هل صح إني اربط نجاح ابني دراسيا بنجاحه في حياته


سوف نتناول اليوم فىموقعكم المفضل يفيدك عن هل صح إني اربط نجاح ابني دراسيا بنجاحه في حياته نتمنى أن تلقى اعجابكم بأذن الله



كلنا عاوزين ولادنا متميزين وناجحين بس هل درجات الامتحانات مقياس لدا!!

هل صح إني اربط نجاح ابني دراسيا بنجاحهم في حياتهم ونجاحي انا معاهم في دوري كأم او أب ؟

 هل ثقافة المجتمع ان الشهادات والدرجات دون الإلتفات للمحتوي صح؟



حاجات كتير محتاجين نراعيها في طريقة تفكيرنا ومعاملاتنا مع ولادنا :



*علشان نبقي أسوياء اولا وآخيرا لازم نكون متزنين نفسيا وبصحة نفسية سليمة مش لازم درجات عالية.

*بلاش فكرة إن المذاكرة عقاب وإن رضاكي انتي وبابا بحسب درجتهم .



*الدراسة مش كل الحياة ..الدراسة جزء زي النوم والاكل والتمرين وممارسة الهواية وقعدته معاكم ولعبه مع اخواته واصحابه .



* فترة الامتحانات فترة عادية مش معسكر .



الامتحان مش بيحدد مصير الطفل ولا بيقيس قدراته العقلية ولا مكانته في المجتمع ..الامتحان مجرد بيقيس قدرته علي إسترجاع المعلومات والدراسات اللي اتعملت قالت إن النجاح العملي مش بالنجاح العلمي ولكن بالذكاء الاجتماعي والعاطفي .



* لازم نراعي ان في فروق فردية وفي نظرية بتقول إننا مش كلنا نتمتع بنفس الذكاءات  وإن مش الكل هايبقي اطباء ومهندسين ولكن في اللي هايبقي فنان او شاعر او رياضي او رجل أعمال مميز ..علشان كده تجنبوا المقارنة وبلاش كلمة شوف إبن خالتك وشوف إبن عمتك جابوا كام !😥 لكن لو في اكتر من طفل نشتغل علي روح المنافسة مش المقارنة علشان مايكرهوش بعض .



*بلاش تحفيز سلبي بكلمة انت غبي وانت مخك تخين وكلمة دي مش محتاجة تفكير لما يواجه صعوبة في حاجة (ماتنسيش ان دماغه غير دماغك) ..شجعيه وإمدحي مجهوده وحفيزيه ينجز اكتر ويبقي قد المسئولية وتنميها عنده كقيمة ويتعلم يتحملها في كل أمور حياته بجانب تقدير قيمة الوقت وإن اللي يستحق نص ساعة ماينفعش يتعمل في ٣ و٤ ساعات  ودا يخليه يبقي عنده دافع الإنجاز من نفسه اكتر ويوصل لشعور بالرضا يخليه يحس معني (انا عملت اللي عليا ) بغض النظر عن الدرجة في الآخر  .



*خلي في تواصل وحوار عن حياتكم اليومية مش المذاكرة بس وماتبقاش المعايرة طول الوقت علي تقصيره من وجهة نظركم .



إسالي نفسك كأم (إبني بيتطور ولا لا ؟) واعرفي ان دا مش بكمية المعلومات اللي حافظها إنما بكيفية استيعاب اللي بيعدي عليه وبيكتسب بيه خبرة حياتية يمارسها في الواقع .



* اجهزوا من بدري مش لازم نستني ليلة الامتحان علشان مايبقاش في ضغط ولو حصل مش هايبقي آخر الدنيا ..سيبه يتقرص ويعرف اللي عليه بعد كده وانه يذاكر قليل بشكل مستمر احسن من كتير علي بعضه وبضغط وتوتر  وإن نسبة قليلة من اللي عليه بإتقان افضل من كتير نص نص وننساهم بعد الامتحان.



*هايئوا له مكان هادي ومناسب بعيد عن المشتتات ويبقي في دايما تحفيز علي أي إنجاز ولو بسيط بس بالمعقول علشان مايتحولش لإبتزاز  ودور بابا ومشاركته معانا بتفرق كتير والتشجيع منه ليه طعم تاني 🙂



*عمل جدول الانجازات فكرة جميلة الاتفاق علي تجميع نقط معينة وكل مجموعة بجايزة دا هايحمسه اكتر ويعلي عنده النشاط .



الاكل الصحي والنوم الكافي نص المشوار وبلاش الافراط في استخدام المنبهات لاننا لو نايمين كويس هانعرف نركز كويس وفرصة التحصيل هاتبقي اعلي.



* الامهات اللي بتعمل الواجب بدل ولادها علشان مايتعاقبش..إنتي كده بتعمل طفل متواكل ومستهتر واللي بتسيبه خالص وتقول له اقعد ذاكر هاتخليه يتوه ..خلي فيه توازن ومتابعة ويبقي في تدرج في المساعدة لغاية مايوصل لمرحلة اعتماد علي نفسه بشكل كامل.

الإمتحانات_وسنينها

ابني_ابنك_ولاتبنيلوش

المصدر:فن التربية الإيجابية – Dina Saad

أضف تعليق