عاوزة اعرف هل إبني شقي ولا عنده فرط حركة ؟

سوف نتناول اليوم فى موقعكم المفضل  يفيدك عن عاوزة اعرف هل إبني شقي ولا عنده فرط حركة ؟ نتمنى أن تلقى اعجابكم بأذن الله


إبني شقي ولا عنده فرط حركة ؟



إمتي تبقي حركته وتصرفاته طبيعية ودليل علي إنه طفل سوي.. وإمتي يبقي في مشكلة ولازم نتدخل ونحاول نحل؟



آباء كتير مش بيبقوا عارفين الفرق ومش مدركين ان في مشكلة اصلا ولو  سكتنا عليها وقولنا دا زيه زي كل العيال بنأذيه وخصوصا إننا علشان نحفزه يهدي او يقعد في مكانه بنديله حاجات محببة ليه زي الحلويات والاطعمة اللي فيها مواد حافظة ومابنبقاش عارفين اننا كده بنزود المشكلة



نبتدي الأول بالشقي :

الطفل الشقي حركته كتير اه لكن بتبقي موظفة يعني يعرف إمتي يلعب وإمتي يوقف نفسه ..بيحب يلعب عنده طاقة بيصاحبها تركيز يعني لو في حاجة شدتت انتباهه بيركز وبيشوفها او يسمعها بيبقي عنده ذاكرة كويسة تخليه يقدر يسترجع اي خبرة مر بيها ويوظفها في الكلام او التصرفات بعد كده ..يعني من الأخر لو في حاجة تتعمل بيقعد ويعملها ..اه ممكن يزهق ومش بيحب الأنشطة او المواقف اللي بتحتاج وقت كبير لكنه بيبقي عنده دافعية ينجزها اسرع علشان يقوم يكمل نشاطه ..بيتصرف من غير ما يأذي نفسه

وافضل طريقة للتعامل معاه انك دايما يبقي في حاجة شغلاه..لعب ..نشاط ..واجبات مدرسية ..شغل البيت مثلا مع تحفيز يحسسه بالإنجاز  ويمارس رياضة بيحبها علشان يطلع فيها طاقته وهكذا .



نيجي بقي لطفل إضطراب فرط الحركة ..هو فعلا “إضطراب”🙄

فرط الحركة بيبقي مصحوب بتشتت انتباه واندفاع ..بمعني إنه ما يقدرش يركز في حاجة وبتحرك وبيتصرف وبيتكلم بإندفاع وبيقي صعب يسيطر علي حركته وبتبقي حركة غير مبررة او موظفة ..يعني بيتحرك من أجل الحركة وخلاص وممكن تكون بتخريب..يكسر حاجة.. يشد حاجة..يزق حد يوقعه ..يفتح ادراج ويرمي اللي فيها ..يشد فرش السراير و أثاث البيت  وينزل تحت الكراسي والكنب ..يجري منك في الشارع من غير ماياخد باله من الناس والعربيات ..يرمي نفسه علي أي حاجة ويعرضها للخطر   ..وبيقع كتير وبتبقي وقعات  صعبة لانه مش مسيطر علي حركة جسمه ..ومابيحبش يستجيب لأي توجيه لانه بيلاقي صعوبة في تنفيذه..  و دا بيأثر علي ذاكرته وتحصيله وبيخليه صعب يكتسب خبرات ومهارات وبينسي حتي أدواته ومابعرفش يميز هو محتاج ايه ومش محتاج  إيه لانه ببساطة مابينتبهش ولا بيركز ولا بيصبر يعرف حاجة  بسبب التشتت الداخلي والخارجي …دا بيبقي ليه  اسباب وعوامل منها وراثية ومنها عضوية واللي يقدر يشخصه دا طبيب المخ والأعصاب او النفسية والعصبية .علشان يديله علاج دوائي يساعده علي انه يبقي أهدي وينتبه ويركز اكتر  والأخصائي النفسي والسلوكي علشان يتعمل له برامج خاصة تساعد في تحسين الذاكرة والتحصيل عنده ..يعني بمجرد ما نلاحظ الاعراض اللي فاتت دي كلها ياريت نتحرك ونحاول نلحق الموضوع قبل ما يزيد لان الاندفاعية المصاحبة لفرط الحركة هاتأثر علي كل حاجة في حياته ..علي علاقته بافراد اسرته وعلي دراسته وعلاقته بزملاءه في المدرسة ودا بيوصل لإحباط يخليه ينتكس ويبقي عرضة لإضطرابات سلوكية أسوأ .



طب ايه الاجراءات اللي ناخدها احنا معاه لحد مانوصل لخطة علاجية سواء دوائية او سلوكية ؟

*اولا: نحاول نتعامل معاه بتقبل من غير ضرب ولا صريخ وزعيق طول الوقت ونفهم ان دا خارج إرادته

و كل ما نتصرف بدري يبقي افضل ليه ولينا من ٣ ل٥ سنين مثلا

*ثانيا :نمنع كل الاطعمة والمشروبات اللي بتساعد علي الإضطراب وهي كل المشروبات الغازية والمشروبات المحلاة بسكر وكل السناكس والاطعمة المغلفة وفيها مواد حافظة ونكتر من الخضروات والفاكهة الطازة والمجففة كمان زي التين والمشمش والقارصيا والزبيب والمكسرات والاسماك وكل الاطعمة الغنية باوميجا 3 .

المصدر:فن التربية الإيجابية – Dina Saad

أضف تعليق