هل الافضل اشتغل ولا اتعلم يعنى العلم أم الخبره … ايه أهم ؟

العلم أم الخبره … ايه أهم ؟


بوست طويل شويا بس مهم وهيفرق مع ناس كتير  وهيجاوب على سؤال مهم بيحير الجميع 

وعشان نعرف الفرق بنهم لازم نعرف شوية تفاصيل وتوضيح أكتر عن العلم والخبره

أولا الخبره :-

.. الخبرة نتيجتها معرفة ومهارة.
.. الخبرة بتتبني بالتجربة والخطأ Trial and error
.. الخبرة محتاجه لوقت ومجهود وتكلفة .. عشان تتكون.
.. الخبرة عبارة عن معرفة من وجهة نظر الشخص ده .. واتكونت في ظروف معينة.


*  ثانيا العلم :-

.. العلم برده عبارة عن معرفة.
.. العلم عبارة عن مجموعة من المعارف الي جمعها هم علماء وناس مشهود ليهم بالمعرفة الكبيرة والتخصص في جمع المعلومات وتحليلها والاستنتاج منها .. لما جربوا هم شخصيا أو لاحظوا غيرهم بيعملوها.
.. العلماء بيطلعوا من الخبرات دي مجموعة من القواعد .. بيحطوها عشان يقدر غيرهم يستخدمها ويوفر الوقت والمجهود والتكلفة .. ويقدروا يحققوا النجاح.
.. العلم اتكون بتراكم .. ودايما مستمر في التراكم والزيادة .. وده معناه إنه بيقدر يساعد الي هيتعلمه مهما اختلفت المواقف والظروف الي بيقابلها


يبقى ايه أهم .. العلم ولا الخبرة ؟

العلم طبعا أهم .. لكن مش هيكمل من غير الخبرة.

طيب .. ليه أصحاب العلم ممكن تكون نتايجهم أضعف من أصحاب الخبرة ؟
الأمريكان بيقولوا على الي اتعلم بالخبرة .. اتعلمها بالطريقة الصعبة Learned it the hard way .. ده بيدي قوة لصاحب الخبرة .. لإنه متعلمش بالساهل .. وده بيديه عزيمة أعلى في شغله ومراحل تعلمه الجايه .. وللأسف بعض أصحاب العلم بيجيلهم تكبر بسبب كمية المعرفة الي اكتسبوها بالساهل -مقارنة بأصحاب الخبرة- من العلماء .. فبيفتكروا إن الموضوع سهل أهه .. ولما بينزل لأرض الواقع .. بيكتشف إن الموضوع مش سهل زي ما كان فاكر .. خلي بالك العلم مقالوش ان الموضوع سهل .. لكن هو افتكر كده !! وسعتها بيحصله حاجه من اتنين .. إما يرفض العلم .. أو يرفض الواقع !!
يرفض العلم .. يعني يرميه ورا ضهره وياخد السكة من الأول تاني زي صاحب الخبرة .. ويعلق فشله على العلم !!
يرفض الواقع .. يعني يفضل متمسك بالي هو فاكر إنه علم ويستمر في الي بيعمله .. ويعلق فشله على الواقع !!


قولولي ايه رأيكم في اطيب .. ليه بعض أصحاب الخبرة شايفين إن أصحاب العلم مبيعملوش حاجة .. وبيتكلموا على الفاضي ؟؟

لإنه غالبا وقع في حد من أصحاب العلم الي لسه متكلمين عنهم .. أو هو معتز أوي بالخبرة بتاعته والمجهود والتكلفة الي دفعهم والنجاح الي وصله .. فشايف إن مفيش طريق تاني غير الي مشي فيه !!

الصح .. إن أصحاب العلم يحترموا الخبرة .. ويسعوا باستمرار لاكتسابها .. وإعادة تنظيم وتعديل علمهم بناء على الواقع.
والصح .. إن أصحاب الخبرة يحترموا العلم .. ويكملوا بيه الي ناقصهم .. عشان يقدروا يحلوا المشاكل الجديدة وتغير الظروف الي حواليهم.

بس ده مش معناه إن الخبرة مش مهمة .. لإن الخبرة الشخصية مهمة جدا للإنسان .. لإن العلم بيدي القواعد العامة والحلول المختلفة .. زي المفكات في عدة الميكانيكا .. العلم بيديك المفكات .. وبيقولك تستخدمها ازاي .. وايه الأنسب فين .. لكن مش بيمسك ايدك أو يفك مكانك .. عشان كده الإنسان محتاج يختار المفك الصح .. ويجرب يفك بايده .. ويشوف ايه النتيجة .. لو جابت النتيجة الصح يبقى تمام .. ولو مظبطش هيرجع يشوف ايه الي عمله غلط .. هل القاعده ولا الموقف ولا الي عمله .. ويصحح .. لكن العلم وفر عليه وقت طويل .. واداه ثقة كبيرة في نفسه .. والباقي عليه إنه يطبق بايده .. وهي دي الخبرة المبنية على العلم .. الي كلنا محتاجينها.


طيب .. نيجي هنا لسؤال .. ازاي في ناس حققوا نجاح من غير علم .. أو وهم مبيقروش ولا بيكتبوا ؟؟

احنا اتفقنا إن الخبرة والعلم الاتنين معرفة .. أصحاب الخبرة عندهم معرفة برده .. بس زي ما قلنا محدودة بالمواقف الي قابلوها والظروف الي مروا بيها .. عشان كده بنقول .. الخبرة لوحدها مش كفاية .. ليه ؟

لإن لو المواقف أو الظروف اتغيرت .. بيبدأ صاحب الخبرة يقيس على أقرب موقف مر بيه .. وممكن الحل الجديد يكون صح أو غلط .. ونعيد التجربة والخطأ .. لكن بتكلفة أقل طبعا .. لكن في وقت ومجهود وتكلفة .
المصدر:احمد صبري

أضف تعليق