريقة النطق واستماع American accent لانه طول الوقت كان بيكلمنى English وبيعدلى و يضيفلى جديد…

عملت نفس الحركة فى التدريب و كتابة المقالات والدعوة و الادارة و والتسويق وهوب هوب كل مره ازنق نفسي واحول النقطه اللى عليها الدور فى ال c.v إياه ل to do point وسبحان الله اول ما ابدأ اكلم الناس واخد التراك بتاعها سواء دراسه نظاميه او ادبس نفسي فى شغل او تطوع يخصها او افكر اخد كورس هوووب ابص الاقيني عرفت حد يساعدنى جدا و يختصرلى طريق كبير وتتيسر العمليه 😲 …

الخلاصه ؛ لو لسه بتبتدى مشوارك فى حياتك  العمليه وبتواجه معضلة ال c.v الفاضي
ببساطه حدد الوظيفه اللى نفسك تشتغلها او شايف نفسك فيها – لو مش هتعرف لوحدك تقدر تبحث على جوجل مقالات ومواقع كتير هتساعدك او تسأل حد متخصص فى التوجيه الوظيفي – المهم اول ما توصل للمسمي الوظيفي اللى بتحلم بيه ادخل على لينكد ان و دور على الناس اللى بتحمل المسمي الوظيفي ده وحمل ال CVs بتاعتهم او انسخ مهارتهم وانجازتهم فى ملف عندك وشوف ايه المهارات والانجازات المشتركه بين الفئه دى من الموظفين و اعمل cv لنفسك محتواه يكون المهارات والانجازات والخبرات دى ؛

وابدأ حول ال cv الى to do list وخده نقطه نقطه ، واستخدم فن الإدعاء وارمى نفسك فى اى مكان او مجتمع او شغل او تطوع يخص النقطه دى سواء اون لاين او اوف  لاين وعيش يا معلم وانبهر من النتايج و انتقل من خطوة لخطوة هتقابل معوقات كتير وفى حاجات هتاخد معاك وقت وكتيير هتتحرج واحتمال تنضرب كمان 😂  بس اجزملك ان  النتايج النهائيه هتكون مزهله مزهله ..

المصدر: Mohamed Green

أضف تعليق