ملخص مجموعة قصص بعنوان طلقنى شكرا

طلقنى شكرا …

ملخص مجموعة قصص بعنوان طلقنى شكرا


كمية الكلام عن الطلاق و نسب الانفصال العجيبه دى بقي شيء يدعوا للإحباط وللأسف بشوف ناس كتير بتقول ان غالبية الحالات دى بتكون الزوجه السبب لذلك بقالى فترة كل ما اقابل حد من صاحبى اسأله ايه سبب الحاله دى وهل يعرف ازواج سعداء ومتفاهمين وحياتهم مستقره وخصوصا بسبب الزوجات ولا ده بقي نادر ؟!

المهم طلعت بقصص كتير اوى هحكى منهم ملخص 4 قصص ؛

– واحد حلم ان مراته زعلانه منه وهو مسافر بره مصر راح تانى يوم كلم صحبه -اللى حكالى القصه- وقاله هتلها هديه عبارة كذا و كذا وكذا ،،،، حاجات كتير جدا وابعتها ع البيت ..
فلما سأله ايه المناسبه وعرف السبب واستغرب جدا وقاله انت مجنون تحلم انها زعلانه منك تروح باعتلها ده كله  !
الزوج المحترم ده قاله : انها فى بداية جوازهم هو خانها واهلها عرفوا وكانوا عايزين يطلقوها منه وهى رفضت و زعلتهم منها بسبب كده وقالتله انا متأكده انها نزوه وانك عمرك ما هتزعلنى تانى – ومن وقتها وهو كل ما يحس انها مضايقه او انه مزعلها يحاول يصالحها ويطيب خاطرها بسرعه حتى لو ده كان حلم !!!-

– واحد متجوز بقالة 12 سنه وفاتح شركة بيصدر فواكة لإفريقيا و بيكسب كويس جدا ومخصص لمراته 30 % من صافى الارباح رغم انها ملهاش اى حاجه فى الشركة ولا حتى تفهم فى شغله !!
لما صاحبه -اللى حكالى القصه- سأله ليه بتعمل كده وكده الفلوس ممكن تفسد دماغها او تقويها عليك ؛
قاله : انه فى بداية الجواز كان شغال فى شركة خاصه والشركة قفلت وفضل سنتين من غير شغل مستقر وهى كانت شغاله وبتصرف على البيت وعمرها ما اشتكت ولا عايرتنى ولا حتى حد من اهلها عرف انى احوالى مش متظبطه فى الشغل ..!

– واحد بيحكيلى قصة جارهم اللى أهله طردوه بسبب خلافات عائليه واهل مراته فضلوا معيشينوا معاهم فتره طويله لحد ما احواله اتحسنت ومراته كانت سبب فى انه يصالح اهله ويرجع يكلمهم تانى بعد ما بهدلوه رغم انها شافت ايام ذل فى بيت اهله وانها اتهانت كتير لدرجة انهم ضربوها اكتر من مره ..!

– واحد بعد الجواز مباشرة اكتشف ان مراته عندها عيب فى الرحم ومش سهل تخلف ، مطلقهاش ولا اتجوز عليها ولا خانها ولا حتى ندم على الجواز منها ؛ البرنس ده بعد 6 سنين جواز عمال بيصرف عليها وعلى حالتها وخدها عمره اكتر من مره وبيقول هفضل احاول معها لحد ما الدكاتره يقولولى خلاص مستحيل تخلف وبكده اكون خلصت كل الاسباب والسعى وافوض امرى لله وارضي بحالنا انا وهى وهكمل حياتى معاها بردوة ❤ والسبب هنا انها انتظرته فترة طويلة جدا ورفضت عرسان كتير جدا لحد ما ظروفه اتحسنت وجه خطبها واتجوزا ❤

العهده على الرواى فى كل قصه لكن انا اخترت 4 حالات كل حالة فيهم بتمثل نسبة ضخمه جدا من اسباب الانفصال الشائعه ؛
– الحاله الاولى : الاستهتار بالمشاعر والخيانه
– الحاله التانيه : المشاكل الماديه
– الحاله التالته : مشاكل الاهل
– الحاله الرابعه : مشكلة تأخر الانجاب او العقم

كل حاله من دول بتتكرر الاف المرات بس التفاهم و التعامل مع الحاله نفسها بيكون هو الفيصل فى امكانية استمرار الحياه مع بعض ولا استحالتها واختيار الانفصال !!
البوست ده كان ردا على حد انفصل عن مراته وقالى ان البنات ديما هم السبب لانهم مبيستحملوش !! فأنا بقوله يا انت اخترت غلط يا اما هى اكتشفت فيك حاجه غلط كبيرة وهى متقدرش تصلحها ولا تصبر عليك فيها …!!

وهذا المقال على سبيل الفضفضة وللقضيه جوانب كثيره ورؤي مختلفه و وجهات نظر متعدده و حاجات وكدهون  😅

المصدر: Mohamed Green

أضف تعليق